“Mən səni sevirəm vəhyə çəkilən peyğəmbər Allahı sevdiyi kimi”

I. Biz hara gediriksə

ordan qayıdır zaman

Ad günü

Hədiyyə edirəm özüm özümə,

Dünyanı özümə bağışlayıram,

Qumu tullayıram pisin gözünə,

Yaxşını min dəfə alqışlayıram.

Qızımın saçını tumarlayıram,

Öpürəm oğlumun geniş alnından.

Qalxıb qəlbi dikə ulduz sayıram,

Keçirəm qürubun eniş altından.

Bayatı tinindən ehmalca ötüb

Qonuram qoşmanın haça çiyninə,

Ordan adlayıram heca çiyninə,

Anamın rubai əlindən öpüb

Qalxıram atamın uca çiyninə...

Axır bəbəyimdən Araz daşqını -

məndə ki, çarəsiz...

əfəl günündə!

Tikanlı məftillə çərtib başımı

Dönnəm xarabama

qətl günündən!

Söykənib qismətin

sirli gücünə

duyuram,

nə ilkəm, nə də axıram,

qısılıb dəftərin dümağ küncünə

qara günüm üçün

hikmət yığıram.

Cəza çəkməlidi günahı olan -

Türməyə basıram yad günlərimi.

Ömrümü qanunla verirəm yola,

Belə keçirirəm ad günlərimi...

28.05.15

Özümə qalsa

Şirə verib bitənə

Susaram kötük kimi.

Paylaram yol ötənə

balımı pətək kimi.

Özümə qalsa çinar,

gavalı kimi susaram.

Cabbar oxuyub uçunar -

qavalı kimi susaram.

Nə sirdi yaxşı yuxu

mələyimə deyərəm.

Pis sözümü qurcuxub

bələyimə deyərəm.

Özümə qalsa burub

hörərəm birçəyimi.

Dilimə tikiş vurub

udaram dilçəyimi.

Di gəl açılan sabah

aralığı qarışdırır.

Allah dindirir, vallah

məni Allah danışdırır...

06.06.15

Başqa

Təbrizə baş çəkdim,

Qarsı dolandım -

qalmağa yer hanı gorumdan başqa?

Dünyada nə qədər gözəl var;

qandım

hamısı nağıldı...

birindən başqa!

Baş vurdum sevdanın sərin dibinə,

Tükəcən quylandım yerin dibinə,

Can atdım dəryanın dərin dibinə -

dalğıc nəyi istər dərindən başqa?

Düşdüm xəyalına Hörmuz dadanın -

elə buna görə aldım zədəni...

Həvvaya tamsınan haramzadanın

burnundan nə gələr irindən başqa?

Günahkar xilası son ahda bilir,

mən ki, günahsızam,

günah da bilir!

Cızıqdan çıxmadım, Allah da bilir -

yad vərə girmədim vərimdən başqa.

Ha yandan gəlmişdim,

hara ged irəm? -

Əcəl yaxmacına sürtürəm şirə...

Həsrətin qəfəsdi, içində şirəm,

Heç nə eşidilmir nərəmdən başqa.

Boş əmək, boş ətək...

bəhər, bar ayı -

küləklə qabarır xurcunun tayı,

Almanı div qapıb, armudu ayı -

Soymağa nə qalıb

dərimdən başqa?..

19.07.15

Hamıya yaxşılıq

Mənim hörmətli nazirim Əbülfəs Qarayev bir dəfə kifayət qədər gərgin keçən iclasda sözarası belə dedi: “Mən həyatım boyu insanlara o qədər yaxşılıq eləmişəm ki, innən sonra nə qədər pislik eləsəm Allah günahımdan keçər”.

Əbülfəs müəllim, dilinə qurban,

Tamam düz deyirsən,

dediyin haqdı -

Yaxşılıq yolunda can qoymusan, can,

Nə ki yamanlıq var, səndən uzaqdı.

Qəlbini bir dəfə boşaldıb ildə,

hətta dil tapırsan iblis adamla.

Bülbültək ötürsən beş-altı dildə,

Pisliyin dilini bilmirsən amma.

Alova yaxşılıq...

hisə yaxşılıq...

Lap yansın çırağı qara evlərin.

Yaxşıya yaxşılıq,

pisə yaxşılıq -

Həyat tərzi budur Qarayevlərin.

Əclaf da, paxıl da unudur kini -

Nadan fikrə gedir qanmayanda da.

Üzü işıqlanır, adam sevinir

Qardaş, sən adamı danlayanda da.

Müsbət rəy...

hər kəsin ərizəsinə -

Nizamülmülk kimi yaxşı vəzirsən.

Qalxırsan dirinin lap zirvəsinə

Ölünün içində həyat gəzirsən.

Son hesab xaliqin həddinə yetsə;

dua var dəryanın

yaş balığında.

Lap bir gün

Allah da ziddinə getsə

Yenə usanmazsan yaxşılığından.

Çürük kötükdə də pöhrə gücü var,

Yaxşılıq suyuna çək iyrəncləri.

Atan əvəzidi bütün qocalar,

balantək sevirsən bütün gəncləri.

Bəlkə

sənə görə açılır səhər?

Harda varsan, orda

xeyir dolaşır.

Düşəndə axşamlar,

qarışanda şər

Qanadın altına xeyir doluşur.

Qalaça tikirsən daş qalağından -

Adam çox...

hamıya bu vərdiş gəlmir.

Qardaş, bir an qalma yaxşılığından,

Onsuz da əlindən yaman iş gəlmir!...

gecə, Mərdəkan, 2015

Altmış yaşıma

Qırx, əlli qutuda bitmiş yeriyir

İndi də bu gəlib...indi də altmış,

Ora bax, üstünə yetmiş yeriyir -

Sən hara baxırsan, ay başı batmış?..

17.07.15

Qardaşıma mesaj

Ay Yadigar,xəbər yolla sərçədən

Bəhmənlidə Günəş çıxıb, çıxmayıb?

Boş başıma ağıl qoyur hər yetən

Bəhmənlidə qamış çıxıb, çıxmayıb?

Xoş halına,

orda qərar tutmusan -

Alça, ərik, gavalı, ya tumusan?

Səsin gəlmir,

bəlkə tuluq udmusan -

Bəhmənlidə bir iş çıxıb,

çıxmayıb?

İncidirmi səhər şehi qönçəni?

Kim qaytarır

ləkə cuman cöngəni?

Qazon yedi burda yumşaq yoncanı,

Bəhmənlidə

kalış çıxıb,

çıxmayıb?

Olan budu,

Qonaq nədən incisin? -

Yağırmı tut? - məhsulun birincisi?...

Badımcandı qapımızın zəncisi -

Bəhmənlidə qaloş çıxıb,

çıxmayıb?

Mesajımdan sonra üzün gülümsə

İş fənadı...

xalaxətrin gülümsə!

Qarpıza dil vurarammı, bilməsəm

Bəhmənlidə

yemiş çıxıb, çıxmayıb...

Allah hanı?

Şeytan ətək düzəldir,

Arı bala simdən pətək düzəldir

Süd nəmənə... Bakı inək düzəldir -

Bəhmənlidə camış çıxıb,

çıxmayıb?

Ay Yadigar, qulluq elə dərinə

Turp qızarsın

görüm, sənin yerinə...

Qızılları nahaq əkdik dərinə,

Bəhmənlidə gümüş çıxıb,

çıxmayıb?

17.06.15

Yenə də zaman

Yenə də Sultan Səncər,

yenə şahın divanı

Yenə də tarix zəncir,

insan... yenə divanə!

Zaman təkər kimidi -

dığırlanır, çevrilmir

Paslanır haqq kilidi,

Yenə zaman devrilmir.

Yetmir o təkin cövrü,

yenə Zevs Allah doğur

başa çatmır döl dövrü

Allahlar günah doğur.

Daş, dəmir mis hardadı

Hərəsi bir lağımdı.

Yenə də mismardadı

Prometey Qaf dağında.

Qara qullar, oynaşlar,

Yenə də ütük dillər,

Yenə də kəsik başlar,

Yenə də kötük dinlər.

Yenə, yenə, yenə də

alov püskürən zaman

yeddi baş əjdahadı

Vətən nədi, Allahdan

yenə də can bahadı.

Tərləməyib diki də

çopur qayadır zaman.

Tərpənməyib tükü də

İndi çıxıb kahadan.

Yaxası gəlmir ələ

qonur ayıdır zaman.

Amma bununla belə

biz hara gediriksə

ordan qayıdır zaman.

Nədir bu zaman axı?

Yetmir, ağlım az, Allah!

Heç iblis də tarixi

belə saxlamaz, Allah!

30.06.15

II. Aşiqlərə yol açıq, doğru yol xəta bilməz...

Tarixi hadisə

Yer oynayar yerindən,

bəlkə qopar zəlzələ

səni sevirəm desəm...

Çünki sən elə belə

adi sevgi deyilsən -

Tarixi hadisəsən!

20.06.2015

Özü özündən qafiyələr

Sözlərin...

eşitmədiyim!

Gözlərin...

içində itmədiyim!

Dillərin..

dadmadığım!

Yanaqların...

toxunmadığım!

Ürəyin...

oxumadığım!

Qamətin...

kölgəsizliyim!

Qədəmin...

ölkəsizliyim!

Xəyalın...

unutmadığım!

Gecələrin...

yatmadığım!

Səhərlərin...

qıymadığım sənə,

Yuxudan oyatmadığım

səni!

25.06.15

Alçaq adam

Nadanlar heç zaman yükünü bilmir,

Əyir tərəzini gizli qəm çünki.

Mən alçaq adamam -

bunu kim bilmir,

Sənintək ucaya aşiqəm çünki.

07.06.2015

Yeni həyat

Gəlib yer almısan bağrım başında,

Canımı sarmısan bükümbəbüküm.

İndi mən neyləyim ahıl yaşında,

Başıma haranın daşını töküm?

Öndə beş-üç metr yol var uzunu -

gülməli gələcək sualım sənə;

Dalınca düşümmü bulvar uzunu,

Bəlkə durub gedim su alım sənə?

Məni günahımın başına çevir -

Boğazın qisməti əcəl ipidi.

At tava içinə, qəlbimi sivir

Sevginin ən dadlı yeri - dibidi...

Pozaq tabuları, savab eləyək

Şahzadə taxtını qurduğu yerdə.

Qəzadı, qədərdi, hesab eləyək -

Adam işə düşür durduğu yerdə.

Sənə kəcavədi köhlən həyatım -

Yalansa, torpaqlar yorğanım olsun!

Qurbanlıq qoç kimi köhnə həyatım

Təzə həyatımın qurbanı olsun!

06.06.15

Axşam

Əridi, ömür bitdi

Fitili sap şam kimi.

Gün kükürdlü kibritdi

qaralır axşam kimi.

Sanalı anım qalıb -

babalı şama qalsın,

Yüz qıram canım qalıb

o da axşama qalsın!..

06.06.15

Div məhəbbət

Sirrin dağarcığında

Səbrim səfərlər olar,

Kimsəyə söyləmərəm sevdiyimin adını.

Qaranlıq duysa əgər

gözləri müstər olar,

Günə çıxsa Günəşin yanar qızıl qanadı.

Əlyetməzi zəqqitum,

əlyetəni noğultək -

Quranda ayə yoxdu

yarımın ismi təndə.

Döşənib qədəminə

susaram qaraqultək,

Sevdiyimi sevirəm

Allahın cismi təndə.

Gözümdə heçdi, vallah,

ömrümün itməyi də,

Dünya cəhənnəm olsun,

sevdiyim yar hayıfdı.

İstəmirəm mən onun

qalxıb bitməyini də

Şaxta, yağış qəhr edər,

külək vurar, hayıfdı.

O Tanrıya layiqdi,

Mən ömür köçündəyəm,

Tanrı necə desin ki,

qurbandı bu can ona?

O mənim içimdədi,

mən onun içindəyəm

İki candan savayı

qürbətdi hər yan ona!

Quru canlar tum kimi

yol dişində çırtlandı -

Aşiqlərə yol açıq,

doğru yol xəta bilməz.

Saf eşqimin yanında

dünya gopçu Cırtdandı,

Divlər yel olub onun

yanından ötə bilməz!

05.06.2015

Bir şərt

Yalnız bir şərtlə durub

itilərəm yurdundan,

Dönüb şeytan olaram

yek kəlməmi çevirsən:

Eşitsəm namərd Allah

divanədi dərdindən,

Bilsəm ki, məni deyil,

sən Allahı sevirsən...

17.06.15

Rüsvayçılıq

Səni

xəlvət sevirdim...

nurun çıxdı üzümə -

Günəş oldum,

Ay oldum -

Üstü “içə” çevirdim,

içi astar üzünə...

cahanda rüsvay oldum!

24.06.15

Gizli məhəbbət

Bacarsan... məni sev özündən gizli,

Məni sevdiyini mənə də demə.

Məni sev əlindən, gözündən gizli

Assalar,

kəssələr -

yenə də demə...

Meh nədi...

İşıqdan üşüyən gülsən,

Qanmayan rədd olsun, qanan bilməsin

Araya qan düşər qardaşın bilsə,

Ürəyi partlayar...

anan bilməsin!

Çardaqda sağaldaq yaralımızı -

Biabır olarıq; hələ diriyik

Yalnız Allah bilsin parolumuzu,

Biz arxa cəbhənin əsgərləriyik.

Casus fikir verər hərəkətinə,

Minalı canımı min dəfə yoxla.

Gizli gir könlümün məmləkətinə,

Fitili özündən aralı saxla!

Məcnun töhmətinə camaat gülür,

Aşkar sevgilərin çəpəri olmur.

Məni gizlicə sev, necə ki gülün,

Çərənçi bülbüldən xəbəri olmur.

Şam hanı, mum hanı? -

Fələk daş etsə

Külünü çırpacaq səməndər bizə.

Ya mən quş buraxsam, ya sən faş etsən

Lənət oxuyacaq həndəvər bizə!

Gizlət ovsunlanmış bir nəlbəkidə,

Qur məni bir uşaq evciyi kimi.

Mənsə səni sevim vəhyə çəkilən

Peyğəmbər Allahı sevdiyi kimi.

Sirrim ol...Mən sirsiz çətin olaram -

gizli bir fikir də gəlir ağlıma,

kölgəndə gizlənib itin olaram,

Bir şərtlə, boynuma zəncir bağlama...

06.06.15

Məna

Qədəm basmaq dərgahına

və sənə toxunmaq...

nə gözəl!

Sığınmaq sənin pənahına

və səndə yox olmaq...

nə gözəl!

17.07.15

Fərqli fəda

Dərdi necə bölüşüm? -

Dərdə günahım fəda

Gülüşünə gülüşüm,

Ahına ahım fəda!

Yol ver keçim içəri;

Ləki özüm seçərəm,

Al qoynuna

cücərim -

torpağa toxum fəda.

Sən ey başımın tacı,

Kəfənim biçən qayçı!

Hüsnünə qardaş, bacı,

yad fəda, qohum fəda!

Bir yol üzüm gülməsə,

Tanrı qismət bilməsə,

Tənim ələ gəlməsə

Canına ruhum fəda.

Vaqifi hərləyir qan...

Fərqi yox,

qoca, cavan -

hamıya canım qurban,

sənə Allahım fəda...

18.07.15

Məni yaradan

Sahibim, çək ilməyi -

Nəyim mənim nəyimdi?

Özümə çəkilməyim

Sənə çəkilməyimdi...

Əlim daşa toxunsa

əlindi elə billəm.

Bağçamda gül qoxusa

dilindi elə billəm.

Əlimi qayçılı san -

ağ kəsirəm dumanda.

Gözümdə açılarsan

gözlərimi yumanda.

Atam, anam olmayıb

məni yaradan sənsən.

Dörd yanım boşluq, quyu -

Şükür, arada sənsən!

Göylərdən gələn nəfəs

gah dirilər, gah ölər

Sevənlər ölə bilməz;

biz ölsək, Allah ölər...

07.06.15

Xatirələr

Xatirələr...

Xatirələr

yada düşmür yalnız

can uçuqları,

bərbad şəklində!

Xatirələr...

əyri cəliyinə

söykənə-söykənə bir sevimli qız

gəlib

baş-başa durur səninlə -

üzü qırışmış,

saçları qurumuş,

dişləri çürümüş,

kədərli arvad şəklində...

xatirələr...

11.11.14

Yolasalma

Gecdi taa... durum gedim,

Bayır zülmət, dalan dar!

Qəribəm...

Yalan dedim -

Məni də gözləyən var.

Bağlanacaq bu saat,

Qapıları türmənin.

Şalını çiyninə at,

Zindana ötür məni.

17.06.15

Vaqif BƏHMƏNLİ

525-ci qəzet.- 2015.- 17 oktyabr.- S.28-29