Şərq Əməkdaşlığı fotoalbomunun təqdimatı keçirilib

Muzey Mərkəzində “Ailə albomu” Şərq Əməkdaşlığı fotoalbomunun təqdimatı olub.

Azərbaycan Fotoqraflar Birliyinin (AFB) sədri Mirnaib Həsənoğlu çıxış edərək bildirib ki, fotoalbom 30 ay davam etmiş “Say Cheese” layihəsinin yekunu olaraq çapdan çıxıb. Avropa Birliyinin “Mədəniyyət” layihəsi çərçivəsində maliyyələşdirilən “Say Cheese” layihəsi Şərq Əməkdaşlığı ölkələrinin müsbət imicinin formalaşması məqsədi daşıyır.

Fotoalbomda Şərq Əməkdaşlığı ölkələrindən bəhs edən fotolar yer alıb. Şəkillər beynəlxalq fotoplenar zamanı çəkilib. Azərbaycandan 8 fotoqraf bu ölkələrdə olub. Azərbaycan Fotoqraflar Birliyi isə Şərq Əməkdaşlığı ölkələrindən doqquz fotoqrafı qəbul edib və ölkəmizin görməli və tarixi yerlərində fotoplenar təşkil olunub.

Fotoalbomda Şərq Əməkdaşlığı ölkələrindən - Azərbaycan, Gürcüstan, Ukrayna, Belarus, Ermənistan və Moldovadan 50 fotoqrafın işi toplanıb. Bu ölkələrin müsbət imicinin formalaşması məqsədini daşıyan fotolarda təbiət mənzərələri, tarixi abidələri, insanların portretləri və s. əks olunub.

Mərasimdə Gürcüstan Fotoqraflar Assosiasiyasının sədri Kaxa Pxakadze deyib ki, həmkarlarımla bu möhtəşəm albomu təqdim etməkdən məmnunam. Layihə müddətində fotoqraflar arasında dostluq əlaqələrinin yarandığını vurğulayan K.Pxakadze gələcək layihələrdə daha maraqlı işlər təqdim edəcəklərini söyləyib.

“İrs” jurnalının baş redaktoru Musa Mərcanlı albomda maddi-mədəni irslə bağlı fotoları xüsusi qeyd edərək fotoqrafların bu abidələrə eyni prizmadan yanaşdığını deyib. AFB ilə bir neçə layihələr həyata keçirdiklərini vurğulayaraq natiq fotoalbomda yer alan Azərbaycanla bağlı fotoları jurnalda dərc etməyə hazır olduqlarını söyləyib.

Fotoalbomun ən yaxşı bələdçi olduğunu söyləyən Moldovanın Azərbaycandakı müvəqqəti işlər vəkili Georgi Botan deyib ki, bu nəşrlə tanış olan hər bir insan iştirakçı ölkəni daha yaxından tanımaq imkanı əldə edəcək.

Sonra Azərbaycandan layihəyə qatılan iştirakçılara sertifikatlar təqdim edilib.

S.ABDULLAYEVA

525-ci qəzet.- 2015.- 17 oktyabr.- S.17.