Teatr Xadimləri İttifaqında Ruslan Həsənlinin 70 illiyi qeyd edilib

Teatr Xadimləri İttifaqında kukla sənətinin istedadlı nümayəndəsi Ruslan Həsənlinin anadan olmasının 70 illiyinə həsr olunmuş anım günü keçirilib.

Teatr Xadimləri İttifaqının idarə heyətinin sədri, Xalq artisti Azərpaşa Nemət kukla ustası haqqında məlumat verib. Bildirib ki, yüzdən çox irili-xırdalı kukla obrazı yaradan Ruslan Həsənli Azərbaycan Dövlət Kukla Teatrında yüksək dərəcəli aktyor və rejissor köməkçisi kimi çalışıb. Uşaqlığında Xalq artistləri - Süleyman Ələsgərov, Lütfü Məmmədbəyovun təşkil etdikləri xalq teatrlarında, gənclik illərində görkəmli aktyor, Xalq artisti Adil İsgəndərovun "kinoaktyor" kursunda sənətin sirlərini öyrənən R.Həsənli sonralar Bakı, Naxçıvan və Sumqayıt teatrlarında çalışıb, gənc aktyorların yetişməsinə öz töhfələrini verib.

Xalq artistləri - Hacı İsmayılov, Cəfər Namiq Kamal, əməkdar artist Rəhman Rəhmanov və başqaları onun teatrın tərkibində dəfələrlə - Yəmən, Hindistan, Rusiya, Gürcüstan, Özbəkistan və digər xarici dövlətlərdə ölkəmizi uğurla təmsil etdiyini söyləyiblər.

Çıxış edənlər aktyorun radio tamaşalarda, televiziya verilişlərində yaddaqalan obrazlar yaratdığını, uşaqların və böyüklərin sevimlisinə çevrildiyini bildiriblər. Onun birbaşa iştirak etdiyi "Retro", "Sehrli xalça", "Pəncərəmə ay qonub" televiziya tamaşaları, "Göy qurşağı", "Tumurcuq", "Bəbə", "Ağ atlı oğlan" və digər radio tamaşalarda yaratdığı unudulmaz obrazların indi də xatırlandığını vurğulayıblar.

Sənətinin yetkin dövründə - 67 yaşında dünyasını dəyişən aktyorun xatirələrdə əbədi yaşayacağı bildirilib.

Tədbirdə çıxış edən Çingiz Ələsgərli yaxın günlərdə onun yaradıcılığı haqqında yazdığı "Kuklaçının nağılı" kitabının işıq üzü görəcəyini söyləyib və burada Ruslan Həsənlinin yaratdığı obrazlara geniş yer verildiyini deyib.

Aktyor Vahid Əliyev vaxtilə R.Həsənlinin oynadığı tamaşalardan fraqmentlər ifa edib.

Sonda aktyorun oğlu Araz Həsənli atasının xatirəsinə göstərilən hörmət və ehtirama görə tədbirin təşkilatçılarına və iştirakçılarına minnətdarlığını bildirib.

S.ABDULLAYEVA

525.c- qəzet.- 2015.- 21 oktyabr.- S.7.