Özbəkistan mediasında Azərbaycanla bağlı ən yaxşı məqalə müəllifləri mükafatlandırılıb

Azərbaycanın Özbəkistandakı səfirliyi və bu qurumun nəzdindəki Heydər Əliyev adına Azərbaycan Mədəniyyət Mərkəzi (AMM) və Özbəkistan-Azərbaycan Dostluq Cəmiyyətinin Azərbaycanın müstəqillik günü münasibətilə elan etdiyi "Özbəkistan KİV-lərində Azərbaycan haqqında ən yaxşı məqalə" müsabiqəsinin qaliblərinin mükafatlandırılması mərasimi olub.

Əvvəlcə mərasim iştirakçıları ulu öndər Heydər Əliyevin AMM-nin qarşısındakı abidəsi önünə əklil qoyublar.

Salonda ulu öndər Heydər Əliyevin həyat və fəaliyyəti, Azərbaycan Prezidenti İlham Əliyevin rəhbərliyi ilə ölkəmizin iqtisadi inkişafı ilə bağlı nəşrlər, Viktor Andriyanov və Hüseynbala Mirələmovun "Görkəmli adamların həyatı" seriyasından özbək və Azərbaycan dillərində çap olunan "Heydər Əliyev" kitabı, Heydər Əliyev Fondunun "Qarabağ həqiqətləri" seriyasından rus və ingilis dillərində nəşrləri, Azərbaycanın tarixi və mədəniyyətinə dair əsərlər və milli suvenirlərimiz nümayiş etdirilib.

Mərasimdə çıxış edən Azərbaycanın Özbəkistandakı səfiri Hüseyn Quliyev bildirib ki, müsabiqə "Azərbaycan iqtisadiyyatı", "Azərbaycanda turizm" və "Azərbaycan ədəbiyyatı" nominasiyaları üzrə keçirilib və bu mövzularda ölkə mətbuatında bir çox məqalə dərc olunub.

Səfir deyib ki, müsabiqənin keçirilməsindən əsas məqsəd qardaş Özbəkistanın KİV-lərində Azərbaycan haqqında daha çox informasiya verilməsi və ölkəmizin təbliğ olunmasıdır.

Sonra H.Quliyev səfirliyin diplomu və pul mükafatlarını qalib jurnalistlərə təqdim edib, onlara daha böyük yaradıcılıq uğurları arzulayıb.

Bu nominasiyalarda prdrobno.uz portalının müxbiri Andrey Teşaev, sharh.uz saytının əməkdaşı Şərafətdin Tulaqanov və uchildiz.uz portalının müxbiri Dilbar Turqanova birinci, kultura.uz mədəniyyət saytının əməkdaşı Rimma Sabircanova, silkway.uz portalının müxbiri Sergey Savçuk Kurbanov, "Kitob dunyasi" qəzetinin baş redaktoru Xasiyyət Rüstəmova ikinci yerlərə layiq görülüblər. Uchildiz.uz portalının əməkdaşı Tulkin Eşbek "Azərbaycanda turizm" nominasiyası üzrə üçüncü yeri tutub.

Hüseyn Quliyev şair və tərcüməçi Usman Kuçkara Azərbaycan yazıçısı Yunus Oğuzun "Şah arvadı və cadugər" kitabını, jurnalist Rüstəm Cabbarova isə "Azərbaycan yazıçılarının hekayələri" toplusunu özbək dilinə tərcümə etdiklərinə görə "Ən yaxşı tərcümə" nominasiyasında diplom və pul mükafatlarını təqdim edib.

Jurnalistlər çıxışlarında bildiriblər ki, belə tədbirlər Azərbaycan ilə Özbəkistan arasında əməkdaşlığın daha da inkişafına və dərinləşdirilməsinə xidmət edir.

Mərasim Özbəkistan incəsənət ustalarının konserti və ziyafətlə davam etdirilib.

S.ABDULLAYEVA

525.ci- qəzet.- 2015.- 21 oktyabr.- S.7.