"Ziyalı ünsiyyəti"ndə bu dəfə Hüseyn Cavid anılıb

"Aydınlığa doğru" milli-mənəvi dəyərlərin qorunması İctimai Birliyi ənənəvi "Ziyalı ünsiyyəti" layihəsi çərçivəsində növbəti görüşü XX əsr Azərbaycan ədəbiyyatının klassiki Hüseyn Cavidin 133-cü ildönümünə həsr edilib.

Tədbiri giriş sözü ilə açan birlik sədri Solmaz Əmirli qonaqları salamlayaraq davamlı layihə olan "Ziyalı ünsiyyəti"nin yeni mövsümdə ilk görüşünün dahi şairə həsr edilməsinin sevindirici hal olduğunu söyləyib: "Şairin qızı Turan xanımı yaxından tanıyıram, dəfələrlə ondan müsahibə almışam. Həmişə tünd rəngli eynəkdə olan Turan xanım gözlərində olan ailə faciəsini, kədəri sanki bununla gizləməyə çalışırdı. İnanıram ki, burda iştirak edən gənclərimiz Cavid irsini daha dərindən öyrənəcək. Allah millətimizin cövhərini elə yaradıb ki, yeni cavidlər yetişəcək".

Hüseyn Cavidin nəşinin Sibirdən Azərbaycana gətirilməsində böyük xidməti olan, ömrünün 40 ilini Cavid irsinin öyrənilməsinə sərf etmiş daxili xidmət polkovniki Həmid Cəfərovun şəxsi arxivindəki videolentlər əsasında "Aydınlığa doğru"nun əməkdaşı, telejurnalist Günel Mönsümovanın təşəbbüsü və rəhbərliyi ilə hazırlanmış qısa film nümayişindən sonra Həmid Cəfərov çıxış edib. H. Cəfərov Ümummilli lider Heydər Əliyevin 12 oktyabr 1982-ci il qərarından sonra polkovnik Telman Əliyev və o zaman SSRİ-nin ən cavan deputatı olan Zakir Nəsirovla birlikdə qürbətdə 59 yaşında dünyasını dəyişib 59 nömrəli qəbirdə məhbus kimi dəfn olunan şairin nəşini vətənə gətirmək üçün getdikləri Sibir səfərindən ətraflı söz açıb. Filologiya üzrə fəlsəfə doktoru Siracəddin Haci Cavid kimi ürəyi milli təəssübkeşlik hissi ilə döyünən minlərlə Azərbaycan oğlunun Sovet imperiyasının maraqlarına qurban getdiyini bildirib.

Fəlsəfə elmləri doktoru, professor Rəfiqə Əzimova "planetar təsəvvürə malik filosof" olan Cavidin irsinin gənc nəslə ötürülməsinin çox önəmli olduğunu vurğulayıb.

Fəlsəfə üzrə fəlsəfə doktoru Leyla Nəzirzadə Cavidi bütün bəşəriyyətə insanlıq dərsi verən bir filosof kimi səciyyələndirib.

"Space 104 FM" radiosunun direktoru Əhməd Əsgər, "Kaspiy" qəzetinin müxbiri, əməkdar jurnalist Qalina Mikeladze, Telman Əliyev, Zakir Nəsirov çıxışlarında Cavid irsinin əhəmiyyətindən söhbət açıb.

Tədbirdə həmçinin Hüseyn Cavid muzeyinin elmi katibi Natiq Mürsəlov, Müdafiə Nazirliyi Məhkəmə Tibb Ekspertiza Mərkəzinin həkim-eksperti Səfərbəy Səfərbəyov, yazıçı Mənzər Nigarlı, fəlsəfə üzrə fəlsəfə doktoru İradə Zərqanayeva, sənətşünaslıq doktoru Sevil Fərhadova, gənc rejissor Elçin Elxanlı, ali məktəb tələbələri, müəllimlər və şagirdlər iştirak edib.

S.MÜRVƏTQIZI

525.c- qəzet.- 2015.- 21 oktyabr.- S.7.