"Paytaxtdan bölgələrə" layihəsinə start verilib

Mədəniyyət və Turizm Nazirliyi tərəfindən "Paytaxtdan bölgələrə" adlı Azərbaycan mədəniyyətinin və incəsənətinin bütün sahələrini əhatə edən yeni bir layihənin həyata keçirilməsinə başlanılıb.

Layihənin əsas məqsədi bölgələrdə yaşayan insanları müasir mədəni proseslərə cəlb etmək, paytaxtın aparıcı muzey və qalereyalarında qorunub saxlanılan mədəniyyət incilərinin bölgələrdə nümayişini, görkəmli sənətkarların və kollektivlərin çıxışlarını təşkil etmək, bölgələrin mədəni həyatını canlandırmaqdır.

İlk tədbir kimi 2015-ci ildə "Azərbaycanın ədəbiyyat paytaxtı" elan edilmiş Şamaxı şəhərində "Milli İncəsənət Muzeyinin kolleksiyasından Azərbaycanın ədəbiyyat korifeyləri" adlı sərgi təşkil ediləcək. Sərgidə görkəmli Azərbaycan rəssamları Səttar Bəhlulzadə, Tahir Salahov, Mikayıl Abdullayev, Nəcəfqulu, Oqtay Sadıxzadə, Qəzənfər Xalıqov və Sadıq Şərifzadə tərəfindən fırçaya alınmış xalqımızın dahi şair və yazıçıları Nizami, Xaqani, Fizuli, Nəsimi, Molla Pənah Vaqif, M.F.Axundzadə, Mirzə Şəfi Vazeh, Natəvan, Mirzə Ələkbər Sabirin portretləri nümayiş olunacaq.

Sərginin açılış mərasimi oktyabrın 29-da Şamaxı şəhərində Heydər Əliyev Mərkəzində keçiriləcək. Tədbirdə Mədəniyyət və Turizm Nazirliyinin, Şamaxı rayon İcra Hakimiyyətinin, yaradıcı ittifaqların rəhbərləri iştirak edəcəklər.

S.ABDULLAYEVA

525-ci qəzet.- 2015.- 28 oktyabr.- S.7.