Ələddin Əzimlinin təqdimatında “Sən”

Bugünlərdə Ələddin Əzimlinin “Sən” şeirlər kitabı işıq üzü görüb.

Kitaba tanınmış ədəbiyyatşünas Muxtar Kazımoğlu “Yolların pambıq olsun” adlı ön söz yazıb: “Ələddin xəbislikdən, xudbinlikdən... uzaq adamdır. Ələddini xatırlayanda tələbə yoldaşlarımızın hərdən onun şeirlərindən (ən çox da “Yarımçıq yuxular”dan) misralar, bəndlər deməsi Ələddinin özü kimi şeirlərinin də dost-tanış qəlbində iz buraxmasından xəbər verir. İndi bu şeirləri oxuduqca Ələddini bir az da yaxından tanıyıb duymaq olur.

Başqaları sevgisinin yerə-göyə sığmadığından danışan yerdə Ələddin “neyləyim, Məcnunluq gəlmir əlimdən” deyir. Başqaları bəşər övladı qarşısında dağı dağ üstə qoymaqdan dəm vuran yerdə Ələddin sənə, mənə böyük ürək açıqlığı ilə “Yolların pambıq olsun” deyir.

Əlbəttə, Ələddinin təvazökarlığında nisgilli bir cəhət də var. Nisgil ondan ibarətdir ki, şairlik iddiasında olmayan və “böyük-böyük şairlər varsa, bizə nə hacət” deyib bir qırağa çəkilən Ələddin şövqdən, həvəsdən düşə-düşə şeir yazmaqla vidalaşıb. Amma orasını nəzərə almayıb ki, şeir yazmaq hələ şairlik azarının candan çəkilib getməsi demək deyil. Sən demə, şair Ələddinin üstündən qələm çəkmək əvəzinə, ona qol-qanad vermək lazımmış. Qol-qanadı Ələddin adlı o şairə başqa birisi yox, ev-eşik qayğılarına başı qarışan Ələddinin özü verməliymiş və qətiyyətlə deməliymiş ki, canım-gözüm, böyük-böyük şairlərdən qorxma, yaz! Yazdığın Sözdürsə, oxuyanı tapılacaq!...”

Şairin şeirlərində sevgi, ayrılıq, hüzn motivləri üstünlük təşkil edir:

Sənə çatası,

Ürəyini yumşaldası səsimi

Küləklər apardı.

Daşa, divara,

Yarpaqlara çırpa-çırpa...

Yaxud da:

Alça çiçəkləridir əllərin,

Ağappaq nəğmə oxuyur mənə.

Dünyanın təmizliyindən,

Tənhalığın uzunluğundan,

Ümidli günlərimizdən...

Ə. Əzimlinin poeziyasında insani keyfiyyətlərin təbliği ön plana çəkilir:

Sözü daşdan keçən

Kişilər vardı.

Külək əsdi,

Yağış yağdı

Day bilmirəm nələr oldu?

Zaman bu kişiləri apardı...

Kitabdakı şeirlər “Yarımçıq yuxular”, “Sən” və “Ölçülü-biçili sətirlər” bölümündə təqdim edilib.

525-ci qəzet.- 2015.- 31 oktyabr.- S17