Yeni teatr mövsümü Gəncədən başladı

Azərbaycan milli peşəkar teatrının 143-cü mövsümünün açılışı Gəncə şəhərində olub. Bu münasibətlə şəhərdə teatr və incəsənət bayramı da keçirilib.

Mədəniyyət və turizm naziri Əbülfəs Qarayevin də qatıldığı mərasimdə tanınmış teatr və incəsənət xadimləri, respublika teatrlarının rəhbərləri, şəhər içtimaiyyətinin nümayəndələri iştirak ediblər.

Tədbir iştirakçıları şəhərin sənət məhəlləsi kimi tanınan Cavad xan küçəsi boyunca təşkil olunan sənət və səhnə bayramına qatılıblar. Burada şəhərin peşəkar və özfəaliyyət musiqi kollektivləri rəngarəng proqramla çıxış ediblər, uşaq yaradıcılıq mərkəzlərinin yetirmələri öz əl işlərini nümayiş etdiriblər, həmçinin Gəncə teatrlarının aktyorları, eləcə də məktəblərin dram dərnəklərinin uşaqları müxtəlif tamaşalardan səhnələr göstəriblər.

Qonaqlar həmçinin Məhsəti Gəncəvi adına İncəsənət Mərkəzini ziyarət edərək, Gəncə rəssamlarının əsərlərindən ibarət sərgi ilə tanış olublar.

"Gəncədə yeni teatr mövsümünün açılışı yaddaqalan tədbirlərlə bol idi. Ən maraqlısı odur ki, Gəncənin istər peşəkar, istər də həvəskar sənətsevərləri, xüsusən uşaq yaradıcılıq kollektivləri, məktəblilər, onların müəllimləri çox böyük sevgi ilə rəngarəng yaradıcılıq nümunələri göstərdilər. Bu da onu sübut edir ki, burda xüsusən gənc nəslin teatra marağı çoxdur və bu şəhərin teatr mühiti yüksəkdədir"-deyə, Ə. Qarayev bildirib.

Teatr bayramı ərəfəsində Gəncə Dövlət Kukla Teatrının binasının əsaslı təmiri də yekunlaşıb. Qonaqlar onun açılışında da iştirak ediblər. 19-cu əsrdə tikilmiş məbəddə yerləşən bu teatrın tamaşa salonu genişləndirilib, seyrçi yerlərinin sayı 135-dən 185-ə çatdırılıb.

Axşam isə C.Cabbarlı adına Gəncə Dövlət Dram Teatrında Cəlil Məmmədquluzadənin "Dəli yığıncağı" tamaşasının premyerası ilə Azərbaycanın yeni teatr mövsümünə start verilib.

Zakir MURADOV

Gəncə

525-ci qəzet.- 2015.- 15 sentyabr.- S.7.