Üzeyir Hacıbəyli adına VII Beynəlxalq Musiqi Festivalı davam edir

Bəstəkarlar İttifaqında Üzeyir Hacıbəyli adına VII Beynəlxalq Musiqi Festivalı çərçivəsində görkəmli bəstəkarın 130 illiyinə həsr edilmiş elmi konfrans keçirilib.

Azərbaycan Bəstəkarlar İttifaqının sədri, Xalq artisti Firəngiz Əlizadə qonaqları salamlayaraq festival çərçivəsində keçirilən və görkəmli bəstəkara həsr edilmiş tədbirlərin əhəmiyyətindən danışıb.

Xalq artisti bəstəkarın yubileyinin qeyd olunması, onun xatirəsinə həsr olunmuş mərasimlərin, konsertlərin və festivalların keçirilməsini respublikamızın musiqi həyatında əlamətdar hadisə kimi qiymətləndirib.

Bəstəkarın həyat yolu və yaradıcılığından söz açan Firəngiz Əlizadə diqqətə çatdırıb ki, ustad sənətkarlarımızın xatirəsi Bəstəkarlar İttifaqında daim anılır və müxtəlif xarakterli tədbirlər, konsertlər, konfranslar və anım mərasimləri ilə qeyd olunur.

Elmi konfransda Azərbaycan Bəstəkarlar İttifaqının katibi, əməkdar incəsənət xadimi, professor Zemfira Qafarova "Üzeyir Hacıbəyli və Azərbaycan Bəstəkarlar İttifaqı" mövzusunda məruzə ilə çıxış edib. Zemfira Qafarova görkəmli bəstəkarın Bəstəkarlar İttifaqındakı böyük fəaliyyətindən, dünya konservatoriya praktikasında ilk dəfə olaraq şərq kafedrasının banisi olmasından və ilk dəfə olaraq notlu orkestr yaratmasından söz açıb.

Daha sonra professorlar Rəna Məmmədova, Cəmilə Həsənova, sənətşünaslıq üzrə fəlsəfə doktoru, dosent Ülkər Talıbzadə və bəstəkar-musiqişünas Nərgiz Şəfiyeva Üzeyir Hacıbəyliyə həsr olunmuş müxtəlif məruzələrlə çıxış ediblər.

Tədbirdə, həmçinin AMEA-nın müxbir üzvi, sənətşünaslıq elmləri doktoru, professor Zemfira Səfərovanın müəllifi olduğu və macar dilində nəşr edilən "Üzeyir Hacıbəyli və onun görkəmli sələfləri" kitabının təqdimatı olub.

Tədbirlərdən biri də Beynəlxalq Muğam Mərkəzində Rusiya Akademik Böyük Teatrın Brass-kvintetinin konsert proqramıdır.

Konsertdə qonaqlar Bakıda ilk dəfə olduqlarını bildirib və şəhərimiz haqqında xoş təəssüratlarını bölüşüblər. Kollektiv ötən əsrin 80-ci illərində yaranıb. Moskva Böyük Teatr Orkestrinin tərkibində fəaliyyət göstərən qrupa Aleksey Kornilyev (truba, flüqelqorn), Yevgeni Quryev (truba), Aleksandr Jbanov (turba), Aleksey Rayev (valtorna) və Erkin Yusupov (trombo) daxildir. Kollektiv son dövrlərdə bir çox konsert və festivalların iştirakçısı olublar.

Görkəmli qərb bəstəkarlarının əsərlərinin səsləndiyi konsert maraqla qarşılanıb.

Q.Qarayev adına Mərkəzi İncəsənət Məktəbində də VII Beynəlxalq Musiqi Festivalı çərçivəsində Avropa Musiqi Akademiyasının prezidenti Paolo Petrorelli, Estoniyanın tanınmış skripka ustası Mina Yarvi və İtaliyan pianoçu Mikele Kampanellanın iştirakı ilə "ustad dərsi" və "açıq dərs" keçirilib. VII Beynəlxalq Musiqi Festivalı çərçivəsində reallaşan tədbirdə mədəniyyətin ölkələr arasında sülhə xidmət etdiyini söyləyən xarici qonaqlar Bakıda ilk dəfə olduqlarını bildirib və şəhərimiz haqqında xoş təəssüratlarını bölüşüblər.

Sonda Q.Qarayev adına Mərkəzi İncəsənət Məktəbinin və T.Quliyev adına 12 nömrəli onbirillik musiqi məktəbinin şagirdlərinin ifasında skripka və pianoda ifaları dinlənilib. Konsertdə Baxın, Mendelsonun, Paqanininin və digər qərb bəstəkarlarının əsərləri səsləndirilib.

S.ABDULLAYEVA

525-ci qəzet.- 2015.- 23 sentyabr.- S.7.