“Jurnalistikaya məşhurlaşmaq,
şöhrət qazanmaq xətrinə gəlməmişəm”
Tanınmış
jurnalist İmran Bədirxanlının 50 yaşı tamam olur.
1991-ci ildə Bakı Dövlət Universitetinin Jurnalistika
fakültəsini bitirən İmran Bədirxanlı “Səhər”
(parlament müxbiri), “Zaman” (baş redaktorun müavini), “Həftə”
(redaktor), “Gün səhər” (şöbə müdiri) qəzetlərində,
STV (xəbər redaktoru) telekanalında
çalışıb.
2005-ci ildən İctimai Teleradionun əməkdaşı
olan İmran Bədirxanlı əvvəl radioda müxtəlif
səpkili verilişlərə müəlliflik və
aparıcılıq, telekanalın “TV-1” jurnalına redaktorluq
edib. Hazırda “Carçı-Film” Yaradıcılıq
Birliyinin böyük redaktorudur.
–
İmran müəllim, bir də gözünüzü
açdınız ki, yaş 50-ni haqlayıb... Ya bəlkə
səhv edirik: ömür heç də bir göz qırpımında
keçmir...
–
Haqlayıb nədir, lap basmarlayıb. Hər göz
qırpımı bir andır, ömür də anlardan ibarətdir.
Ömür yolumuz isə o anların düzümüdür. Həmin
yolu hərə bir cür qət edir. Biri göyün yeddinci
qatında, super avialaynerin VİP salonunda, digəri yerdə,
bahalı CİP-in arxa oturacağında,
üçüncü isə daşlı-kəsəkli kənd
yolunda ləngər vura-vura yeriyən yük
maşınının “podnojkasında” gedir. Amma əsas məsələ
sonuncu dayanacağa o sərnişinlərdən hansının
necə və nə ilə çatmasıdır.
– 50
yaşda bu sual yersiz görünməz yəqin: yaşın nə
fərqi var?
–
Kiminçünsə var, kiminçünsə yoxdur. Mənim
fikrimcə, insanın bir xoşbəxtliyi də öz
yaşını yaşamağı bacarmasıdır. Siz elə
bilirsiz hamı öz yaşını hiss edir? Yox, elə
deyil. Ətrafımızda ömrünün
çağlarını ilin fəsilləri kimi dəyişik
salan, özünü yanlış ünvanlarda axtara-axtara son
mənzilinə əliboş gedən o qədər insan var ki.
Bir qədər
dərindən düşünəndə görərik ki, həyat
elə hər yaşda maraqlıdır. O məşhur
mahnıda deyildiyi kimi, sadəcə biz onu
anlayıb-duymağı, özümüz də bir zərrə
gözəllik yaratmağı bacarmalıyıq...
–
Xaçmazın Həsənqala kəndində doğulub
boya-başa çatmış İmranı Bakıya,
universitetin Jurnalistika fakültəsinə, media aləminə
nələr çəkib gətirdi?
– Hər
halda jurnalistikaya səhranın bəyaz günəşinin
cazibəsinə aldanıb məşhurlaşmaq, şöhrət
qazanmaq xətrinə gəlməmişəm. Necə deyim ki,
şablon çıxmasın? Məni jurnalistikaya
görüb-duyduqlarımı qələmə almaq istəyim,
bir də yuxularımda mənə bu yolu göstərən O
Gözəgörünməz qüvvə gətirib! Nə mənə
qədər, nə də məndən sonra kəndimizdə bu
peşənin qulpundan yapışan olmayıb, yoxdur. Amma
çox istərdim ki, açdığım bu
cığıra daha bir həsənqalalı
düşsün.
Rayon qəzetində
ilk yazım çap olunanda altıncı sinifdə oxuyurdum, on
üç yaşım vardı. Həmin gün o yeniyetmə
İmran mütləq jurnalist olacağına qərar verdi.
İki il əmək stajı tələb olunan Jurnalistika
fakültəsinə əsgərlikdən sonra, iyirmi bir
yaşımda daxil olmuşam. Tofiq Rüstəmov, Nurəddin
Babayev, Qulu Xəlilov, Nəsir İmanquliyev, Famil Mehdi, Nəriman
Zeynalov (qəbirləri nurla dolsun), mətbuatımızın
canlı korifeyi Şirməmməd Hüseynovdan
jurnalistikanın nəzəriyyəsini, səksəninci illərin
dövri mətbuatında imzalarını intizarla gözlədiyimiz
Rafael Nağıyev, Şakir Yaqubov, Adil Qaçayoğlu, Yusif
İsmayıl, Elman Qədirov, Cavid Xaspolad, Rusvat Bayramovdan isə
necə yazmağı öyrənirdik.
Qismət
elə gətirdi ki, ilk iş yerim “Səhər” gündəlik
informasiya qəzeti, ilk redaktorum da Şakir Yaqubov oldu. Bu ustad sənətkarın
yetirməsi olmağımla fəxr edirəm.
– Və
peşman deyilsiniz jurnalistikanı özünüzə peşə
seçməkdə...
– Qətiyyən!
Eşitdiyini, gördüyünü beyindən, ürəkdən
keçirib mövzuya, janra uyğun üslubda, ürəyəyatımlı
və yaddaqalan formada qələmə alıb oxucuya, dinləyiciyə,
tamaşaçıya çatdırmaq! Bu yaradıcı proses
mənimçün çox maraqlıdır. Həmin proses
müəllifdən təkcə savad və
dünyagörüşü yox, həm də istedad tələb
edir.
Məhz
yaradıcılıq prizmasından yanaşsaq, şairlə,
yazıçı ilə müqayisədə jurnalistə daha
böyük bacarıq və istedad lazımdır. Müqayisəmə
görə yazıçı və şair dostlarım məndən
inciməsinlər, onlar üçün söz
obrazlaşdırılan, duyğusallaşdırılan, təşbeh,
mübaliğə, bənzətmə, istiarə və sairəylə
süslənən, epik, poetik janrlarda İlahi kəlmədir.
Filoloq
üçün söz elmi araşdırma sahəsidir.
Biz
jurnalistlər üçün isə söz, bütün
bunlardan bəhrələnməklə yanaşı, həm də
silahdır. Konkret obyektə, yaxud subyektə tuşlanan silah!
Əgər bu silah professional atıcının əlindədirsə,
onda güllə düz hədəfə dəyəcək.
Yox, silahı həvəskara, diletanta etibar ediblərsə, bu
halda bütün darağı boşaltsa da, güllələr
hədəfdən yan keçəcək. Bax, mən bu prosesdən
– qələmi, mikrofonu nişangaha sərrast tuşlamaqdan
zövq alıram. Ötən iyirmi üç ildə buna nə
dərəcədə nail olmuşam, bunu artıq oxucum, dinləyicim,
tamaşaçım deyə bilər.
– Siz jurnalistikanın
müxtəlif sahələrində
çalışmışınız – qəzet, jurnal, radio əməkdaşı
olmusunuz, indi də televiziyadasınız. Hansı daha önəmli
gəlir sizə, hansı sahə daha maraqlıdır?
–
Hamısı. Gördüyüm işin mahiyyəti eyni,
xarakteri fərqli olsa da, hamısında həvəslə,
zövqlə çalışmışam. Üst-üstə
on ilə yaxın gündəlik qəzetlərdə işləmişəm.
Sütül reportyorun peşəkar qələm sahibinə
çevrilməsi, professionallaşması üçün qəzet
mərhələsini çox vacib sayıram. Xüsusilə də
fəaliyyətin başlanğıcında. Hesab edirəm ki,
jurnalistin peşəkar vərdişləri (istər qəzet
və jurnalda, istərsə də radio və televiziyada)
yaza-yaza formalaşmalıdır. Leksikonun zənginləşməsi,
fərdi üslubun, təsvir-təhkiyə vərdişinin, ələlxüsus
da müşahidə, analitik düşüncə qabiliyyətinin
yaranıb-formalaşması məhz qəzetdə baş verir.
Bu, aksiomdur.
Operativliyinə
görə radio və televiziya qəzeti üstələsə
də, redaktədən və korrektədən keçən məqaləmin
səhifəyə yerləşdirilməsindən
aldığım zövqü heç də
reportajımın, verilişimin efirə buraxılmasından
keçirdiyim sevinc hissindən az saymıram.
Bu yay
İctimai Teleradionun on yaşı, bu yeni media institutunda
jurnalist fəaliyyətimin on ili tamam olacaq. Radioda veriliş
aparıcısı, jurnal redaktorluğundan sonra yeddi ildir əcnəbi
filmlərin tərcüməsi və redaktəsi ilə məşğulam.
Kinoya həvəsim hələ tələbəlik illərindən
başlayıb. O vaxtlar Tenqiz Abuladzenin, Andrey Tarkovskinin, Eldar
Ryazanovun filmlərinə resenziyalar yazırdım. Yəni
kinematoqrafiyadan azdan-çoxdan xəbərim vardı. Amma
dublyaj tamam başqa aləmdir. Xarici filmin görüntüdən,
səsdən tərcümə edilməsi isə əlahiddə
sənətdir. Bu iş tərcüməçidən həm
də aktyorluq bacarığı tələb edir. Filmdə bəhs
edilən hadisənin iştirakçısına çevrilmədən,
əsərin qəhrəmanları ilə tərəf-müqabil
olmadan o dialoqları çevirmək, onları ana dilimizdə
səsləndirmək mümkün deyil. Sən də gərək
o qəhrəmanlarla birgə ölüb-diriləsən...
– 2005-ci
ildə “Gün səhər” qəzetində
çalışarkən Hacı Məmmədov qrupunun cinayətlərindən
bəhs edən “Qan çanağı – Qarabulaq”
araşdırma silsiləsinə görə “Media
açarı” mükafatı almısınız. Bu tipli
araşdırma yazmağa yenə həvəsiniz varmı?
– Həvəsim
də var, enerjim də, istəyim də! Təki həmin
reportaja, korrespondensiyaya, araşdırmaya çəkiləcək
əziyyətin, ortaya qoyulacaq yaradıcılıq məhsulunun
layiqincə qiyməti verilsin. Bu sözün hər iki mənasında.
Qərbdə istər yazılı, istərsə də
elektron mediada daha çox dəyərləndirilən, ən
yüksək qonorarla mükafatlandırılan məhz
araşdırma layihələridir, jurnalist təhqiqatlarıdır.
Təəssüf ki, bizdə bu tip araşdırmalara sosial
sifariş yoxdur. Bu, artıq medianın deyil, cəmiyyətin
problemidir...
– Son 10
ildə internet jurnalistikası da həyatımızın bir
parçasına çevrilib. Bəziləri belə fikirləşir
ki, internet mediası qəzetlərin belini qırdı...
– Yəni
o bəziləri düşünür ki, qəzetin beli bu qədər
incədir? Mən elə düşünmürəm. Qəzet
jurnalistikanın əlifbasının yarandığı bir
media məbədidir. Həm də ən qədim institutdur!
Ən azı bu səbəbdən çap məhsulunun tamamilə
aradan çıxması mümkün deyil. Düzdür,
iyirmi-otuz il əvvəlki kimi bu gün qəzet köşklərinin
qarşısında növbələr yoxdur, müasir qəzetləri
də qırx, otuz, iyirmi, hətta on beş əvvəlki mətbu
nəşrlərlə müqayisə eləmək olmaz.
Böyük əksəriyyətinin informasiyanı, məqaləni
təqdimetmə üsulları bərbad, jurnalistika elminin
qayda-qanunlarından uzaq, dilləri də redaktəsiz,
qüsurlu və pintidir. Bəli, peşəkarlıq
çatmır. Qələminə və şəxsiyyətinə
dərin hörmət bəslədiyim araşdırıcı
alim, jurnalist Vasif Quliyev demiş, indikilərin doxsan faizi divar qəzetləridir.
Elə həmin əksəriyyətin niyə, nə məqsədlə,
hansı oxucu kütləsi üçün nəşr
olunduğu bəlli deyil. Amma sayları az olsa da, oxunan qəzetlər
var. Bunlar o nəşrlərdir ki, redaksiyalarında bir-iki nəfər
professional, peşəsini sevən qəzetçi
çalışır.
İnternet
mediaya gəldikdə, həmin divar qəzetlərindəki
qüsurlar özünü ən kobud şəkildə
göstərir. Fakta, hadisəyə yanaşmada “xaltura” baş
alıb gedir. Amma burada da bir-iki istisna tapmaq olar. Dilimizin
saflığını qoruyan, jurnalistika prinsiplərinə
ciddi riayət olunan azsaylı informasiya portallarından biri, bəlkə
də birincisi “Media forum” saytı idi. Təəssüf ki, indi
onun haqqında keçmiş zamanda danışmağa məcburuq...
–
Bugünkü media aləmində Sizi ən çox narazı
salan nədir? Bəs nələrdən, belə demək
mümkünsə, həzz alırsınız?
– Qəzetlər,
saytlar barədə yuxarıda danışdıq. İcazənizlə,
sualınıza elektron medianın nümunəsində cavab verərdim.
Səhv etmirəmsə, dördüncü kursda oxuyurduq,
Bakıya gəlmiş bir qrup alman jurnalisti fakültəmizin
qonağı idi. Aralarında Almaniyanın ZDF ictimai
telekanalının əməkdaşı da vardı. Ona belə
bir sual verdim ki, siz xəbərlərə, analitik proqramlara
aparıcıları hansı meyarla işə
götürürsüz? Dedi ki, biz həmin proqramların
aparıcılarını ən azı beş il qəzet təcrübəsi
olan müxbirlərin arasından seçirik. Yəni bizdən
fərqli olaraq onlara efirdə “betonsifət” modellər, “qar
kraliçaları” yox, hadisənin içini
tamaşaçıya çatdırmağı bacaran təcrübəli
jurnalist lazımdır. Bu zaman həmin teleaparıcı məndən
də qoca, altmış-yetmiş yaşlarında ola bilər.
Uzağa niyə gedək, Türkiyənin nüfuzlu
telekanallarının xəbər aparıcılarına fikir
verin. Əksəriyyəti saç-saqqalı
ağarmış ixtiyar qocalardır. Müasir
tamaşaçı məhz belə insanlara etibar edir,
onların dilindən səslənən xəbərə,
şərhə inanır.
Tok-şouların
aparıcılarından isə danışmağa dəyməz.
Efirdə ağlaşmalı yas mərasimləri düzənləyən,
“palatka toyları”, bayağı mədəni-kütləvi
yubiley tədbirləri təşkil edən, şou əhlinin
yataq otağının rənginə, itinin-pişiyinin
menyusuna qədər ictimai müzakirəyə çıxaran
dırnaqarası telejurnalistlər çoxluq təşkil
edir. Bu millətin zövqünü başqa nə cür
korlamaq olar? Ekrandakı bayağılıq kütləvi
zövqsüzlüyə aparır.
Vallah, ailə
ilə bir yerdə rahat baxa biləcəyimiz proqramlar yenə
Azərbaycan Televiziyasında, “Mədəniyyət”
kanalında, təvazökarlıqdan kənar saymayın, bir də
elə bizim İctimai Televiziyadadır.
...Həzdən
danışsaq, mənimçün birinci yerdə musiqi gəlir.
İstər klassik, istərsə də müasir musiqi olsun,
janr fərqi də yoxdur. Bizim milli musiqimiz olduqca
çoxçalarlı və zəngindir. Üzeyir bəyin,
Fikrət Əmirovun, Cahangir Cahangirovun əsərlərini,
Tofiq Quliyevin, Xəyyam Mirzəzadənin, Elza
İbrahimovanın bəstələrini saatlarla dinləyə
bilərəm. Əcnəbilərdən son zamanlar nədənsə
Şopen, bir də Vivaldi ürəyimə yatır.
– Ata
yurduna, kəndinizə tez-tez getmək imkanı olurmu? Kəndə
gedəndə hansı hissləri keçirirsiniz?
– Şəhərdə olanda kənd üçün, kəndə gedəndə şəhər üçün darıxmaq hissini yəqin çoxları yaşayıb. Amma müəyyən yaş dövründən sonra bu hiss dəyişir, deformasiyaya uğrayır. İnsan yaşlaşdıqca təbii olaraq ilkinə, əzəlinə qayıtmağa can atır. Yəqin bu, Yaradanın canlı xəlq etdiklərinin hamısına verdiyi ümumi bir cəhətdir. Burada yaddaşımızda silinməz izlər buraxmış uşaqlıq çağının xüsusi çəkisi, rolu var...
Üçüncü mikrorayondan Həsənqalaya yüz yetmiş beş kilometrdir. Yəni elə də böyük məsafə deyil, iki saatlıq yoldur. Orta hesabla ayda bir dəfə doğma yurda baş çəkirəm. Son illər hər dəfə o yolu ölçəndə səbrim tükənir, ürəyim uçunur, uça-uça gedirəm. Uçub gedib qonuram yetmiş doqquz yaşlı anam Gülzar xanımın dizinin üstünə. Əvvəlcə damarları palıd köklərinə bənzəyən əllərindən, sonra nurlu çöhrəsindən öpürəm, sonra da uzun-uzadı çeşmə kimi dupduru gözlərinə baxıram. O gözlərin içində özümü tapıram, onda ürəyim yerinə qayıdır, kövrəlirəm, rahatlanıram.
...Atam Qeysəd kişi on iki il əvvəl dünyasını dəyişib. Cəmi altı sinif təhsil görmüş, sovxozda sıravi fəhlə, suçu işləyən kəndli aşıq musiqisini, muğamlarımızı dinləməkdən doymazdı. Musiqiyə sevgim atamdan gəlir, dilə-ədəbiyyata, yazı-pozuya meylim isə anamdan. Kənd kitabxanasında işlədiyi o vaxtlar evə gətirdiyi hekayələr kitablarını acgözlüklə oxuyardım.
– Özünüzə bir yubiley sualı verəsi olsanız, nə soruşardınız İmran Bədirxanlıdan?
– “Mən
kiməm? Hardayam? Hara gedirəm?” Bunlar bir ay əvvəl doxsan
illiyini bütün ölkənin qeyd etdiyi müəllimimiz
Şirməmməd Hüseynovun suallarıdır.
Üzünü biz tələbələrinə tutub deyərdi
ki, hər dəfə il dəyişəndə bu sualları
özünüzə verin, cavablarını tapsanız, deməli,
özünüzü tapacaqsız. Elə bilirsiz yarım əsrin
kürəyini yerə vuran İmran üçün bu suallara
cavab tapmaq asan işdir?..
Ceyhun ABASOV
525-ci qəzet.- 2015.- 17 yanvar.- S.18.