Hacı Seyid Novruz İsmayılovun vəfatından bir il ötür

Aprelin 15-də Qarabağın nüfuzlu seyidlərindən, tanınmış ziyalı, Ağcabədi şəhər Cümə məscidi dini icmasının rəhbəri olmuş Hacı Seyid Novruz İsmayılovun vəfatından bir il keçir.

Seyid Novruz İsmayılov 1950-ci ildə Ağcabədinin hörmətli ağsaqqallarından sayılan Seyid Ağamirin ailəsində dünyaya göz açıb. Doğum günü martın 21-nə təsadüf etdiyindən ona Novruz adı veriblər.

Seyid Novruz ağa 1975-ci ildə Azərbaycan Xalq Təsərrüfatı İnstitutunun İqtisadiyyat fakültəsini bitirib. O, əmək fəaliyyətinə rayon istehlak cəmiyyətində başlayıb, uzun illər burada çalışib. Seyid dindar ailədə tərbiyə aldığı üçün kiçik yaşlarından islama möhkəm tellərlə bağlanıb. Onun atası Seyid Ağamir İsmayılov bir qrup nüfuzlu rayon ağsaqqalı ilə birlikdə Sovet dönəmində uzun illər gübrə anbarına çevrilmiş Ağcabədi şəhər Cümə məscidinin fəaliyyətinin bərpasına nail

olub. Sovet hakimiyyətinin son illərində məscidin fəaliyyətinə icazə verilib. Bu işdə Seyid Novruz İsmayılovun da xidmətləri az olmayıb. Rayon ağsaqqallarının yaxından dəstəyi ilə sözügedən məsciddə müəyyən təmir işləri də aparılıb.

Qafqaz Müsəlmanları İdarəsinin sədri, Şeyxülislam Hacı Allahşükür Paşazadənin xeyir-duası ilə məscid 1989-cu ildən müstəqil olaraq fəaliyyətə başlayıb. Seyid Novruz İsmayılovun təşəbbüsü ilə burada “Qurani-Kərim” kursları təşkil olunub. Məhz həmin kursların fəaliyyəti sayəsində rayonda onlarla gənc dini biliklərə yiyələnib, ali ruhani təhsili almaq imkanı qazanıb. Seyid təhsildə onlara böyük dəstək verib, maddi və mənəvi köməkliklər göstərib. Onun başçılığı ilə Cümə məscidində yenidənqurma tədbirləri həyata keçirilib, əsaslı təmir işləri aparılıb. Bu səbəbdən də o, bölgədə və ətraf rayonlarda əhalinin böyük hörmət və nüfuzunu qazanıb. Hacı Seyid Novruz İsmayılov həmişə dövlətə, dövlətçiliyə sadiq insan olub, həmişə ulu öndər Heydər Əliyevin siyasi kursunu dəstəkləyib, daim insanları ölkə başçısı İlham Əliyevin ətrafında sıx birləşməyə çağırıb.

Xaraktercə cəsarətli, əqidəli insan olan seyid dövlətimizin və islamın düşmənlərinə qarşı qətiyyətli,barışmaz mübarizə aparıb, hər zaman öz sözünü deməyi bacarıb. Seyid Novruz ağanı Dağlıq Qarabağ problemi daim ciddi düşündürüb, onu xalqımızın, bütün azərbaycanlıların böyük dərdi, ağrısı hesab edib. O, problemin cənab Prezident İlham Əliyevin apardığı məqsədyönlü siyasət sayəsində öz həllini tapacağına daim möhkəm əmin olub. Odur ki, öz çıxışlarında lazım gələrsə, Ali Baş Komandanın əmrini bir əsgər kimi yerinə yetirməyə hər an hazır olduğunu dönə-dönə bəyan edib.

Bu gün Seyid Novruz ağa İsmayılovun xatirəsi ağcabədililər tərəfindən hörmətlə anılır, yad olunur. Bölgə sakinləri, ağsaqqallar, dindarlar, gənclər ağanı dərin ehtiramla xatırlayırlar. Bir vaxtlar onunla yaxın təmasda olmuş nüfuzlu rayon sakinləri Kərbəlayı Zülfi Rüstəmov, Hacı Adil Ağayev, Kərbəlayı Seyid Mirqamət İsmayılov, Hacı Yunis Mehdiyev, Kərbəlayı Etibar Azadov, Salman Səfərov və başqaları ağanı hörmətlə xatırlayır, haqqında xoş xatirələrini bölüşürlər.

Qardaşı Seyid Mirqamət onun vaxtsız ölümü ilə barışa bilmir. O, özündən yaşca kiçik olsa da, həmişə ağsaqqal saydığı qardaşını bir an belə unutmur, həmişə onun məsləhətlərinə ehtiyacı olduğunu bildirir.

Hacı Adil Ağayev Hacı Seyid Novruz İsmayılovu fədakar, mübariz insan kimi xatırlayır. O, Ağcabədi Cümə məscidinin ikinci həyatının seyidin adı ilə bağlı olduğunu deyir. Seyidin yaxın dostu, məktəb yoldaşı Kərbəlayı Zülfü isə onu xeyirxah, sədaqətli insan, əqidəli dindar kimi yad edir, “Qurani-Kərim” kurslarının təşkilində, bölgədə ali təhsilli ruhani nəslinin yetişməsində xidmətlərinə xüsusi önəm verir. Kərbəlayı Zülfü Hacı Seyid Novruz İsmayılovun xatirəsinin yaddaşlarda yaşadığını, hər zaman yerinin göründüyünü qeyd edərək, Ulu Tanrıdan ona rəhmət diləyir.

Yəhya PAŞAZADƏ

525-ci qəzet.- 2016.- 9 aprel.- S.22.