“Vətən sevgisi milləti ayaqda tutan başlıca gücdür”

ŞAHİN MUSAOĞLU: “DÖVLƏTİMİZİN, ORDUMUZUN, XALQIMIZIN BİRLİYİ TORPAQLARIMIZIN TEZLİKLƏ AZAD EDİLMƏSİNƏ YOL AÇACAQ”

Vətənpərvərlik mahnılarının müəllifi kimi tanıdığımız, ixtisasca həkim olan Şahin Musaoğlu Qarabağ savaşının qızğın vaxtlarında Müdafiə Nazirliyi ilə ciddi əməkdaşlıq edib və əsgərlərə, zabitlərə məxsus ilk hərbi- tibbi arxivi yaradıb. Ancaq onun yaradıcılığı qəhrəmanlıq mahnıları ilə daha yaddaqalan izlər buraxıb.

“İgid əsgər, möhkəm dayan”, “Cənab leytenant”, “Vətən çağırır”, “Bozqurd harayı” kimi mahnıları ilə xalqımıza milli ruh, vətənpərvərlik duyğuları aşılayıb. Ş. Musaoğlu bu yaxınlarda Azərbaycan Yazıçılar Birliyi (AYB) Katibliyinin qərarı ilə qurumun Hərbi Vətənpərvərlik Komissiyasının sədri seçilib.

Söhbətimizə də elə komissiyanın fəaliyyəti barədə sualla başladıq.

- İctimaiyyətin bildiyi kimi, mənə qədər bu vəzifəyə mərhum Xalq şairimiz, söz ustadı Zəlimxan Yaqub rəhbərlik edib.

Hərbi Vətənpərvərlik Komissiyasının indiki tərkibi AYB-nin son qurultayında formalaşıb. Azərbaycan ictimai və ədəbi mühitində kifayət qədər tanınan qələm sahibləri bu komissiyada təmsil olunur. Sədr müavini bizim ağsaqqal yazıçımız, Yasif Nəsirlidir. Bu gün də cəbhə bölgələrində öz qələmi ilə döyüşən Azərbaycan ordusunun zabiti Abdulla Qurbani, Mərkəzi Zabitlər Evinin əməkdaşı Zəminə Xınalı, Sərhəd Qoşunlarının zabiti Qardaşxan Əziz, şeirlərinə mahnı bəstələdiyim, təpədən-dırnağa qədər vətənpərvər ruhlu Nizami Saraclı, universitet illərində hərbi müəllimim olmuş şair Ramiz Duyğun, ictimaiyyətimizin çox gözəl tanıdığı Orxan Fikrətoğlu və başqaları olmaqla, iyirmiyə yaxın sənət adamı, qələm əhli bu komissiyanın üzvüdür.

Məqsədimiz hərbi vətənpərvərlik mövzusunu gündəmdə saxlamaq və bu səpkidə yazılan əsərlərin, şeirlərin təbliğatını gücləndirməkdir. Bundan başqa biz güc nazirliklərinin müvafiq qurumları ilə sıx əməkdaşlıq etmək fikrindəyik. Dövlət tədbirlərində, bayramlarda, hüzn günlərində onlara qoşulmaq, dəstək olmaq istəyirik. Dövlət və qeyri-

hökumət təşkilatları ilə, səfərbərlik idarələri ilə əməkdaşlıq, hərbi hissələrdə, təhsil müəssisələrində, məktəblərdə görüşlərin keçirilməsi və bu kimi bir sıra məsələləri qarşımıza məqsəd qoymuşuq.

- Ümumiyyətlə, ədəbiyyat və musiqi müharibə vaxtı xalqın həyatında nə kimi rol oynayır?

- Çox önəmli rolu var, çox. Çünki musiqi incəsənətin elə bir növüdür ki, özü qədər azad və özgür ikinci bir sahə yoxdur. İnsan anadan olduğu gündən musiqi onunla birgə yaranıb. Bu yaxınlığın nəticəsidir ki, insana psixi və emosional təsiri heç nə ilə ölçülmür. Sözsüz ki, hərb tariximizdə də həmişə musiqiyə və sözə böyük önəm verilib. Bəzən bir kəlmə, yaxud bir mahnı orduları ayağa qaldırıb. Bu baxımdan hərbi marşların yazılmasının, vətən mövzusunda musiqilərin yaranmasının vacibliyi şübhəsizdir. Musiqi hətta insanın ən ağrı-acılı vaxtlarında belə, bunları unutdurmağa qadirdir. Musiqi elə bir incəsənət sahəsidir ki, insan öz xoşbəxtliyini, sevincini mahnı vasitəsi ilə dilə gətirir, paylaşır və onun sevinci çoxalır, xoşbəxtliyi artır. Yaxud da əksinə. Öz kədərini, həsrətini, dərdini yenə musiqi ilə dilə gətirir, paylaşır və onlar azalır. Ona görə mən düşünürəm ki, müharibələrdə sözün və musiqinin böyük önəmi var.

- Bəstələdiyiniz musiqilər çox təsirlidir. “Cənab leytenant”a dəfələrlə qulaq asmışam. Maraqlıdır, necə yaranıb bu musiqilər?

- Bunların yaranma tarixi müharibə dövrünə - 91-94-cü illərə təsadüf edir. Həmin dönəm qanlı-bəlalı illər idi. Hər gün cəbhə xəttindən şəhid xəbərləri gəlirdi. Xəstəxanalar, hospitallar yaralılarla dolu idi. Qələbənin sevincini və məğlubiyyətin acısını bir yerdə dadırdıq. Mən onda Müdafiə Nazirliyinin Hərbi Tibb İdarəsinin əməkdaşı kimi fəaliyyət göstərirdim. Demək olar ki, bütün mülki həyatımı dondurmuşdum və tam hərbi-tibbi fəaliyyətlə məşğul olurdum. Daha sonra Müdafiə Nazirliyinin Hərbi Sənədli Filmlər Kinotelestudiyasında işimi davam etdirdim. Həmin studiyanın yaradıcı heyəti ilə tanış oldum. Ardınca Müdafiə Nazirliyində hərbi-elmi tədqiqatlar sahəsində işləməyə başladım. Yəni, belə bir mühitdə - hərbi ezamiyyətlər, səngər həyatı, müharibənin qanlı-qadalı illərində həmin musiqilər yarandı. İlk əsərim “İgid əsgər, möhkəm dayan” olub.

- Elə təəssürat yaranır ki, musiqiləriniz şeirlərinizdən daha populyardır...

- Səbəbi yenə musiqinin özündədir. Çünki insan öz hisslərini, həyəcanlarını tam ifadə edə bilməyəndə musiqi onun köməyinə gəlir. Yəni, mən musiqiyə, bəstəkarlığa bu cür gəlib çıxmışam. Yaşantılarımı, ovqatımı musiqi ilə ifadə etməyə çalışmışam. Anlatmaq istədiklərimi onunla izah etmişəm.

- Həm həkim, həm şair, həm də bəstəkar... Bunların hansı daha doğmadır sizə?

- Həkimlik artıq 30 ilə yaxındır ki, ixtisasımdır. Bu 30 ildə boşuna keçən bircə günü belə xatırlamıram. Maddi durumumdan, vəziyyətimdən asılı olmayaraq işimi - həkimlik peşəmi sevə-sevə icra etmişəm. Həkimlik mənim professional sahəmdir. Ancaq şeir yazmasaydım, musiqi bəstələməsəydim, yəqin ki, yaxşı həkim ola bilməzdim. İncəsənət, musiqi, şeir həkimlik sənətimdə mənə çox kömək olub. Və mən bunların tam ittifaqında özümü bütünlüklə ifadə edə bilmişəm.

- Musiqiləri ilə bizə təqdim etdiyi, insanları duyğulandırdığı “Azərbaycan əsgəri” və “Vətən” anlayışları Şahin Musaoğlu üçün nə deməkdir?

- “Azərbaycan əsgəri” - mənim qürur yerim, ümid, inam ünvanımdır. O, məni, ailəmi və ümumiyyətlə, bizi qoruyur. Ən böyük siyasətçilər “mən vətənin əsgəriyəm” deyərək qürur hissi keçirirlər. Hətta bizdə belə bir deyim də var: filankəs filan işin əsgəridir. Yəni, əsgər sözün həqiqi mənasında böyük bir addır. Vətən isə, Mirzə Cəlilin sözü ilə desək, vətəndaşlardan ibarətdir. Biz elə ailədən, məktəbdən başlayaraq vətən sevgisi ilə böyümüşük. Vətən bizim üçün müqəddəs və toxunulmazdır. Vətən sevgisi milləti ayaqda tutan başlıca gücdür.

- Son günlər cəbhə bölgələrində atəşkəs yenə də pozuldu, qızğın döyüşlər getdi, qurbanlar verdik. Bununla bağlı cəmiyyətimizdə hərbi-vətənpərvərlik ruhunu necə dəyərləndirərdiniz?

- Biz əslində sülhsevər bir dövlətik. Yəni, millət olaraq, xalq olaraq, daha çox sülh tərəfdarıyıq. Biz haqq tərəfindəyik və savaşımız haqq savaşıdır. Ancaq bizdən asılı olmayan səbəblərdən bu münaqişəyə cəlb olunmuşuq. Bu mənada, mənfur qonşularımızın savaşı əsl cinayətdir. Haqlı

olduğumuz üçün inanıram ki, bu savaş bizim qələbəmizlə sonlanacaq. Biz öz torpaqlarımızı almalıyıq. Bu, həm mənəvi, həm dini nöqteyi- nəzərdən, həmçinin ortada bir ədalət məsələsi olduğundan, haqq öz yerini tutacaq. Bəzən bugünlərdəki milli ovqat 1990-cı illərlə müqayisə edilir. Onda biz yenicə müstəqil olmuşduq, uzun illər müharibə görməmiş bir respublikada hərbi sahədə təcrübəsizlik xeyli çətinlik yaradırdı. Bu da insanlarımıza mənfi mənada təsir edirdi. Ancaq keçən illər ərzində müstəqil Azərbaycanın elə bir ordusu yarandı ki, bu, regionun ən güclü ordularından biridir. Azərbaycan ordusuna ayrılan vəsait, qayğı və diqqət nəticəsiz qalmadı. Ordumuzun gücü xalqımıza sirayət etdi, milli birliyə təkan verdi. Bu gün xalqımız illərdən bəri arzuladığı halları gördü və öz birliyini, iradəsini ortaya qoydu. Ordumuzun uğurlu əməliyyatı insanlarımızda görünməmiş ruh yüksəkliyi yaratdı. İnanıram ki, beləcə də davam edəcək, dövlətimizin, ordumuzun, xalqımızın birliyi torpaqlarımızın tezliklə azad edilməsinə yol açacaq.

Müşfiq ŞÜKÜRLÜ

525-ci qəzet.- 9 aprel.- S.9