Dominikan Universitetinin professoru Turizm Universitetində

Azərbaycan Turizm və Menecment Universitetində (ATMU) Azərbaycan Sosial İş İctimai Birliyinin (ASİİB) təşkilatçılığı ilə ABŞ Dövlət Departamentinin Təhsil və Mədəniyyət məsələləri Bürosu tərəfindən maliyyələşdirilən Fulbrayt proqramı çərçivəsində "Sosial Xidmətlərin yaradılması" mövzusunda seminar təşkil olunub.

Universitetdən verilən məlumata görə, Amerika Birləşmiş Ştatlarının Çikaqo şəhərində fəaliyyət göstərən Dominikan universitetinin professoru, sosial iş üzrə tanınmış mütəxəssis Letisiya Villarreal-Sosanın keçirdiyi seminarda universitetin müvafiq ixtisas üzrə bakalavr və magistratura pilləsində təhsil alan tələbə-müəllim heyəti iştirak edib.

Seminarda tələbələrin çoxsaylı sualları Azərbaycan Sosial İş İctimai Birliyinin icraçı direktoru Lamiyə Rzayeva tərəfindən ətraflı cavablandırılıb.

2016-cı il ərzində Dominikan universitetinin professoru Villarreal-Sosanın ölkəmizə daha iki səfəri planlaşdırılır.

Bu səfərlər çərçivəsində ATMU-nun sosial iş üzrə təhsil alan tələbələri üçün müxtəlif seminar və təlimlərin təşkili nəzərdə tutulub.

Vəfa MƏMMƏDLİ

525-ci qəzet.- 2016.- 13 aprel.- S2.