“Şah İsmayıl - sərkərdə və hökmdar” adlı sərgi açılıb

Azərbaycan Milli Elmlər Akademiyasının (AMEA) Milli Azərbaycan Tarixi Muzeyində “I Şah İsmayıl - sərkərdə və hökmdar” adlı sərgi təşkil olunub.

AZƏRTAC xəbər verir ki, tədbirdə bir sıra tanınmış elm xadimləri, mədəniyyət və incəsənət ocaqlarının təmsilçiləri, o cümlədən, “Dərbənd” xeyriyyə cəmiyyətinin üzvləri iştirak ediblər.

Tədbirin bədii hissəsi Rauf Zeynalovun rəhbərlik etdiyi “Peşəkarlar” qrupu üzvlərinin nağarada ifa etdikləri ritmik Azərbaycan rəqs havaları ilə başlanıb.

Muzeyin direktoru, akademik Nailə Vəlixanlı sərginin əhəmiyyətini qeyd edib. Ölkəmizin dövlətçilik ənənəsi tarixindən danışan akademik Azərbaycan Səfəvilər dövlətinin olduqca zəngin irsə malik olduğunu diqqətə çatdırıb. Vurğulanıb ki, Səfəvilər irsinin öyrənilməsi və tədqiqi hər zaman elmimiz üçün prioritet olub. I Şah İsmayılın dövlət quruculuğu fəaliyyətindən və sərkərdəliyindən bəhs edən natiq, onun Azərbaycan tarixində mədəniyyət, elm sahələrindəki xidmətləri ilə yanaşı, siyasət sahəsində də xidmətlərinin danılmaz olduğunu vurğulayıb. Akademik bildirib ki, təqdim olunan sərgidə I Şah İsmayılın böyük Azərbaycan sərkərdəsi kimi fəaliyyətini əks etdirən eksponatlar nümayiş olunur.

AMEA-nın prezidenti, akademik Akif Əlizadə sərginin konsepsiyasının akademik Ramiz Mehdiyevin 2014-cü ildə işıq üzü görmüş “Şah İsmayıl-sərkərdə və hökmdarın portreti” kitabı əsasında tərtib olunduğunu diqqətə çatdırıb.

Akademik qeyd edib ki, respublikamızın elmi-mədəni həyatında əlamətdar hadisə olan bu sərginin hazırlıq işləri ciddi elmi axtarışlar, geniş bərpa-restavrasiya işləri, yeni tərtibat işləri tələb etməsinə baxmayaraq, Prezident İlham Əliyevin elmə və dövlətçilik tariximizə olan diqqət və qayğısı nəticəsində buna nail ola bildik.

Digər çıxış edənlər də vurğulayıblar ki, belə bir sərginin keçirilməsi ilə zəngin tariximizə bağlılığı bir az da artırmış oluruq.

Daha sonra Əməkdar artist Munis Şərifovun bədii rəhbəri olduğu Qədim Musiqi Alətləri Ansamblının ifasında XIV əsr bəstəkarı Əbdülqadir Marağayinin “Hüseyn bəstə”, “Naxış bəstə” və “Qədim türk” əsərləri səsləndirilib.

Əməkdar artistlər Təyyar Bayramov, İlahə Əfəndiyeva, Elxan Mansurov və başqalarının ifasında bəstəkar Müslüm Maqomayevin “Şah İsmayıl” operasından Şah İsmayıl və Ərəbzənginin, Şah İsmayıl və Gülzarın ariyaları, o cümlədən, Aslan şahın ariyaları səsləndirilib.

Sonra sərginin açılışı olub.

Sərgidə 130-dan artıq eksponat - silahlar, pullar, kaşılar, parçalar nümayiş olunur. Eksponatların mahiyyətini tam açmaq, onların tarixi hadisələrlə bağlılığını göstərmək məqsədilə informasiya-məlumat panelindən istifadə edilib.

“Şah İsmayıl - sərkərdə və hökmdar” sərgisi dekabrın 15-dək davam edəcək.

525-ci qəzet.- 2016.- 16 aprel.- S.12