Yubiley gecəsi keçirildi

Rəşid Behbudov adına Mahnı Teatrında Azərbaycanın tanınmış səhnə xadimi, aktyor Nazir Rüstəmovun 60 illik yubiley gecəsi keçirilib.

Tədbir Mədəniyyət və Turizm Nazırliyi ilə Şuşa Dövlət Musiqili Dram Teatrının birgə təşəbbüsü və təşkilatçılığı sayəsində gerçəkləşib.

Əvvəlcə N.Rüstəmovun müxtəlif illərə aid fotoları, eləcə də ayrı-ayrı tamaşalardan fraqmentlər nümayiş olunub.

Yubiley gecəsinin aparıcısı olan Şuşa Dövlət Musiqili Dram Teatrının direktoru Yadigar Muradov sənət dostunun yaradıcılıq yolundan söz açıb. Şuşa rayon icra hakimiyyəti adından çıxış edən Vüsalə Fətəliyeva sənətkarın fəaliyyətindən danışıb, imzalanmış fəxri fərmanı ona təqdim edərək, təbriklərini, xoş arzularını çatdırıb.

Xalq artisti Hacı İsmayılov N.Rüstəmovun səhnə uğurlarından danışıb və ona Azərbaycan Teatr Xadimləri İttifaqının Fəxri fərmanını təqdim edib.

“Ulduz” jurnalının baş redaktoru Qulu Ağsəs uzun illərdən bəri tanıdığı yubilyarın teatrla yanaşı, ədəbi sahədəki fəaliyyətindən, şeir yaradıcılığından söz açıb.

“Azərbaycan” jurnalının baş redaktoru İntiqam Qasımzadə də təbriklərə qoşularaq, yubilyara daha böyük uğurlar arzulayıb.

Gecədə aktyor Fuad Poladov, rejissor Ağakişi Kazımov da çıxış edərək, ürək sözlərini dilə gətiriblər.

Yubilyarın şeirlərindən nümunələrin səsləndirildiyi gecədə N.Rüstəmovun iştirakı ilə Xalq yazıçısı İlyas Əfəndiyevin “Boy çiçəyi” əsəri nümayiş etdirilib.

Əntiqə SƏMƏNDƏR

525-ci qəzet.- 2016.- 16 aprel.- S.12