Nadir Əbdürrəhmanovun rənglər dünyası “Xalq Əmanəti” kimi yenidƏn canlandı

Xalq Bankın, artıq altıncı ildir ki, davamlı həyata keçirdiyi “Xalq Əmanəti” mədəni layihəsi rəssamlıq və ədəbiyyat vurğunlarından, sənətsevərlərdən, elmin müxtəlif istiqamətlərində çalışan alimlərdən ibarət geniş bir auditoriyanın layiqli rəğbətini qazanıb.

Əhatə dairəsi və yüksək peşəkarlıqla gerçəkləşdirilməsi baxımından misilsiz olan bu layihə çərçivəsində Azərbaycan xalqının təsviri sənət, poeziya və elm sahəsində yaratdığı seçkin nümunələr bir araya gətirilir, nəfis şəkildə hazırlanmış rəngarəng rəsm albomları, poetik toplular nəşr olunur və bütün bunlar xalqın sevgiylə, həssaslıqla qorunan sərvəti, zəngin irsi bir daha ulu xalqımıza, onun gələcək nəsillərinə çatdırılır.

Ötən 6 ilə yaxın müddətdə 12 irimiqyaslı layihə həyata keçirilib! Üç dildə - azərbaycanca, rusca, ingiliscə nəşr edilən kitablarla, albomlarla başqa millətlərin və xalqların da nümayəndələri tanışlıq imkanı qazanıblar, çünki bu nəşrlər təkcə ölkəmizdəki ali təhsil ocaqlarına, məktəblərə, fondlara, uşaq evlərinə, kitabxanalara, dövlət qurumlarına deyil, xarici ölkələrin səfirlik və konsul nümayəndəliklərinə, həmçinin, ölkəmizin xaricdəki diplomatik təmsilçiliklərinə də təmənnasız olaraq çatdırılır. “Xalq Əmanəti”nin həm mədəni, həm də sosial mahiyyəti məhz bu formada özünün parlaq təzahürünü tapır!

Layihənin sayca 13-cü nəşri olan “Rəngkarlıq və qrafika” bədii albomunda görkəmli fırça ustası, Xalq rəssamı, professor Nadir Əbdürrəhmanovun zəngin irsi, ustad sənətkarın həyat və yaradıcılığının bütün mərhələləri əks olunub.

Bununla əlaqədar aprelin 8-də Xalq Bankın sərgi salonunda həm sözügedən albomun təqdimatına, həm də Nadir Əbdürrəhmanovun əsərlərindən ibarət ekspozisiyanın açılışına həsr olunmuş mərasim keçirildi. Buradaca qeyd etməyi vacib bilirik ki, Xalq Bankın sənət qalereyası bir neçə geniş və işıqlı otaqdan ibarətdir, müxtəlif janrda və ölçüdə olan rəsmlər həmin otaqların divarlarındakı zərli, oyma çərçivələrdə, xüsusi qaydada işıqlandırılaraq nümayiş etdirilir. Bu isə tamaşaçıya o əsərləri fərqli rakurs və məsafələrdən seyr edərək yüksək zövq almaq imkanı verir.

Mərasimi açaraq qonaqları salamlayan aparıcı Dilarə Səlim “Xalq Əmanəti” layihəsinin xalqımızın müstəsna dəyərə malik yaradıcılıq irsinin qorunması və gələcək nəsillərə ötürülməsi, eləcə də Azərbaycan mədəniyyətinin xaricdə təbliğ olunması işində önəmli rolundan danışdı, Nadir Əbdürrəhmanovun həyat və yaradıcılıq yolu barədə yığcam məlumat verdi.

N.Əbdürrəhmanovun yaxın dostu və həmkarı - Xalq rəssamı, görkəmli heykəltəraş Ömər Eldarov onunla bağlı xatirələrini bölüşdü, birlikdə İ.Repin adına Rəssamlıq İnstitutunda oxuduqları, eyni otaqda qaldıqları çağları xatırlayaraq həyat və sənət barədə söhbətlərini yada saldı. Məlum oldu ki, bu iki böyük sənətkar sonralar da bir-birindən uzaq düşməyiblər, uzun illər həm mənzil, həm də emalatxana qonşusu olublar: “Nadir Əbdürrəhmanov olduqca qətiyyətli adam idi, Sovet dövründə onun rəhbərlik etdiyi Rəssamlar İttifaqı azad, demokratik şəraitin hökm sürdüyü, demək olar ki, yeganə yaradıcılıq “adası” kimi tanınırdı. O, inanılmaz dərəcədə incə ruhlu insan idi, heç vaxt səsini yüksəltməzdi, təşviş, narahatlıq içində olan istənilən adamı sakitləşdirməyi bacarırdı. Yəqin az adama məlumdur ki, Nadir Əbdürrəhmanov əvvəlcə Tibb İnstitutunda təhsil almışdı, peşəkar həkim idi, ancaq rəssamlığa olan meyli üstün gəlmiş və o, ömrünü təsviri sənətə həsr etmişdi. Tanıyanlar ona “doktor” deyə müraciət edirdilər. Doğrudan da, fitrətən loğman idi, onunla ünsiyyət adamlara könül xoşluğu, rahatlıq gətirirdi. Elə yaradıcılıqda da insana, təbiətə həssas münasibəti ilə seçilirdi”.

Milli Məclisin üzvü, akademik Rafael Hüseynov duyğularını, düşüncələrini özünəməxsus məharətlə dilə gətirdi: “Bu albomu vərəqlədikcə, bu gözəl rəsmlərə tamaşa etdikcə bir daha əmin olursan ki, 20-ci əsr Azərbaycan mədəniyyəti və incəsənətinin taleyində necə xoşbəxt bir dövr olub və xalqımıza neçə-neçə korifeylər bəxş edib. Xalq Bank xalqımızın ən dəyərli nümayəndələrinin yaradıcılıq irsinə aid nəşrlərlə bizi sevindirməkdədir. Səttar Bəhlulzadə, Vəcihə Səmədova, Böyükağa Mirzəzadə, Maral Rəhmanzadə, Gennadi Brijatyuk, Məmməd Araz, Mikayıl Müşfiq, Xəlil Rza Ulutürk, Əli Rəcəbli və başqaları - bütün bu imzalar milli yaddaşımıza əbədi həkk olunublar, çünki onlar Azərbaycan xalqının zəngin mədəni ənənələrini, onun möhtəşəm istedadını, zəkasını, mənəvi qüdrətini bütün dünyaya nümayiş etdiriblər. Ötən yüzillikdə yaradılan dahiyanə əsərləri qorumaq, onları 21-ci əsrə ötürmək, yenidən xalqa bəxş etmək - bundan da yüksək, bundan da nəcib missiya varmı?! Bu gün biz kitab bayramında toplaşmışıq. 2010-cu ildən etibarən “Xalq Əmanəti” layihəsi çərçivəsində bir çox kitablar nəfis tərtibatda çap olunaraq geniş tamaşaçı, izləyici kütləsinə pulsuz olaraq təqdim olunur. Mən çox xoşbəxtəm ki, tələbəlik illərində AzTV-də, radioda çalışdığım müddətdə Nadir Əbdürrəhmanov kimi böyük sənətkar haqda dəfələrlə verilişlər hazırlamaq mənə nəsib olub. Sonda öz çıxışımı bu sözlərlə, bu fikirlərlə bitirmək istərdim. Belə bir misal var - əmanətə xəyanət etmək olmaz. Mənsə deyərdim ki, əmanətə sədaqət gərək! Xalq Bank da əmanətə sədaqətlə yanaşır. Məhz Xalq Bank tarixləşmiş böyük şəxsiyyətlərə sədaqət göstərir. Bir Azərbaycan ziyalısı olaraq öz adımdan Xalq Banka ilham, güc və sevgi arzulayıram” - deyərək çıxışını bitirdi.

Rəssamlar İttifaqının sədri, Xalq rəssamı Fərhad Xəlilov N.Əbdürrəhmanovu Azərbaycanın ən layiqli vətəndaşlarından, parlaq şəxsiyyətlərindən və dəyərli ictimai xadimlərindən biri kimi səciyyələndirdi. Ustad rəssamın insanlığı və sənətkarlığı barədə yüksək fikirlər söyləyən F.Xəlilov daha sonra dedi: “Milli təsviri sənətimizə böyük diqqət və qayğı göstərdiklərinə, belə bir möhtəşəm nəşri hazırlayıb təqdim etdiklərinə görə Xalq Banka, layihədə əməyi keçən yaradıcı kollektivə Azərbaycan rəssamları adından təşəkkürümü bildirirəm”.

Sənətkarın ailəsi adından danışan Arif Əbdürrəhmanov atasının irsinə verilən yüksək qiymət üçün Xalq Banka dərin minnətdarlığını ifadə etdi.

Dahi bəstəkarımız Qara Qarayevin qızı, tədbirə qatılmaq üçün İstanbuldan təşrif buyuran professor Züleyxa Qarayeva hələ uşaqlıqdan tanıdığı və böyük hörmət bəslədiyi N.Əbdürrəhmanovun insani məziyyətləri, yaradıcılıq keyfiyyətləri haqqında fikirlərini bölüşdü, “Xalq Əmanəti” layihəsinin, açılan bu yeni ekspozisiyanın əhəmiyyətini vurğuladı.

Tanınmış kinorejissor, Əməkdar incəsənət xadimi Ayaz Salayev, “Odlar Yurdu” Universitetinin dekanı, dosent Arif Məmmədov da ustad rəssamın əsərləri barədə düşüncələrini ifadə edərək bu layihənin Azərbaycan mədəniyyətinə böyük töhfələr verdiyini bildirdilər.

Bankın Reklam və ictimai əlaqələr şöbəsinin rəhbəri Elşən Eynullayev layihə çərçivəsində son zamanlar görülən işlər barədə məlumat verərkən, bir müddətdən bəri eyni vaxtda üç nəşr üzərində çalışıldığını, onlardan birinin məhz N.Əbdürrəhmanova həsr edilmiş bu albom olduğunu dedi: “Digər nəşrlərə gəlincə, hələlik yalnız bunu deyə bilərəm ki, onlar fərqli sahələrlə bağlı fundamental tədqiqatları özündə əks etdirəcək və bunun üçün layihəyə bir sıra məşhur mütəxəssislər cəlb olunub.

Qeyd edək ki, Nadir Əbdürrəhmanovun əsərlərindən ibarət sərgini həftə içi hər gün saat 18:00-dan 21:00-dək, şənbə və bazar günləri isə saat 10:00-dan 16:00-dək Xalq Bankın baş ofisinin 16-cı mərtəbəsində yerləşən qalereyasında seyr etmək olar. Yaxın günlərdə Bankın “Gəncə” filialında da (Gəncə şəh., Zərrabi küç. 4) N.Əbdürrəhmanovun rəsmlərinin sərgisi təşkil olunacaq.

Sərginin vaxtı: həftə içi hər gün saat 18:00-dan 21:00-dək, şənbə və bazar günləri saat 10:00-dan 16:00. Giriş sərbəstdir.

Gülzar VAQİFQIZI

525-ci qəzet.- 2016.- 16 aprel.- S.10