Dağlıq Qarabağdakı son vəziyyət bilavasitə Azərbaycan ordusunun adı ilə bağlıdır

MÜBARİZ ƏHMƏDOĞLU: “RUSİYANIN AZƏRBAYCANIN TƏKBAŞINA QAZANDIĞI QƏLƏBƏYƏ ŞƏRİK AXTARMAĞA ÇALIŞMASI RƏSMİ MOSKVA ÜÇÜN CİDDİ GEOSİYASİ PROBLEM YARADA BİLƏR"

“Ermənistan-Azərbaycan, Dağlıq Qarabağ münaqişəsindəki son vəziyyət bilavasitə Azərbaycan ordusunun adı ilə bağlıdır. Bu vəziyyəti Silahlı Qüvvələrimiz yaradıb. Ordumuza Azərbaycanın siyasi rəhbərliyindən başqa heç bir yerdən heç bir əlavə göstəriş gəlməyib”.

Bu sözləri Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu 2-5 aprel tarixlərində təmas xətti boyu Ermənistanın yenidən atəşkəsi pozması nəticəsində baş verən döyüşlər barədə danışarkən deyib. Onun sözlərinə görə, Azərbaycan ordusu öz gücünə o qədər arxayın idi ki, hətta səfərbərlik elan etmək barədə düşünməyib: “Səfərbərliyə ehtiyac duymayan ordunun başqa dövlətin hərbçilərinə müraciət etməsi, onları hərbi əməliyyatlara qoşması absurd fikirdir. Bunlar sadəcə ermənilərin uydurmalarıdır. Ermənilər miflərin əsarəti altındadırlar. Onlar belə düşünürlər ki, Azərbaycan rəhbərliyi, ordusu təkbaşına belə uğur qazana bilməz. Ona görə də, bu məsələdə Türkiyənin adını hallandırır və Rusiya ictimaiyyətini həmin fikrə inandırmağa çalışırlar”.

Politoloq xatırladıb ki, indi Rusiya ilə Türkiyə arasında münasibətlər gərgindir: “Ermənilər bundan istifadə edərək süni surətdə Rusiya-Ermənistan birliyinə qarşı Türkiyə-Azərbaycan birliyi ideyasını irəli sürmək istəyirlər”.

Mərkəz sədri qeyd edib ki, Rusiya baş naziri Dmitriy Medvedyev, eləcə də xarici siyasət idarəsinin rəhbəri Sergey Lavrovun Türkiyənin adını hallandırması kifayət qədər ciddi araşdırılmalı məsələdir: “Əgər Rusiyada kiçik bir Ermənistanın müstəqil siyasət aparmağına inanıb, bu ölkədən təxminən 4-5 dəfə böyük və güclü olan Azərbaycanın müstəqil siyasət aparmağına inanmırlarsa, bu artıq Rusiyanın siyasi elitasının problemidir. Eləcə də bu gün Moskva Azərbaycanın müstəqil siyasət aparmadığını, rəsmi Bakının verdiyi qərarlar, atdığı addımlara Türkiyənin təsir etdiyini düşünürsə, bu yaxın illərdə Rusiyanın Yaxın Şərq siyasətində ciddi problemlər yaradacaq. Çünki Rusiya-İran, Rusiya-Türkiyə münasibətlərində mövcud olan problemlər və qeyri-müəyyənliklər fonunda Rusiya-Azərbaycan əlaqələrinə rəsmi Moskva tərəfindən problemlərin yaradılması Rusiyanın Yaxın Şərq siyasətinə təsirsiz ötüşməyəcək. Rusiyada bəzilərinin nəzərinə çatdıraq ki, Kosovonun müstəqilliyinin tanınması məsələsində Azərbaycanın Türkiyə ilə münasibətlərində yalnız öz maraqlarını əsas götürdüyünün sübutu var. Türkiyə Kosovonun müstəqilliyini tanıyıb. Çünki Türkiyə NATO dövlətidir, Amerikanın müttəfiqidir, müsəlman ölkəsidir. Azərbaycan isə ərazi bütövlüyü prinsipini dəstəklədiyi üçün Kosovonun müstəqilliyini tanımayıb”.

Rusiyadakı erməni icmasının tam gücü ilə fəaliyyətdə olduğunu deyən M.Əhmədoğlu bildirib ki, onların məqsədi yalnız Rusiyaya ziyan vurmaqdır: “Ermənilər bu gün Rusiya-Azərbaycan münasibətlərini korlamaqla müasir Rusiyaya ən böyük zərbələrdən birini vurmuş olacaqlar”.

Ceyhun ABASOV

525-ci qəzet.- 2016.- 16 aprel.- S.9