Moskvadakı Azərbaycan İcması Evində ədəbi tədbir

Rusiya paytaxtındakı Azərbaycan İcması Evində Ümumrusiya Azərbaycanlıları Konqresinin dəstəyi ilə ədəbi-bədii gecə keçirilib.

Tədbirə Moskvada yaşayıb-yaradan azərbaycanlı şairlər, ziyalılar, diaspor nümayəndələri qatılıblar. AYB Moskva bölməsinin katibi, Ümumrusiya Azərbaycanlıları Konqresinin müşaviri Nəsib Nəbioğlu Azərbaycanın milli söz sərvətindən, poeziyamızın özünəməxsusluğundan danışıb:

"Dünya yaranandan bəri insanlığın həmişə yaxşı sözə, bədii sənətə, şeirə ehtiyacı olub. Azərbaycan şairləri əsrlərdən bəri bədii sözə, poeziyaya məsuliyyətlə yanaşıb, şairlərimiz üzərlərinə düşən missiyanı həmişə ləyaqətlə yerinə yetiriblər. Poeziyamız bütün dövrlərdə insanlarımızın maariflənməsinə, mədəniyyətimizin inkişafına, milli mənəvi dəyərlərimizin qorunub saxlanmasına xidmət edib".

Konqresin əməkdaşı, tarix elmləri doktoru Əşrəf Hüseynli qeyd edib ki, sənət adamlarının, xüsusilə şairlərin, ədiblərin bir araya toplanması, ədəbi məclislər təşkil etməsi bu günümüz üçün çox vacib məsələlərdən biridir:

"Görüb-götürmək, bir-birindən öyrənmək, fikir birliyinə nail olmaq baxımından bu məclislərin çox böyük əhəmiyyəti var. Ədəbi məclisə o adamlar maraq göstərir ki, onların dünyagörüşü, yaradıcılıq istiqaməti, bədii zövqü bir-birinə yaxın olur".

Tədbirdə Moskvada yaşayan şairlər - Əliş Əvəz,Yavər Həsən, Sultan Mərzili, Mirabbas Ağdabanlı, Səidə Rəhimli, Yaşar Süleymanlı müxtəlif mövzularda, ən başlıcası isə vətənpərvərliklə bağlı şeirlərini səsləndiriblər. Rus şairi, tərcüməçi Sergey Karatov müasir Azərbaycan poeziyasından etdiyi tərcümələrdən nümunələr oxuyub. Tanınmış ictimai xadim Ramiz Abutalıbov, tarixçi Eldar Abbasov, hüquqşünas Alışan Zakirov, ziyalılardan Rafiq Qafarov, Əli Rzayev, rəssam Qüdrət Qurbanov, "Şəhriyar" ədəbi-mədəni cəmiyyətinin sədri Vasif Məmmədov da ədəbiyyat və ədəbi mühit barədə fikirlərini bildiriblər.

Tədbirin sonunda unudulmaz sənətkarımız Mikayıl Mirzənin ifasında mərhum şair Miryusif Mirnəsiroğlunun "Vətən balladası"nın vaxtilə lentə alınmış videoyazısı dinlənilib və hərarətlə qarşılanıb.

M.ŞÜKÜRLÜ

525-ci qəzet.- 2016.- 26 aprel.- S.7