Təranə Vahidin təqdimatında "Doxsan imza"

Yazıçı-publisist Təranə Vahidin "Doxsan imza" kitabı mədəniyyət tariximizə həsr olunub.

Kitabda yazıçının məqalə və müsahibələri toplanıb. Bütün bunlar ömrünü musiqi, ədəbiyyat, yaradıcı və elmi sahəyə həsr etmiş görkəmli sənətkarların həyat və fəaliyyət sferasını açır.

Kitab bir neçə bölümə ayrılır. "Musiqinin işığı" adlı hissədə görkəmli musiqiçilər barədə düşüncələr, onların həyat və yaradıcılıqları haqda publisistik yazılar, bəstəkar, xanəndə və ifaçılarla söhbətlər yer alıb. Burada Alim Qasımov, Ramiz Quliyev, Ramiz Mirişli, Mənsum İbrahimov, Qəndab Quliyeva, Zaur Rüstəmov və başqalarıyla müsahibələr verilib.

İkinci bölüm "Teatr və kino" adlanır. Bu bölümdə rejissor və aktyorlarla, teatr və kino xadimləri ilə söhbətlər, müxtəlif məqalələr var. Rejissorlar Tofiq Kazımov, Ramiz Həsənoğlu, Azər Paşa Nemətov, Vaqif İbrahimoğlu, aktrisalar Vəfa Fətullayeva, Həmidə Ömərova, aktyorlar Rafiq Əliyev, Hamlet Xanızadə və bu kimi bir çox sənətkar barədə publisistik düşüncələr bu bölümdədir.

"İncəsənətin rəngləri" bölümündə mədəniyyət abidələri və incəsənət əsərləri fonunda tariximizə, mədəniyyət yaddaşımıza nəzər yetirilir. Burada rəssamlar Adil Rüstəmov, Rəşad Mehdiyev, xalçaçı rəssam Məmmədhüseyn Hüseynov kimi sənətkarlarla söhbət və haqqında yazılar verilib.

"Əbədi uçuş" adlı son guşə isə yazıçı, şair və dramaturqlar üçün ayrılıb. Burada yazıçı Əlibala Hacızadə, şair Eldar Baxış, dramaturq Əli Əmirli və bu qəbildən bir çox yazarlarımızla söhbət və onlar barədə məqalələr yer alıb.

Kitabda aşıq sənəti və onun görkəmli nümayəndələri ilə bağlı yazılar da var.

M.ŞÜKÜRLÜ

525-ci qəzet.- 2016.- 18 fevral.- S.7