Görkəmli alim və şəxsiyyət

Alimləri eşidin, onlar bu dünyanın işığı, axirətin nurudur.

Hz.Məhəmməd.

Peyğəmbərimizin bu kəlamı 15 əsrdir ki, yol gələrək, bu günə qədər öz qüvvəsini itirməyib və cəmiyyət bu kəlamın nurundan daim faydalanmağa çalışıb.

Bu işığı bizə bəxş edən, fundamental xarakterli tədqiqatlarla Azərbaycan elmini zənginləşdirən, bütün dünyada tanınan riyaziyyatçı alimlər sırasında layiqli yer tutmuş, elm tariximizin parlaq siması fizika-riyaziyyat elmləri doktoru, professor, əməkdar elm xadimi, akademik Məcid Lətif oğlu Rəsulovun anadan olmasının 100 ili bu il tamam olur.

Elm tarixində böyük şəxsiyyətlər çox olub. Bu şəxsiyyətlərin hər biri haqqında dəyərli sözlər demək olar. Lakin bu şəxsiyyətlərin arasında elələri var ki, digərlərinin formalaşmasında həlledici rola malikdirlər. Belə şəxsiyyətlərdən biri də, akademik, əməkdar elm xadimi, fizika-riyaziyyat elmləri doktoru, ölkəmizdə riyaziyyat elminin inkişafında böyük xidmətləri olmuş Məcid Lətif oğlu Rəsulovdur.

Görkəmli mütəxəssis və şəxsiyyət, böyük riyaziyyatçı-alim və pedaqoq, təvazökar insan və səmimi dost... Bu xüsusiyyətləri özündə cəmləşdirən Məcid Rəsulov XX əsrdə Azərbaycanın bəşəriyyətə bəxş etdiyi nadir şəxsiyyətlərdən biridir.

Məhsuldar və yorulmaz fəaliyyəti ilə riyaziyyat elminin dinamik inkişafına qayğısını əsirgəməyən, qəlblərimizdə əbədi yaşayan elm xadimlərdən biri Məcid Rəsulov şərəfli və mənalı ömür yaşamışdır. O, elmin çətin yollarında inamla irəliləyərək akademiklik zirvəsinə - riyaziyyat elminin ən uca pillələrinə yüksəlmiş, çətin, məsuliyyətli, nümunəvi həyat yolu keçmişdir.

Məcid Lətif oğlu Rəsulov 1916-cı il iyul ayının 6-da Azərbaycanın qədim və tarixi güşələrindən biri olan Nuxa (indiki Şəki) şəhərində yerli ipək sənayeçisi Hacı Lətif Rəsul oğlunun ailəsində dünyaya gəlmişdir. İmkansız ailədən çıxmış beş övlad atası olan Hacı Lətif böyük əzmkarlıqla sahibkarlıq fəaliyyətini genişləndirib xeyriyyəçiliklə məşğul olur və şəhərin ən hörmətli sakinlərindən birinə çevrilir. Uzaqgörən bir insan kimi, Hacı Lətif bütün övladlarını savadlı görmək arzusunda idi.

Onun böyük oğlu Əbdüləli savadlı, yüksək mədəniyyətə və geniş təfəkkürə malik bir ziyalı kimi ömrünün axırına qədər Şəkidə müəllim işləmişdir.

1923-cü ildə Məcid Şəki şəhərində 7 illik məktəbin 1-ci sinfinə daxil olur. Lakin müharibə və inqilablar bir çox ailələr kimi Rəsulovlar ailəsinin də həyatını alt-üst edir. 1928-ci il martın 16-da Məcid beşinci sinifdə oxuyanda atası Hacı Lətif həbs edilir. Uydurulmuş ittihamlar əsasında bütün əmlakı müsadirə olunur və Hacı Lətif ailəsi ilə birgə 8 il müddətinə Qazaxıstana sürgün edilir. Çətin və işgəncəli sürgün həyatı Hacı Lətifin səhhətinə təsir göstərir və o, 1930-cu ildə vəfat edir. Şəkiyə qayıtdıqdan sonra ailəyə Əbdüləli qayğı və himayə göstərmişdir.

Taleyin Məcidə hazırladığı sarsıntılar və ağır günlər onun biliyə, savada olan marağını azalda bilmir. İlk olaraq o, Şəkidə 7 illik məktəbin altıncı sinfində təhsilini davam etdirir, bir il ərzində ikiillik tədris kursunu mənimsəyərək, məktəb şəhadətnaməsini alır. 1932-ci ildə Məcid Rəsulov Bakıya gələrək Nəriman Nərimanov adına Sənaye Texnikumuna daxil olur. Texnikumu bitirdikdən sonra, 1934-cü ildə V.İ.Lenin adına Azərbaycan Dövlət Pedaqoji İnstitutunun Fizika-riyaziyyat fakültəsinə qəbul olunur. Təhsil aldığı müddətdə Məcid Rəsulov özünü çox istedadlı tələbə kimi göstərir və 1938-ci ildə institutu birinci dərəcəli diplomla bitirir.

Həmin dövrdə görkəmli riyaziyyatçı alim, sonralar Ukrayna Elmlər Akademiyasının həqiqi üzvü olmuş Yaroslav Borisoviç Lopatinski Azərbaycan Dövlət Universitetində çalışırdı. Onun təklifi ilə Məcid Rəsulov Azərbaycan Dövlət Universitetinin aspiranturasına qəbul olunur. Eyni zamanda o, Azərbaycan Dövlət Pedaqoji İnstitutunun “Riyazi analiz” kafedrasında assistent vəzifəsində çalışmağa başlayır.

1939-cu ildə İkinci Dünya müharibəsi, daha sonra Sovet-Fin müharibəsi başlayır. Bununla əlaqədər olaraq Məcid Rəsulov orduya çağırılır və təhsilini yarımçıq qoymağa məcbur olur. Onun riyaziyyata olan sevgisi hərbi xidmət zamanı da özünü biruzə verir və onu atıcı diviziyasının artilleriya alayının hesablayıcı bölməsinin komandiri vəzifəsində işləməyə dəvət edirlər. Məcid Rəsulov diviziya heyətinin hərbi hazırlığını yüksəltmək məqsədi ilə zabitlərə riyaziyyat kursları keçir.

1941-ci ildə Böyük Vətən müharibəsi başlayır. Hərbi xidməti yekunlaşmaq üzrə olan Məcid Rəsulovun mülki həyata qayıtmaq arzuları alt-üst olur. O, cəbhəyə göndərilərək qızğın döyüşlərin iştirakçısı olur. Döyüşlərin birində yaralanır və hospitalda müalicə aldıqdan sonra, yenidən cəbhəyə qayıdır. 1942-ci ildə Məcid Rəsulov Tbilisiyə Zaqafqaziya hərbi dairəsinin kiçik leytenantlar kursuna göndərilir. Kursu bitirdikdən sonra, cəbhəyə dönür və 1943-cü ildə ona baş leytenant rütbəsi verilir. Məcid Rəsulov müharibənin sonuna kimi artilleriya alayının batareya komandiri vəzifəsində xidmət edir.

Döyüşlərdə göstərdiyi şücaətlərə görə Məcid Rəsulov 1944-cü ildə “Qafqaz uğrunda” medalı, 1945-ci ildə isə “Almaniya üzərində qələbə” medalı ilə təltif olunur.

Müharibə başa çatdıqdan bir qədər sonra 29 yaşlı Məcid Rəsulov ehtiyata buraxılır. Ordu sıralarından qayıdan kimi aspiranturada təhsilini davam etdirir və bununla yanaşı o, Azərbaycan Dövlət Universitetinin “Riyazi analiz” kafedrasında müəllim vəzifəsində çalışmağa başlayır.

Çox ağır uşaqlıq illəri, sürgün həyatı, müharibə fəlakəti, sarsıntılar, keşməkeşli həyat tərzi onun elm dünyasında addımlamağına maneə törətmir, elmə və təhsilə marağını dəyişə bilmir. Dünya görüşünü və elmi təfəkkürünü daim inkişaf etdirən, öz qeyri-adi zəkası, fitri istedadı ilə insanları heyrətə salan Məcid Rəsulov çətinliklərdən bir an belə qorxmur, daim riyazi tədqiqatlarını davam etdirir.

Lakin onun həyatında yenidən dəyişiklər baş verir. Məcid Rəsulovun elmi rəhbəri professor Y.B.Lopatinski Ukrayna SSR-nin Lvov şəhərinə köçür və tələbəsinin aspirantura təhsilini Ukrayna Elmlər Akademiyasının Lvov filialında davam etdirməsini təklif edir. Məcid Rəsulov rəhbərinin bu fikrini dəyərləndirərək təhsilini Lvovda davam etdirir və burada namizədlik dissertasiyası üzərində yorulmadan işləyir. Yerinə yetirdiyi elmi-tədqiqat işləri ilə yanaşı, o, İvan Franko adına Lvov Dövlət Universitetində pedaqoji fəaliyyətini yüksək səviyyədə davam etdirirdi. Məcid Rəsulovun bir alim və müəllim kimi formalaşmasında Lvov şəhərində çalışdığı dövrün böyük rolu olmuşdur.

Bakıya qayıtdıqdan sonra, 1949-cu ildə Məcid Rəsulov Azərbaycan Dövlət Universitetinin Elmi Şurasında “Differensial tənliklər üçün bəzi qarışıq məsələlərin çıxıqlar üsulu ilə həllinin tədqiqi” mövzusunda namizədlik dissertasiyasını müvəffəqiyyətlə müdafiə edir və fizika-riyaziyyat elmləri namizədi elmi dərəcəsinə layiq görülür. Yeri gəlmişkən qeyd etmək lazımdır ki, Məcid Rəsulovun namizədlik dissertasiyası müdafiə etdiyi Elmi Şuraya Azərbaycan Riyaziyyat məktəbinin banilərindən biri, görkəmli müəllim və alim, professor Maqsud Cavadov sədrlik etmiş, opponentləri isə, ölkəmizdə riyaziyyat elminin inkişafında müstəsna xidmətləri olmuş akademiklər- Zahid Xəlilov və Əşrəf Hüseynov olmuşlar.

Müdafiədən sonra Məcid Rəsulov Azərbaycan Dövlət Universitetinin “Riyazi analiz” kafedrasında baş müəllim və dosent vəzifələrində çalışmışdır. O, 1951-ci ildə dosent elmi adını alır. Universitetdə çalışdığı müddətdə Məcid Rəsulov özünü istedadlı riyaziyyatçı, mühazirələri dinləyəcilərə yüksək səviyyədə təqdim edən, müstəqil elmi tədqiqatlar aparan bir alim kimi göstərmişdir.

Dahı ingilis alimi İ.Nyutonun bir kəlamını sitat gətirsək, yerinə düşər: “Elm hüdudsuz bir okeandır; mən və bəzi dostlarım bu okeandan bir neçə damlanı içmək fürsətini əldən vermədik”. Bu dostların-alimlərin siyahısına Məcid Rəsulovu da salsaq heç də yanılmarıq.

1953-cü ildə Y.B.Lopatinski Məcid Rəsulovu elmi tədqiqatlarını davam etdirmək üçün yenidən Lvov şəhərinə dəvət edir. O, müəlliminin bu təklifini qəbul edib Lvova köçür. Burada o, Y.B.Lopatinskinin rəhbərliyi altında öz tədqiqatlarını davam etdirir və eyni zamanda İ.Franko adına Lvov Dövlət Universitetinin “Differensial tənliklər” kafedrasında dosent vəzifəsində çalışır. Məcid müəllimin çıxıqlar üsulu ilə əlaqədar apardığı tədqiqatları onun doktorluq dissertasiyasının əsasını təşkil edir. Bu istiqamətdə aldığı mühüm elmi nəticələr haqqında o, Moskva Dövlət Universitetində həmin dövrün çox böyük alimlərindən biri olan akademik S.L.Sobolevin rəhbərlik etdiyi differensial tənliklər üzrə seminarda və Moskva Riyaziyyat Cəmiyyətinin iclasında məruzə edir.

Aktual problemin həlli yollarında apardığı səmərəli işlər tezliklə öz bəhrəsini verir və Məcid Rəsulov 1960-cı ildə Moskvada V.A.Steklov adına Riyaziyyat İnstitutunda “Xüsusi törəməli xətti differensial tənliklər üçün sərhəd və qarışıq məsələlərin həlli üçün çıxıqlar üsulu” mövzusunda doktorluq dissertasiyasını müvəffəqiyyətlə müdafiə edir və fizika-riyaziyyat elmləri doktoru elmi dərəcəsinə layiq görülür. Məcid müəllimin rəsmi opponentləri dünya miqyaslı alimlər, fizika-riyaziyyat elmləri doktorları M.A.Naymark və A.V.Bitsadze onun işinə yüksək rəy vermişlər. Onu da qeyd etmək lazımdır ki, həmin dövrdə V. A. Steklov adına Riyaziyyat İnstitutu dünyanın əsas elmi mərkəzlərindən biri hesab olunurdu və orada doktorluq dissertasiyası müdafiə etmək, necə deyərlər, hər alimin işi deyildi. Həmin institutun elmi şurasında 1947-ci ildə doktorluq dissertasiyası müdafiə edən ilk azərbaycanlı alim, akademik İbrahim İbrahimov olmuşdur.

Müdafiədən sonra Məcid Rəsulov Bakıya qayıdır və Azərbaycan Dövlət Universitetində “Ümumi riyaziyyat” kafedrasının müdiri vəzifəsində çalışmağa başlayır. 1961-ci ildə isə o, professor elmi rütbəsini alır. 1964-cü ildə Məcid Rəsulov “Ümumi riyaziyyat” kafedrasının əsasında “Riyazi fizika tənlikləri” kafedrasını yaradır və ona müvəffəqiyyətlə rəhbərlik edir. Bu kafedranın yaranması elmdə Məcid müəllimin və onun tələbələrinin tədqiq etdiyi böyük bir istiqaməti göstərirdi. Və onu deyə bilərik ki, istiqamətləndirilən elmi araşdırmalar çox sürətli və konkret nəticələr verir. Elm ancaq doğru istiqamətləndirildiyi təqdirdə əsl məqsədinə qısa müddətdə çata bilər. Məcid Rəsulov irsi bugünkü nəsil üçün əsl istinad mənbəyi olan alimlərdən biridir desək, heç də yanılmarıq.

Respublikamızda differensial tənliklər ənənəvi inkişaf etdirilən sahələrdəndir. Məcid Rəsulov bu sahənin Azərbaycanda yaradıcılarından biridir. O, xüsusi törəməli differensial tənliklərin həlli üçün iki yeni üsul - kontur inteqralı və çıxıqlar üsullarını təklif etmişdir. Məcid Rəsulovun işləyib hazırladığı bu iki yeni üsul öz sistematik şərhini 1964-cü ildə onun Moskvada çap olunmuş “Kontur inteqralı üsulu” adlı ilk fundamental monoqrafiyasında tapmışdır. Bu kitab yalnız Sovet İttifaqında deyil, həmçinin bütün dünyada riyaziyyatçıları özünə cəlb etmişdir. 1967-ci ildə İngiltərə Kral Riyaziyyat Cəmiyyətinin sifarişi ilə bu monoqrafiya ingilis dilinə tərcümə olunur və Hollandiyada, Amerika Birləşmiş Ştatlarında, Kanadada çap olunur. Qeyd edək ki, bununla da Məcid Rəsulov, xaricdə monoqrafiyası çap olunan ilk azərbaycanlı riyaziyyatçı olur.

Məcid Rəsulov 1968-ci ildə Azərbaycan Elmlər Akademiyasının müxbir üzvü seçilir.1975-ci ildə Moskvada Məcid müəllimin “Kontur inteqralı üsulunun tətbiqləri” adlı ikinci monoqrafiyası nəşr olunur. Bu kitab da mütəxəssislər tərəfindən çox yüksək qiymətləndirilir.

1989-cu ildə Bakıda Məcid Rəsulovun “Çıxıqlar üsulunun differensial tənliklərin həllinə tətbiqi” adlı üçüncü monoqrafiyası çap olunur.

Bu monoqrafiyalar mütəxəssislər tərəfindən böyük maraqla qarşılanmışdır. Onun hər üç monoqrafiyasında geniş tətbiqi əhəmiyyətə malik olan bir çox ciddi nəticələr vardır. Məcid Rəsulovun yaratdığı üsullar həm ölkəmizdə, həm də xaricdə tanınmışdır. Fizika-riyaziyyat elmləri doktoru V.E.Lyanse kontur inteqralı üsulunu “riyazi hesablamalar sahəsində son dərəcə effektiv tətbiq oluna biləcək elmi nəzəriyyə” adlandırmışdır.

1983-cü ildə Azərbaycan Elmlər Akademiyasına seçkilər ərəfəsində Sovetlər İttifaqının nüfuzlu alimləri Məcid Rəsulovun akademikliyə namizədliyini dəstəkləyən məktubları ilə Akademiyanın Rəyasət Heyətinə müraciət edirdilər. Nəhayət, 1983-cü ildə Məcid Rəsulov Azərbaycan Elmlər Akademiyasının həqiqi üzvü seçilir. 1989-cu ildə isə o “Əməkdar Elm Xadimi” fəxri adı alır.

Məcid Rəsulov bunlarla yanaşı “Əmək veteranı” medalı, “Qırmızı Əmək Bayrağı Ordeni”, “Rəşadətli Əmək Uğrunda” medalı, “Fəxri Nişanı” medalı və digər orden və nişanlar ilə təltif olunmuşdur.

Məcid Rəsulovun dövlət tərəfindən qiymətləndirilməsi onun fədakar əməyinin, böyük zəhmətsevərliyin, sənətə vurğunluğun sayəsində qazanılmışdır.

Mərifət sahibləri arasında hər şeyi olduğu kimi dərk etməyə, hər işi lazım olduğu kimi yerinə yetirməyə hikmət deyilir! Bunun nəticəsində insanın mənəviyyatı mümkün qədər təkmilləşməli, arzu edilən səviyyəyə yüksəlməlidir. Belə olduqda hikmət iki yerə bölünür: biri - elm; o biri əməl.

Elm - varlıqların həqiqətən necə olduqlarını düzgün təsəvvür etmək, insanın yaradıcı ağlı və sağlam düşüncəsi dairəsində onun xüsusiyyət və keyfiyyətlərini kəşf etməkdir!

Əməl - gizli qüvvələri ortaya çıxarmaq, müxtəlif sənəd və peşələrdən fayda götürmək, müxtəlif iş vərdişləri əldə etmək üçün göstərilən fəaliyyətə deyilir. Bu şərtlə ki, o, bəşəriyyətin qüdrətinin artmasına, onun təkmilləşməsinə səbəb olsun!

Kimdə bu iki fəzilətdən hər ikisi varsa, o ən müdrik insan, ən kamil alim hesab edilər. Onun yeri bəşər övladının tuta biləcəyi ən yüksək mövqeyin fövqündə olar! (Nəsrəddin Tusi. “Əxlaqi-Nasiri”)

Qətiyyətlə deyə bilərik ki, Məcid Rəsulovda bu iki fəzilətin hər ikisi var idi və o, elmin ən qüdrətlisini, insanlığın ən nümunəviliyini özündə cəmləşdirən özünü elmə, insanlığa sərf edən görkəmli elm xadimi olub.

Dahi və müdrik alimimiz Nəsrəddin Tusi deyərdi: “Elm səbəb, əməl nəticədir”. Özünün elmi istiqamətini yaratmış Məcid Rəsulovun elmə olan böyük marağı, zəhmətkeşliyi, elmi işlərinin həm nəzəri, həm tətbiqi nöqteyi-nəzərdən həmişə aktuallığı və gərəkliliyi yüksək nəticələr vermişdir.

Məcid müəllimin yaratdığı üsullar istər Sovet İttifaqında, istərsə də xaricdə alimlərin tədqiqatlarında öz geniş tətbiqini tapmışdır və o, bir sıra ölkələrdən dəvətlər alaraq, institutlarda və lektoriyalarda məruzələrlə çıxış edirdi.

1964-cü ildə Moskvada Ümumittifaq Bilik Cəmiyyətinin mərkəzi lektoriyasında Məcid Rəsulov “Riyazi fizika məsələləri üçün çıxıqlar üsulu” mövzusunda mühazirə oxumuşdur. Mühazirə mütəxəssislərin o qədər böyük marağına səbəb olmuşdur ki, o, “Çıxıqlar üsulu və kontur inteqralı üsulu” mövzusunda yeddi mühazirədən ibarət silsilə məruzələrlə çıxış etmişdir. 1965-ci ildə Məcid müəllim Qırmızı Əmək Bayrağı Ordenli Cərəyan Mənbələri Elmi-tədqiqat institutunda da mühazirələr oxumuşdur.

Məcid Rəsulov kadrların tərbiyəsi və yetirilməsi sahəsində də çox böyük işlər görmüşdür. O, riyaziyyat və onun tətbiqi üzrə keçirilən bir çox beynəlxalq və ümumittifaq qurultay və konfranslarda fəal iştirak etmişdir. Elmi tədqiqatları ciddi nəzəri və tətbiqi əhəmiyyət kəsb edən Məcid müəllim Moskva (1956, 1966, 1972), Bakı (1959), Leninqrad (indiki Sankt-Peterburq) (1961), Minsk (1967), Tbilisi (1971), Aşqabad (1978), Fransanın Nitsa (1971) şəhərlərində keçirilən beynəlxalq elmi konfranslarda yüksək səviyyədə məruzələrlə çıxış edərək differensial tənliklər və riyaziyyatın tətbiqi sahəsində çalışan mütəxəssislər arasında böyük nüfuz qazanmışdır.

1965-ci ildə Minsk şəhərində “Differensial tənliklər” adlı Ümumittifaq elmi-nəzəri jurnalı fəaliyyətə başlayır. Jurnalın redaksiya heyətinə Sovet İttifaqının ən görkəmli riyaziyyatçı alimləri A.V.Bitsadze, İ.N.Vekua, A.A.Dorodnitsin, N.P.Yeruqin, V.A.İlyin, V.İ.Krılov, V.D.Kupradze, Y.A.Mitropolski, Y.B.Lopatinski və digər alimlər daxil edilmişdi. Məcid Rəsulov bu jurnalın yaradıcılarından biri olub və ömrünün axırına qədər həmin jurnalın redaksiya heyətinin üzvü olmuşdur. O, redaksiya heyətinin bütün üzvlərilə işgüzar yazışmalar aparır və sıx əməkdaşlıq edirdi. 1965-1975-ci illərdə isə Məcid Rəsulov Azərbaycan Dövlət Universitetinin “Elmi əsərlər” (fizika-riyaziyyat elmləri seriyası) jurnalının redaktoru olmuş, 1976-cı ildə Azərbaycan Sovet Ensiklopediyasının elmi redaksiya şurasının üzvü seçilmişdir.

Məcid müəllimin gənc elmi və pedaqoji kadrların hazırlanmasında əvəzsiz xidmətləri olmuşdur. Onun bilavasitə rəhbərliyi altında və yaratdığı kontur inteqralı və çıxıqlar üsulları əsasında 17 namizədlik və 2 doktorluq dissertasiyası müdafiə olunmuşdur.

Öz yaşının çərçivəsinə sığışmayan, olduqca dəyərli elmi və pedaqoji nailiyyətləri olan Məcid Rəsulov üç fundamental monoqrafiyadan başqa 85 elmi məqalənin müəllifidir. Bunlardan biri “Riyaziyyat Elminin Nailiyyətləri” (“Uspexi matematiçeskix nauk”), üçü “Riyazi məcmuə” (“Matematiçeskiy sbornik”), iyirmi üçü “SSRİ EA-nın Məruzələri” (“Dokladı AN SSSR”), on səkkizi “Differensial Tənliklər” (“Differenüialğnıe uravneniə”) jurnallarında çap olunmuşdur. Qeyd etmək yerinə düşər ki, həmin dövrdə adı çəkilən jurnallarda yalnız SSRİ miqyasında tanınmış riyaziyyatçı alimlərin məqalələri çap olunurdu.

Məcid Lətif oğlu Rəsulov 1993-cü il fevral ayının 11-də 77 yaşında əbədiyyətə qovuşmuş, birinci Fəxri Xiyabanda dəfn olunmuşdur. İndi o vaxtdan 23 il keçir. Lakin illər bir-birini əvəz etsə də əbədiyaşar alimin əziz xatirəsi daim etiramla yad edilir. Xalqımızın və riyaziyyatçılarımızın ona olan məhəbbəti vaxt, zaman çərçivəsindən çıxaraq daimiləşmişdir.

Akademik Məcid Rəsulov elm və təhsil sahələrində əvəzsiz xidmətlərinə görə, ölkəmizin elm tarixində dünya şöhrətli alim, nümunəvi qayğıkeş pedaqoq, səmimi və sədaqətli vətəndaş kimi xalqımızın qəlbində daim yaşayacaq.

Misir MƏRDANOV

fizika-riyaziyyat elmləri doktoru

Aynur HƏSƏNOVA

fizika-riyaziyyat elmləri namizədi

525-ci qəzet.- 2016.- 2 iyul.- S.10-11.