KÜL ÜSTÜNDƏ BİTƏN ÇİÇƏK

Kül üstündə bitən çiçək,

Nə keçmişdi, nə gələcək.

Kim qalacaq, kim gedəcək,

Söylə, kimdən xəbər alaq.

lll

Bu yerlərin altı küldü,

Külək əsdi kül də güldü.

Kimlər qaldı, kimlər öldü,

İndi gərək küldən soraq.

lll

Bu yerlərin nəyi vardı,

Kim qazandı, kim apardı.

Külü örtən yağan qardı,

Yağdır gəlsin qalaq-qalaq.

lll

Məzar yurdun yaddaşıdır,

Tarix olub yük daşıdır,

Hər bir vərəq başdaşıdır,

Oxuyuram varaq-varaq.

lll

Ağ gül əksən bu torpağa,

Vermək üçün hər qonağa,

Qaraxallı gül bitəcək

Danışacaq dodaq-dodaq-

İmkan vermə, ağlayacaq.

ELBA ÇAYI

Hey axırsan özb aşına,

Nə yazırsan çay daşına,

Qoymayırsan dərd daşına -

Yurda qalıb, Elba çayı.

lll

Bulanlıqlar durulubmu,

Axar yolun burulubmu,

Ləpələrin yorulubmu,

Harda qalıb, Elba çayı?!

lll

Tariximin alın təri

“Dədə Qorqud” şah əsəri.

Mirzə Şəfi nəğmələri

Burda qalıb, Elba çayı.

lll

Gördüyümü yoza-yoza,

Nə söyləyim Kür-Araza?!

Nəyin qışdan çıxıb yaza -

Darda qalıb, Elba çayı.

lll

Necə olub toyun yası,

Yadda saxlar su aynası.

Ocaq sönüb can yanğısı -

Qorda qalıb, Elba çayı.

lll

Yuxusunda kim sayıqlar,

Sularında kök arıqlar,

Yorğun düşmüş ağ balıqlar -

Torda qalıb, Elba çayı.

lll

Yola salıb durnaları,

Çox udmusan yayda qarı.

Qaranlığın imzaları -

Nurda qalıb, Elba çayı.

P.S.

Gedirsən bir ağır yük çəkə-çəkə,

Sualtı qayalar-qara təhlükə.

Nə yaxşı axırsan dayanmayırsan,

Dayansan, zaman da dayanar bəlkə.

OLMAMIŞAM

Qoyun-keçi otarmışam,

Fəqət çoban olmamışam.

Ali məktəb qurtarmışam,

Yaxşı qanan olmamışam.

lll

Neçə hədəf haqlamışam,

Dalda qalan olmamışam,

Tütək alıb saxlamışam,

Zurnaçalan olmamışam.

lll

Tanrı verib, fələk alıb,

Doğru-yalan olmamışam.

Nəyim gedib, nəyim qalıb,

Könlü talan olmamışam.

lll

Üzülənə qan vermişəm,

Sadağa qan almamışam.

Can verənlə can vermişəm,

Mən canalan olmamışam.

lll

Etibarlı qələmdi şam,

O alışıb, mən yanmışam.

Söz vermişəm, söz almışam -

Bu alverdə qocalmışam.

QISAQAPANMA

Sözün yerə düşməsi,

Gözün gözə düşməsi

İlk sevgi öpüşməsi -

qısaqapanma.

Körpələrin gülməsi

Göz yaşını silməsi

Doğmalığı bilməsi

qısaqapanma.

Qısaqapanmanın

qılıncı var

Hər şeyi qapalı

Yandırar-yanar.

Nə qədər atılsa da

Qapanmadı qısalar.

Qısa qapanmayırsa

Yasa qapanma -

Çağır yanaşına gəlsin

Qısaqapanma.

NECƏSƏN

Bənzəsən də gülə sən,

Gah gündüz, gah gecəsən.

Gülmək... Ağlamaq nədi,

Sən güləndə özgəsən,

Ağla görüm necəsən.

GÖDƏKÇƏLƏR

Dizə çatmır

diz gileyli

İzə çatmır

iz gileyli

Canla alış-verişdədi -

Gödəklər

göz gileyli.

Bizə çatmır

biz gileyli.

Nələr bilir görən nələr

Gülləkeç məz

Gödəkçələr,

Gödəkçələr - yedəkçilər.

QAÇAQAÇ

Say dalınca qaçırıq

Dərd az olsa yaxşıdı.

Çay dalınca qaçırıq

Dayaz olsa yaxşıdı.

lll

Pay dalınca qaçırıq

Muraz olsa yaxşıdı.

Tay dalınca qaçırıq

Taraz olsa yaxşıdı.

lll

Bu nə yaman qaçaqaç

Bu nə qaçma - tutmadı.

Qaçanlar qaçdı getdi

Tutanlar tutammadı.

VİZA

Köçəri quşlara viza kim verir...

Meteor daşlara viza kim verir,

Soyuq yağışlara viza kim verir?

Mənə viza verin, gedim göylərə.

lll

Kəpəzin göz yaşı Göygöl, göy dərə,

Xəyalım az qalır göydən göy dərə.

İxtiyar kağızı istəyir hərə

Mənə viza verin, gedim göylərə.

lll

Bulud sinəsini göylərə sərə,

Uçaram zirvədən gül dərə-dərə,

Ge dir sərnişinsiz, boş gedir bərə,

Mənə viza verin, gedim göylərə.

lll

Görüm Nuh hardadı, gəmisi harda,

Adəmin buğdası, zəmisi harda,

Dünyanın alimi, dəlisi harda,

Mənə viza verin, gedim göylərə.

GÜMÜŞ

Gümüş kəmər oldu beli sıxanda,

Gümüş xəncər oldu al qan axanda,

Gümüş güzgü olub üzə baxanda,

Gördü qızıl dişi ağız qoruyur.

lll

Gümüş qədəh oldu içə bilmədi,

Qiyməti neçədi seçə bilmədi,

Qızıldan qabağa keçə bilmədi,

Gördü ki, qiyməti kağız qoruyur.

lll

Adını çəkmədim qəmər incidi,

Sayını bilmədim nəmər incidi,

Qaranlıq uzandı səhər incidi,

Gördüm qara xalı ağ üz qoruyur.

lll

Gecə göyə baxdım, gümüş ay oldu,

Gümüş camda gələn gümüş pay oldu,

Uca buz dağları ağ saray oldu,

Gördüm ki, bəyazı ayaz qoruyur.

lll

Balıqlar dənizdə içir ağ sudan

Balıqsız çıxanda ağlar tor sudan

Görən nə umur ki uca dor sudan

Yelkəni küləkdən dəniz qoruyur.

CAZİBƏ

Hanı məndə o ixtiyar

Ki, hər əmrə verim qərar?!

Özbaşına deyiləm ha,

Məni şair eyləyən var.

Bu cazibə görən nədi,

Hər nədirsə möcüzədi,

O istəyin gövhəridi,

Onsuz həyat əfsanədi.

Yandırmağı yaxmağı var,

Durub gendən baxmağı var,

Torpaq kimi doymazlığı,

İldırımtək çaxmağı var.

Məhəbbətin anasıdı,

Soyuq sözdən donasıdı,

Axtarmağa cəhd eləmə,

Ünvanını danasıdı.

Yer başına ay dolanır,

Qış dolanır, yay dolanır,

Nə qovuşmur sevdasına,

Nə tapammır, tay dolanır.

Bizi gözlər gözü yolda,

Başı daim qeyli-qalda.

Hamımızı çəkir yerə,

O nə görüb bu vüsalda.

PANTOMİMA

Pantomima - lal oyunu,

Gəl başa sal, hər qoyunu.

Qırmaq üçün kəl boyunu,

Külək ki var, kifayətdi.

lll

Etiraza söz nə gərək,

Əyriliyə düz nə gərək,

Ölmək üçün göz nə gərək,

Ürək ki var, kifayətdi.

lll

Öz başını fırla, dolan,

Töküləcək güclə dolan,

Öyünməsin hər canalan,

Fələk ki var, kifayətdi.

lll

Yavan yemə duz çörəyi,

Bir gün çörək yeyər səni.

Qiblə bilmə hər küləyi,

Çörək ki var, kifayətdi.

İLĞIM

Həqiqətdi, yalandı,

Gözlərimə dolandı,

Getdim gördüm dalandı,

İlğım kimə qalandı,

İnanmadım qeybinə.

lll

Dedim bəlkə yuxudu,

Onu xəyal toxudu,

Mən çaldım o oxudu,

Əl vurmamış yox oldu,

Varlığı nə, qeybi nə.

lll

Maraq yedi bağrımı,

Uddum ürək ağrımı,

O qorxdu mən utandım,

Geri döndüm özümə,

Çəpər çəkdim eybimə.

lll

Yuxu deyil yozasan,

Yazı deyil pozasan,

O istəyir azasan,

Apara o dünyaya,

Mat qalmışam meylinə.

HEYİF

Nə ülfət kömürlə şiş arasında,

Bişməyə gəlmisən biş arasında,

Bir söz gizləmişdim diş arasında,

Dil dedi, el bildi sirr heyif oldu.

lll

Arazın dilləri, Kürün dilləri,

Öpüb sığalladı göy sahilləri,

Suya zəhər atdı nadan əlləri,

Araz yaralandı Kür heyif oldu.

lll

Sevilən aşiqdən məşuq nə dilər,

Açıb ürəyini sözə süfrə sər,

Çaşıb bir gözələ Dürrə dedilər,

Vəfası olmadı, dürr heyif oldu.

lll

Zirvəyə çatmadı qırıq səslərim,

Susmadı özümlə gedən bəhslərim,

İkidən başladı həyat dərslərim,

Sıfırdan yan keçdi, bir heyif oldu.

lll

Bir palıd qoymuşdum iki sahi lə,

Durub gözləyirdik bəlkə yar gələ,

Körpü axıb getdi qoşuldu selə,

Əl əldən üzüldü tir heyif oldu.

lll

Kölgələr başına dönüb dolaşmır,

Aşiqin yol gəlir, fəqət dağ aşmır,

Daha o gözlərə sürmə yaraşmır,

Bu ömrü sürməsiz sür, heyif oldu.

SÜDƏMƏR

Gah vulkanlar od ağzından

Kül püskürür, görür hərə.

Gah da göylər gül ağzından

Daş atır ki, dəysin yerə.

lll

Zarafatdı, ya davadı,

Bilinməyir bu nə tələ.

Hələ bəşər südəmərdi,

Batır yüksələ-yüksələ.

RÜBAİL

525-ci qəzet.- 2016.- 18 iyun.- S.22.