Xalq şairi Süleyman Rüstəm “Əsri” məzarlığında

Azərbaycan Xalq Cümhuriyyətinin yaranmasının 85 illiyinə

“Əsri” məzarlığına gedən yolu heç vaxt ot basmayacaq

2002-ci ildə M.Ə.Rəsulzadənin əsərlərinin 2-ci cildi doğma vətənində işıq üzü gördü. Mən onun bir nüsxəsini çoxdan bəri tanıdığım və “Təfəkkür” Universitetinin jurnalistika kafedrasında birgə çalışdığımız Azad müəllim Şərifova da verdim. Məmnun oldu və dedi ki, sənə 1966-1969-cu illərdə, Türkiyədə Moskvanın dövlət qəzeti “İzvestiya”nın xüsusi müxbiri işlədiyim dövrdə M.Ə.Rəsulzadə, Azərbaycan mühacirləri və onların övladları haqqında maraqlı xatirələr danışaram. Əlbəttə məni ən çox M.Ə.Rəsulzadə ilə əlaqədar faktlar maraqlandırırdı. Dedi ki, mən onları hazırlayıram, yəqin ki, “Zerkalo” qəzetində verəcəm, oxuyarsan. Verdi, mən də məmnuniyyətlə oxudum. Tarixi sənəddir: “Ankaranın “Əsri” məzarlığına gedən yolu heç vaxt ot basmayacaq”.

Əziz oxucular, “Zerkalo” qəzetinin 2003-cü il 24 may nömrəsində dərc olunmuş, qüdrətli qələm sahibi, vətəni Azərbaycanı candan sevən, 2009-cu ildə dekabrın 24-də 79 yaşında dünyasını dəyişən Azad Şərifovun bu xatirəsini siz də oxuyun. Əmin olun ki, “Əsri”nin, o cümlədən, Üzeyir Hacıbəylinin “Vətən övladı” adlandırdığı M.Ə.Rəsulzadənin anadan olduğu Novxanı kəndinin də yolunu heç vaxt ot basmayacaq.

Azad Şərifovun məqaləsində diqqətimi cəlb edən məqamlardan biri Xalq şairi, kommunist Süleyman Rüstəmin Ankaranın “Əsri” məzarlığında M.Ə.Rəsulzadənin qəbrini ziyarəti oldu.

Arzu edirəm ki, Xalq şairi Bəxtiyar Vahabzadənin vaxtilə yazdığı şeirindəki “verəmmədik” sözü “verdik”lə əvəz olunsun:

Bu torpağın özü boyda

Bu torpağa məhəbbətlə doluydun.

Bu torpağın yolunda da

Sən öz canın qoydun.

Borclu ikən vətən sənə, xalq sənə

Hər şey döndü tərsinə.

Verəmmədik bu torpaqdan

Bir məzarlıq yer sənə.

Şirməmməd HÜSEYNOV

525-ci qəzet.- 2016.- 5 mart.- S.15