Səməd Vurğunun ev-muzeyində ədəbi-bədii kompozisiya

Martın 10-da Xalq şairi Səməd Vurğunun ev-muzeyində AYTAM uşaqların mədəni maarifləndirilməsi İctimai Birliyinin (İB) təşəbbüsü ilə “Vətənimizi və dilimizi qoruyaq!” adlı ədəbi-bədii kompozisiya təqdim olunub.

AZƏRTAC xəbər verir ki, tədbir iştirakçıları əvvəlcə muzeyin foyesində şagirdlərin rəsmlərindən ibarət sərgiyə baxıblar.

Muzeyin əməkdaşı Səidə Abdullayevanın “Səməd Vurğun yaradıcılığında vətənpərvərlik” mövzusunda məruzəsi dinlənilib.

Tədbirdə İB-nin sədri Aygün Zamanlı, tarix üzrə fəlsəfə doktoru Məhəmməd Teymurlu, şair-publisistlər Rauf İlyasoğlu, Z.D.Qayalı və başqaları Azərbaycan poeziyasının görkəmli nümayəndəsi S.Vurğunun və bu ocağın yetirdiyi böyük qələm sahibləri - Yusif və Vaqif Səmədoğluların əvəzsiz xidmətlərindən danışıb, onların yetişməkdə olan gənc nəslin vətənpərvər ruhda böyüməsi üçün qoyub getdikləri qiymətli ədəbi irsdən söhbət açıblar.

Sonra Xan Şuşinski adına Ağdam Muğam musiqi məktəbinin fortepiano sinfinin və Azərbaycan Milli Konservatoriyası nəzdində musiqi kollecinin şagirdlərinin ifasında Səməd Vurğunun və Vaqif Səmədoğlunun Vətənə, ana dilimizə həsr etdikləri şeirlər əsasında hazırlanmış “Vətənimizi və dilimizi qoruyaq!” mövzusunda ədəbi-bədii kompozisiya təqdim olunub.

Sonda ev-muzeyinin direktoru Nüşabə Vəkilova şagirdlərə, müəllimlərə minnətdarlığını bildirib. Vurğun ocağında hər zaman, ənənəvi olaraq böyüməkdə olan gənc nəslə diqqət və qayğı olduğunu və bu ənənənin davam etdiyini vurğulayıb.

Fərqlənən şagirdlərə, İctimai Birliyin üzvlərinə Vaqif Səmədoğlunun kitabları təqdim edilib.

525-ci qəzet.- 2016.- 12 mart.- S.13