Repressiya və sürgün illəri
“525-ci qəzet” Xalq yazıçısı Anarın
“Yaşamaq haqqı” traktatından ayrı-ayrı hissələrin
dərcini davam etdirir.
Xatırladaq
ki, ötən saylarımızda əsərin “Avqust putçu
və sistemin iflası”, “İlk maarifçilərimiz”, “Tarixi
şans - 21 Azər”, “Qara Yanvar”, “Heydər Əliyevlə
vida”, “Nəriman Nərimanovun faciəsi” və digər
bölümləri dərc olunmuşdu.
Qəzetin bu sayında isə “Repressiya və
sürgün illəri” adlı parçanı oxuculara təqdim
edirik.
1920-ci ilin aprelində bolşeviklər Azərbaycan
hökumətinə hakimiyyətin təhvil verilməsi
haqqında ultimatim ünvanladılar. XI Qızıl Ordunun
Bakıya girmədən Mustafa Kamalın Qurtuluş
savaşına qatılmaqçün Anadoluya gedəcəyi və
müstəqil Azərbaycanın dövlət xadimləri təqib
olunmayacağı haqda vədlər verilirdi. Amma elə aprelin 28-də, istilanın ilk günü
bütün bu vədlər pozuldu, qoşun Bakıya soxuldu və
dövlətin vəzifəliləri qaçan qaçdı,
qalanlar həbs olundu, güllələndi, sürgün edildi.
Azərbaycan Xalq Cümhuriyyətinin yüzlərcə
fəalı ölüm düşərgələrinə
göndərildi.
“Buzlu cəhənnəmdə” bizim məhbuslarla eyni
düşərgədə olmazın əzablara düçar
olan rus yazıçısı Oleq Volkov sürgündə
qarşılaşdığı azərbaycanlı məhbuslar
haqqında səmimiyyət və alicənablıqla söz
açır.
O müsavatçıların mənəvi və fiziki işgəncələ
məruz qalaraq həlak olmalarından, özlərini necə böyük
mətanət və ləyaqətlə aparmalarından,
bütün dözülməz əzab-əziyyətlərə
tab gətirərək məğrur və ruhən
qırılmaz qaldıqlarından heyranlıqla yazır. Bu barədə
O.Volkov “Zülmətə atılmışlar” kitabında belə
bəhs edir:
“O zaman
Butırkadan Solovkiyə sürgün olunan Müsavat
partiyasının üzvlərinin sayı üç yüz nəfərə
yaxın idi. Azərbaycan türk
ziyalıları idi. Qarşımda onacan bilmədiyim
özünəməxsus bir dünya
açılmışdı - əcdadlarının ənənələrini
və əqidələrini qorumaq üçün, öz
azadlığı uğrunda sonadək mübarizə aparan kiçik
bir xalqın dünyası... Solovkidə o
müsavatçılarla yan-yanaşı yaşayanda mən
onların ağsaqqallarına necə övlad kimi hörmətlə
yanaşdıqlarını, ümumiyyətə
yaşlıların qayğısına necə
qaldıqlarını, nələri varsa, süfrədə
qardaşcasına paylaşdıqlarını, namaz qılmaq
üçün bir guşə axtarana necə diqqətlə
yanaşdıqlarını gördüm... Onlara
baxdıqca mən rus cəmiyyətində son onilliklərdə
həddini aşan vəhşiliklər barədə
ağır düşüncələrə dalırdım.
Əyalət xalqları ilə müqayisədə
bizim xarakterlər necə də qaba və qəddar idi”.
O.Volkov qeyd edir ki, ilk vaxt bütün
müsavatçıları köhnə monastırın
korpuslarının birində yerləşdirmişdilər,
amma sonra onları bir-birindən ayırmağa cəhd göstərdilər
və bu zaman onlar aclıq elan etdilər.
“Müsavatçıların əksəriyyəti sonacan
dözməyə köklənmişdilər. Könüllü
olaraq özlərini ölümə məhkum edənlər həyatın
başqa bir tərəfində olan adama - mənə yad kimi
baxırdılar. Lap onlara dost olduğumu bilsələr də...
Amma axırda onları sındırdılar.
Söz verdilər ki, düşərgənin rəisi
Eyxmans özü gəlir və onların istəklərinə
əməl ediləcək, hamısını yenə bir yerə
köçürəcəklər. Bu vəddən
sonra dərhal yemək gətirdilər - isti süd,
düyü. Əlbəttə ki onları
aldatdılar. Bilirdilər ki,
ölümün astanasında üç həftə
aclıq çəkəndən sonra yeməyin ləzzətini
dadan insanın yenidən ölüm sınağına
çıxmağa iradəsi çatmayacaq. Yalnız müsavatçıların
ağsaqqalı və onun bir neçə yaxın dostu əyilmədilər.
Mən onları yola gətirmək istədim.
Ağsaqqal qətiyyətlə: - Mən ölmək qərarına
gəlmişəm-dedi.-Ona görə yox ki həyatı sevmirəm.
Yox, ona görə ki, biz onsuz da hamımız
ölümə məhkumuq. Çoxumuz bu qışdan
çıxmayacaq, ola bilsin ki, hamı vərəmə
tutulmasın, amma salamat qalanları da məhv edəcəklər
-güllələyəcəklər, ya da başqa üsullarla
yox edəcəklər. Bizi Solovkiya elə ona
görə gətiriblər ki, müstəqilliyimizdən əsər-əlamət
qalmasın. Bakıda biz onlarçün
real təhlükəli rəqiblər idik. Bizə və bizim məqsədlərimizə elə
böhtanlar atılıb ki, mən xalqımın faciəsini
qısa şəkildə belə izah edə bilmərəm.
Gözlərini yumdu və bir xeyli susdu. Onun arıq
sifətində mən vicdanının qəbul etmədyi
qanunlarla barışmayan, təslim olmaqdansa, ölməyə
üstünlük verən insanın sarsılmaz iradəsini
gördüm. Amma axırda zarafat etdi: - Mən təklif
etdim ki, yerimizi dəyişdirsinlər, bizi bu soyuq adadan günəşli
Şamaxıya göndərsinlər. Mənim
üzümlüklərimə, çinarlarıma, sevimli meyvə
bağlarıma baş əymədən ölmək
olarmı? Əlvida dost. Sənin kimi
rusları biz sevirik.
Mən bu anları 1986-cı ildə xatırlayıb
yazıram və qanrılıb uzun ömrümə nəzər
salanda rus xalqına - qüdrətli, fateh və
istilaçı xalqa mənsub olduğuma görə xəcalət
çəkdiyim məqamları xatırlayıram. Bu hissi macar tələbələrlə
söhbət etdiyim dəqiqələrdə də
keçirmişdim. Müsavatçıların
faciəvi aqibətləri gözlərimin önündə
duranda mən elə vicdan əzabı çəkirəm ki,
sanki özüm də zəiflər üzərində bu
zorakılığın, zülmün
iştirakçısıyam”.
Rəhmətlik
Oleq Volkovun kitabından bu parçaları gətirməklə
onu demək istəyirəm ki,mən də
rus xalqını məhz bax bu qocaman yazıçı kimi
vicdanlı övladları olduğuna görə sevirəm və
ona təəccüblənirəm ki, növbənöv
cızmaqaraları dilimizə çevirməyə tələsdiyimiz
halda belə bir kitabı hələ də tərcümə
edib xalqımıza çatdırmamışıq.
Bizim məhbusların mətin və qürurlu
davranışları haqqında rus
yazıçısının şəhadəti yadıma əziz
dostum mərhum İldəniz Qurtulanın bir şeirini
saldı. İldəniz bəyin atası müsavatçı
Əjdər də “buzlu cəhənnəmdən”
keçmiş və möcüzəylə qurtula bilmişdi.
(Soyadları Qurtulan da burdandır). İldəniz
bəyin “ÇEKA-da” şeiri belədir:
Günəşin
batmasına doğru
Hər
axşam
Andırardı
atam
ağır-ağır:
“Gündüzlər
işgəncə,
Gecələr
Çökərdi
üstümüzə
Ölüm kölgələri.
Bəzimiz
çıldırar,
Bəzimiz
şərqi söylər,
Aldırmaz.
Fəqət
həp
Ayaqda
durur
mərd
ölür
bizimkilər orada.
Müsavatın fəal xadimlərindən olan doktor
B.E.Ağaoğlu Sovet həbs düşərgələrinin
ilk məhbuslarındandır. 20-ci illərin axırlarında
SSRİ-dən qaça bilib və mühacirətdə Solovki
haqqında xatirələrini yazıb:
“1927-ci ildə Azərbaycandan siyasi məhbuslar aclıq
aksiyası elan edəndə bütün məhbuslar - ukrainlər,
gürcülər, dağlılar, türküstanlılar və
başqaları onlara qoşulmaq və azərbaycanlı
dostlarına dəstək olmaq niyyətlərini bildirdilər. Bu qərar həyata
keçmədi, ancaq ona görə ki, azərbaycanlılar
özləri buna razı olmadılar. Amma mənəvi
cəhətdən bu təklifdən məmnun
qalmışdılar, öz gözləriylə görüb əmin
olmuşdular ki, bu uzaq şimalda, yadların arasında, sərt
şaxtada, peşəkar cəllad-çekistlərin
caynağında yalqız deyillər. Eyni
faciənin və eyni amalın birləşdiyi bütün
qeyri-rus Rusiyası azərbaycanlılarla həmrəyliyini
nümayiş etdirdi”.
Bütün
bu acıdan-acı olaylarla tanış
olarkən mən böyük rus yazıçısı
F.M.Dostoyevskinin haçansa çoxdan oxuduğum “Ölü
evdən qeydlər” əsərini xatırladım. İnsanın məşəqqətlərini təsvir
elən bu sarsıdıcı əsəri yenidən vərəqləyərkən
yazıçının katorqada ünsiyyət
bağladığı Qafqaz türklərinə nə qədər
böyük rəğbətlə
yanaşdığını, onlara kövrək duyğular bəslədiyini
gördüm. Dostoyevski onları
“Dağıstan tatarları” adlandırır, amma məlumdur ki
o zamanlar Qafqazda Azərbaycan türklərinə ruslar tatar
deyirdilər. Dostoyevski cavan Alevi
(görünür Əlidir) xüsusiylə xoş
duyğularla təsvir edir. Bu əsər haqqında şərhlərdə
deyilir: “Ölü evdən qeydlər”də Dostoyevskinin sevimli
qəhrəmanı sakit təbiətli və mehriban gənc
Alevdir”. Həmin şərhlərdə oxuyuruq: “Şəxsi
saflıq və xeyirxalıq, dini barış, məhəbbət
- Dostoyevskinin öz sevimli qəhrəmanlarına bəxş
etdiyi başlıca cizgilər -bunlardır”.
Beləliklə deyə bilərik ki,
Mışkinin (“İdiot”) və Alyoşanın (“Karamazov
qardaşları”) obrazlarını yaradarkən bu
personajların təməl cəhətlərini Dostoyevski hələ
“Ölü evdən qeydlər” əsərində, Alevin
(Əlinin) surətində qələmə alıb.
Pravoslav bayramında sərxoşluğu
təsvir edən Dostoyevski vurğulayır ki, qafqazlılar
bütün bunlara maraqla yanaşı ikrah hissiylə
baxırdılar. Qafqaz türklərindən biri isə
elə hey deyirdi: “Yaman, yaman, ux, yaman” - Dostoyevski məhz bu
sözü yazır. - Allahın qəzəbinə
tuş gələcəklər”.
Sovetləşmənin ilk günlərindən Azərbaycanda
hər hansı müqavimət ocağını
amansızcasına yerlə-yeksan edirdilər, hətta ən
kiçik silahlı dəstələri də bandit
adlandıraraq məhkəməsiz, istintaqsız güllələyirdilər. Az-çox iş
qabiliyyyəti olan kəndlilər qolçomaq adıyla məhv
edilirdi. “Azərbaycan və eləcə də Qafqaz şəraitində
qolçomağın bir sinif kimi məhv edilməsi əhalinin
başlıca kütləsinin ucdantutma qırılmasından
başqa bir şey deyildi”(M.Ə.Rəsulzadə).
İngilis yazıçısı Corc Oruelin “1984”
romanı antitotalitar nəsrin ən maraqolı örnəklərindəndir. Roman 1948-ci ildə
yazılıb,müəllif son iki rəqəmi
tərsinə çevirərək gələcəkdə ola
biləcək dəhşətləri təsvir edir. Bu əsərdə məni hər şeydən
öncə çox dərin və dəqiq bir müşahidə
valeh edir. Romandakı repressiya qurbanı son
nəhayətdə “Böyük qardaşı” - onu
acımasız təqib edən Diktatoru - sevməyə
başlayır. Görəsən Oruel Sovet həbsxanalarında
bir çoxlarının (özəlliklə də kommunistlərin)
edam öncəsi “Yaşasın yoldaş
Stalin!” deyə bağırdıqlarından xəbərdar
idimi? Axı, qurbanların bir çoxu belə zənn
edirdi ki, bütün bu müdhiş qanunsuzluqlar böyük rəhbərin
xəbəri olmadan edilir. Bizim günlərdə
açılmış saysız-hesabsız sənədlər
əsasında Stalin rejiminin inanılmaz qəddarlığı
və bütün bu qanunsuzluqların onun şəxsi
iştirakı, razılığıyla və
tapşırığıyla baş verdiyi məlum olandan
sonra, əhalinin böyük bir hissəsi Stalini hələ də
Rusiyanın Siması hesab edir, “yeni Stalini” ya ona bənzərini
arzulayır ki, gəlib bu “bezpredeldə” nizam-intizam
yaratsın, yəni az qala xalqın yarısını
qırsın. Hər kəs də elə zənn edir ki, onun
şəxsən kin bəslədiyi, ya həsəd çəkdiyi,
nifrət, paxıllıq etdiyi adamlar cəzalandırılacaq,
özünə isə heç kim
gözün üstə qaşın var deməyəcək. Bu isə bütün zamanların ən acı
aldanışıdır.
Stalin
dövrünün görünməmiş cinayətləri
haqqında Soljenitsının “QULAQ takım
adaları”(”Arxipelaq QULAQ”),Varlam Şalamovun “Kolıma hekayələri”,
Sürgündə həlak olmuş şair Osip
Mandelştamın dul qalmış arvadı Nina
Mandelştamın memuarları, Ginzburqun (yazıçı
Vasili Aksyonovun anası) “Sərt marşrut”u, ingilis
yazıçısı R.Konkvistin “Böyük terror” və
onlarca başqa sənədli mətnlər yayımlanandan sonra
da tarixin ən zülmkar diktatoruna bəraət qazandıranlar
az deyil.
Stalin mifi neçə-neçə nəslin
şüuruna çox dərin şəkildə nüfuz edib. Bəlkə də
Stalin ölkənin çoxmilyonlu əhalisini öz iradəsinə
tabe etdirən, onları bihuş edən sehrbaz, hipnozçu
imiş. Hipnoz bu gün də davam edir.
Mən Stalini tarixdə həm də ən gec ölən və
ola bilsin, ümumiyyətlə heç vaxt
ölməyən tiran adlandırardım.
Şəxsən məni ən çox əzablara məhkum
olunmuş günnahsız uşaqların taleyi həyəcanlandırır. Osvensimi ziyarət
edərkən məni bir vitrinə yığılmış,
üst-üstə qalanıb tillə vurmuş uşaq
ayaqqabıları - məhv edilmiş uşaqların çəkmələri
sarsıtdı. “QULAQ takim adalarında” hansısa xırda
bir xətasına görə gecə vaxtı barakdan
çölə atılan, şaxtadan, soyuqdan donan yeniyetmə
qızcığazın: “dayıcan, mən bir də belə
iş tutmaram, məni içəri buraxın” - deyə
gözətçi-cəllada yalvardığını oxuyanda
adamın tükü biz-biz olur. Soljenitsın deyir: mən bu an qərar verdim, hökman sağ qalmalıyam,
yaşamalıyam ki, o qızın müsibətindən
yazım.
Nəsiman Yaqublunun
kitabından da bir məktubu gətirmək istəyirəm.
Bu məktubu ağlasığmaz işgəncələrə
məruz qalandan sonra güllələnmiş Ruhulla Axundovun 14
yaşlı oğlu Fərid dayələri Aleksandra Dmitrievnaya
yazıb:
“İstəkli
Şuracan. Bu sənə
yazdığım ikinci məktubdur. Biz
Nelya ilə (Fəridin bacısı) NKVD-nin uşaq evində
yaşayırıq. Burada yaşamaq
çox çətindir, bayıra buraxmırlar və
oxumağa məktəb də yoxdur. Bütün
günü sizi, bizim evi, məktəbi, öz
doğmalarımı düşünürəm. Adamların yanında ağlamıram, amma içimdə
həmişə ağlayıram. Şuracan,
əzizim, Nelyanı da, məni də buradan götür.
Qohumları, yaxınları
çoxlarını gəlib aparır. Bizi
götürmək istədiyini məktubla NKVD-yə - Korana
yazmalısan. Və əgər o icazə
verərsə gəlib bizi buradan götür.
Çünki lap yaxın bir zamanda bizi buradan ayrı-ayrı
uşaq evlərinə göndərəcəklər”.
Mən bu
məktubu Nəsimanın kitabından 1997-ci il
avqustun 31-də köçürmüşdüm ki, yazmaqda
olduğum (və təəssüf, hələ də yazıb
bitirmədiyim) xatirələr-düşüncələr
kitabıma daxil edim. O zaman 60 yaşım vardı. Bu yaşa qədər çox şeylər
görmüşdüm, ən yaxın və doğma
insanlarımı itirmişdim. Mənə
elə gəlirdi ki, emosiyalara qapılmamaqçün kifayət
qədər bərkimişəm. Amma bu məktubu
köçürəndə (onda mən hələ
kompüterdə işləmirdim, qələmlə
yazırdım) göz yaşlarımı saxlaya bilmirdim və
onlar vərəqin üstündə mürəkkəbə
qarışıb ləkə salıblar. İndi bu vərəqləri
çevirdikcə o mürəkkəbə bulaşmış
göz yaşlarımın izlərini görürəm...
REDAKSİYADAN: Martın 14-ü görkəmli ədibimiz
Xalq yazıçısı Anarın doğum
günüdür. Bu münasibətlə Anar müəllimi
ürəkdən təbrik edir, ona cansağlığı,
yeni yaradıcılıq uğurları arzulayırıq.
ANAR
525-ci qəzet.- 2016.- 12 mart.- S.10-11