Qəzənfər Paşayevin yeni kitabları təqdim olunub

Tanınmış ədəbiyyatşünas-alim, professor Qəzənfər Paşayevin yeni kitablarının təqdimatı keçirilib. "Əta Tərzibaşının folklorşünaslıq fəaliyyəti" və "Ədəbi məktublar" adlı kitablar müəllifin yaradıcılığının müəyyən dönəmlərini əks etdirmək baxımından əlamətdardır.

Birinci kitabda oxucular böyük türkmən alimi Əta Tərzibaşının folklor fəaliyyəti ilə tanış olur, ələlxüsus, İraq türklərinin keçmişini, ədəbiyyatını və qismən də həyat tərzini öyrənir, nəticədə "Əta Tərzibaşının folklorşünaslıq fəaliyyəti" iki türk xalqı arasında körpü rolu oynayan mədəni əhəmiyyətli bir əsər kimi öz yerini tutur. "Ədəbi məktublar"da isə tanınmış yazıçılara, alimlərə, söz və qələm adamlarına ünvanlanmış, onların yaradıcılığına işıq tutan bir-birindən maraqlı məktublar yer alıb.

Tədbiri Milli Kitabxananın direktoru Kərim Tahirov açaraq Q. Paşayevin yaradıcılığından bəhs edib: "Qəzənfər müəllimin "Ədəbi məktublar"ı istər alimlərin, söz-sənət adamlarının qiymətləndirilməsi, istərsə də bu məktubların onlara ruh, qol-qanad verməsi baxımından xüsusi məna kəsb edir. Qəzənfər müəllim bununla yanaşı İraq, Türkmən, Kərkük folklorunun bir küll halında ərsəyə gəlməsində əvəzsiz rol oynayıb. Hələ Sovet dövründə, yəni bizə qanı, dili, dini bir olan soydaşlarımızın uzaq olduğu vaxtlarda onları bizə tanıtdırıb, sevdirib".

Akademik Teymur Bünyadov alimin şəxsiyyətinin kitablarında əks olunduğunu vurğulayıb: "Qəzənfər müəllim sadə, səmimi, istiqanlıdır və bu xarakter onun bütün kitablarından bir ana xətt kimi keçməkdədir. Onun məktubları dərin, həssas, məzmunlu yanaşmalarla zəngindir".

Professor Şirindil Alışanlı alimin filoloji fikrə təsirindən söz açıb: "Qəzənfər təkcə dilçi alim, yalnız filoloq deyil, həm də mədəniyyətşünas, kulturoloqdur. Azərbaycan ədəbiyyatının elə bir görkəmli nümayəndəsi yoxdur ki, Qəzənfər müəllim onun haqqında yazmasın. O, Azərbaycan bədii dilinə, bədii təfəkkürünə yaxşı bələddir. İraqla bağlı əsərlərində təkcə İraq- türkmən folkloru yox, onların xalq mahnıları, musiqiləri də tədqiq edilib. Əta Tərzibaşı necə iraqlıların sevimlisidirsə, Qəzənfər Paşayev də bizim filoloji fikrin sevimlisidir".

Xalq şairi Nəriman Həsənzadə alimin şərəfli həyat yolu keçmiş önəmli ziyalılarımızdan biri olduğunu söyləyib: "Qəzənfər Paşayev həm Azərbaycanda, həm Türkiyədə, həm də Kərkükdə öz zəkası, sözü ilə abidə qoymuş bir ziyalıdır ".

Xalq şairi Sabir Rüstəmxanlı, millət vəkili Qənirə Paşayeva, alimlərdən Bədirxan Əhmədli, Mahirə Quliyeva, Buludxan Xəlilov, Məmməd Əliyev, iraqlı qonaqlar Mustafa Ziya və Şəmsəddin Kuzəci və başqaları çıxış edərək Q. Paşayevin əsərləri, təqdimatı keçirilən yeni kitabları barədə düşüncələrini paylaşıblar.

Sonda Q.Paşayev çıxış edərək tədbir iştirakçılarına, yaradıcılığı barədə fikir söyləyənlərə minnətdarlığını bildirib.

Müşfiq ŞÜKÜRLÜ

525-ci qəzet.- 2016.- 29 mart.- S.2