Toponimika elmimizin böyük uğuru
Dilçilik elmində özünəməxsus yer tutan
onomastikanın mühüm tərkib hissələrindən
biri də oykonimlər, yəni yaşayış yerlərinin
adlarıdır.
Tarixin möhürü, silinməz izləri və
yaddaşı sayılan oykonimlər bütövlükdə
xalqın keçmişini, mədəniyyət və
etnoqrafiyasını, eləcə də dil tarixini öyrənmək
baxımından mühüm əhəmiyyət
daşıyır. Yaşadığımız günlərdə
həm də siyasi əhəmiyyəti ilə seçilən
oykonimlər sırasında hazırda Ermənistan adlanan ərazidəki
tarixi oykonimlərin tədqiqi xüsusilə mühüm
aktuallıq kəsb edir. Məlum olduğu
kimi, 1980-ci illərin sonlarından Ermənistan SSR-nin ölkəmizə
qarşı əsassız ərazi iddiaları ideoloji
mübarizədən hərbi-siyasi müstəviyə
keçdi və bu siyasətin acı nəticəsi olaraq qədim
türk diyarı olan bölgədə yaşayan yerli aborigen
xalq - azərbaycanlılar genosidlə müşahidə olunan
deportasiyaya məruz qaldı. Ermənilərin
azərbaycanlılara qarşı soyqırım siyasəti təkcə
yerli xalqın deportasiyası və onların kütləvi
şəkildə qətlə yetirilməsi ilə bitmir.
Bu siyasətin kökündə 1930-cu illərdən
başlayaraq Ermənistan SSR ərazisində mövcud olan Azərbaycan
mənşəli oykonimlərin məqsədyönlü şəkildə
erməniləşdirilməsi siyasəti, daha doğrusu, mənəvi
soyqırım məsələsi dayanır. Bu
baxımdan vətənpərvər ziyalı, istedadlı tədqiqatçı
Sitarə Mirmahmudovanın bu yaxınlarda işıq
üzü görmüş "Ermənistan ərazisində
Azərbaycan mənşəli oykonimlər və onların erməniləşdirilməsi
siyasəti" adlı dəyərli kitabı (Bakı, TEAS
Press Nəşriyyat evi, 2015, 384 səh) böyük elmi-siyasi əhəmiyyət
daşıyır və mühüm
aktuallığı ilə seçilir.
Azərbaycan
toponimikasında yeni elmi istiqamətin əsasını qoyan bu
dəyərli kitabda hazırda Ermənistan adlanan ərazidəki
Azərbaycan mənşəli yer adları, çaylar,
göllər, təpələr, dağ silsilələri
sistemli və ətraflı şəkildə
araşdırılır, bir sıra olduqca mühüm elmi və
siyasi əhəmiyyət daşıyan dəyərli nəticələr
ortaya qoyulur. Qeyd edək ki, Sitarə Mirmahmudova 1980-ci ilin fevral
ayında Azərbaycan SSR Elmlər Akademiyasının
Coğrafiya İnstitutunun dissertanturasına qəbul olunur və
öz istəyi ilə Ermənistan ərazisində Azərbaycan
mənşəli oykonimlərin tədqiqi mövzusunu namizədlik
dissertasiya kimi seçir və altı il ərzində bu dəyərli
araşdırmasını uğurla başa çatdırır.
İndiki İrəvan şəhərində dünyaya
göz açan, erməni dilini yetərincə bilən, onun
incəliklərinə bələd olan müəllif bu sanballı
elmi işi ilə bağlı Ermənistan SSR ərazsindəki
ümumi sayı 800-ə yaxın olan Azərbaycan mənşəli
kənd və şəhərləri, qəsəbələri,
el-obaları qarış-qarış, addım-addım gəzmiş,
bu yerlərin qocaman sakinləri ilə görüşlər,
söhbətlər keçirmiş və əldə etdiyi materialları
ümumiləşdirərək, onlar üzərində hərtərəfli
tarixi-coğrafi və linqvistik araşdırma
aparmışdır. Sitarə Mirmahmudova bu elmi
araşdırmalarının nəticələri olaraq
1986-cı ildə namizədlik dissertasiyanı uğurla
başa çatdırır, bununla da Azərbaycan toponimika
elminə öz dəyərli töhfəsini verir.
S.Mirmahmudovanın bu tədqiqatının ən başlıca
elmi və siyasi dəyəri onda idi ki, müəllif unudulmaq,
yox olmaq təhlükəsində olan çoxlu sayda Azərbaycan
mənşəli oykonimləri bir yerə toplayaraq onları
toponimik fonda daxil etmişdir. S.Mirmahmudovanın dissertasiya işinin aparıcı
müəssisəsi (Azərbaycan Dövlət Tibb
İnstitutu) tədqiqata verdiyi müsbət rəyində
göstərirdi ki, "dissertasiyanın digər müsbət
cəhətləri bir yana, təkcə bu xidmətinə
görə (unudulmuş toponimləri topladığına
görə -M.N) o, yüksək elmi qiymət almağa
layiqdir".
Sitarə Mirmahmudovanın adı çəkilən
kitabının ən başlıca müsbət cəhətləri
və elmi nailiyyətlərindən biri də burada etnooykonim və
etnotoponimlərin müqayisəli şəkildə geniş və
sistemli şəkildə elmi araşdırmaya cəlb edilməsidir.Belə
ki, müəllif tarixi qaynaqlara və tarixi-müqayisəli
metoda söykənərək adı çəkilən ərazidə
yaşamış bir sıra türk tayfa və tirə
adlarını müəyyənləşdirməyə nail
olmuşdur. Bu mənada müəllifin indiki Ermənistan ərazisində
tarixən mövcud olan oykonimlərin Cənubi Qafqazda
yaşayan türk xalqlarının tarixi ilə bilavasitə
bağlılığı haqqındakı fikirləri
xüsusilə əhəmiyyətlidir və
yaşadığımız dövrdə mühüm
aktuallığı ilə seçilir. Qeyd
edək ki, Sitarə Mirmahmudovanın kitabında yer olan etnonimik
mənşəli oykonimlərin bir çoxuna eynilə Azərbaycan
Respublikası ərazisində də rast gəlirik. Bu mühüm amil bir daha sübut edir ki, hazırda
ermənilərin yaşadığı ərazi Azərbaycan
torpaqlarıdır və əski çağlardan bəri bu
yerlər məhz türk xalqlarına, o cümlədən, azərbaycanlılara
məxsus olmuşdur. Azərbaycan Respublikasının
Prezidenti cənab İlham Əliyev də öz
çıxışlarında dəfələrlə bu amili
vurğulayaraq demişdir: "Hazırkı Ermənistan
dövləti tarixi Azərbaycan torpaqlarında
yaradılmışdır. Həmin ərazidə
erməni mənşəli bir dənə də olsa, yer
adının olmaması buna ən yaxşı
sübutdur".
Qeyd edək ki, Sitarə Mirmahmudovanın gərgin
axtarışlarının və fəal vətəndaşlıq
mövqeyinin nəticəsi olan bu dissertasiya işinin müdafiəsi
1986-cı ilin dekabr ayının 24-də yüksək səviyyədə
keçmiş və Azərbaycan SSR Elmlər
Akademiyasının Coğrafiya İnstitutunun nəzdində fəaliyyət
göstərən ixtisaslaşdırılmış Müdafiə
Şurasının qərarı ilə müəllifə
coğrafiya elmləri namizədi alimlik dərəcəsi
verilmişdir.
Dissertasiya Şurasının sədri, Coğrafiya İnstitutunun
direktoru, akademik Həsən Əliyev şuranın
iclasında S.Mirmahmudovanın bu elmi işinə yüksək
qiymət verərək demişdir: "Bu cür
dissertasiyaları alqışlamaq lazımdır. Hər hansı bir xalq, millət nəyin hesabına
varlığını qoruyub saxlayır? Öz
dili, torpağı hesabına. Bunlar olmasa, xalq da olmaz... Bu çox vacib məsələdir, toponimik tədqiqatlar
lazımlıdır, onlar ölkənin tarixi
keçmişinin öyrənilməsinə kömək edir.
Mənə elə gəlir ki, istənilən
halda coğrafi adları dəyişmək, başqa dilə
çevirmək arzu olunan deyil, bu, elmə ziyan gətirir.
Məncə, müzakirə olunan işi kitab şəklində
çap etdirməyə ehtiyac var. Mövzusuna və
dolğunluğuna görə iş çox faydalıdır,
maraqlıdır və gələcək nəsillər
üçün, habelə toponimika ilə
məşğul olanlar üçün idrak baxımından
faydalıdır".
Azərbaycanın ən tanınmış təbiətşünas
aliminin, vətənpərvər və təəssübkeş
ziyalısının Sitarə Mirmahmudovanın elmi tədqiqatı
haqqında söylədiyi bu qiymətli fikirlər
yaşadığımız günlərdə daha aktual səslənir
və gələcəkdə bu yöndə yeni-yeni
araşdırmaların aparılmasının zəruriliyini
bir daha təsdiq edir.
Qeyd etmək lazımdır ki, Sitarə Mirmahmudovanın
dissertasiya işi həmin dövrün tələblərinə
görə rus dilində yazılmış və 1987-ci ilin əvvəllərində
Moskvaya - Ali Attestasiya Komissiyasına göndərilmişdir. Lakin bir müddət sonra
Sitarə xanım
adı çəkilən qurumda çoxdan bəri
kök salmış erməni alimlərinin
açıq-aşkar təzyiqi nəticəsində
dissertasiya işini öz istəyi ilə Moskvadan geri
götürmək məcburiyyətində
qalmışdır.
Həm
rus dilində, həm də Azərbaycan dilində olan hazırkı
kitaba gəldikdə isə, qeyd edim ki, o, adı çəkilən
dissertasiya ilə yanaşı,
müdafiəyə dair rəsmi sənədləri, yəni
arxiv materiallarını da özündə birləşdirir.
Kitabdakı təkcə başlıqların özü:
oronimik oykonimlər, xəritələr, hidronimik oykonimlər,
fitotoponimik oykonimlər, zoooykonimlər, etnonimik oykonimlər,
patronimik oykonimlər, antroponimik oykonimlər, hibrid oykonimlər
və s. araşdırmanın əhatə dairəsinin nə dərəcədə
genişliyini, əhatəliliyini və dərinliyini sübut edir. Qeyd edim ki, kitabdakı əlavələr hissəsinə
hazırkı Ermənistan ərazisində mövcud olmuş
Azərbaycan mənşəli oykonimlərin lüğəti,
eləcə də dəyişdirilmiş oykonimlərin
siyahısı da əlavə edilmişdir ki, bu da tədqiqatın
elmi-təcrübi dəyərini daha da artırır.
Məlum olduğu kimi, toponimika dilçilik elminin sahələrindən
biri sayılır. Bununla belə, məsələyə dərindən və
əməli şəkildə yanaşdıqda toponimikanı
üç elmin: tarix, coğrafiya və dilçiliyin
qovşağı olan bir elm sahəsi kimi qəbul etmək daha
məqsədəuyğun olardı.Belə ki, toponimikanın
başlıca obyekti toponimik vahidlərdir ki, onlar da ilk növbədə
xalqın tarixinə, mədəniyyətinə, folkloruna aid
qaynaqlarda qeydə alınmışdır. Bu mənada
toponimlərin, eləcə də oykonimlərin öyrənilməsi
xalqın tarixi, yayılma arealı, düşüncə
sistemi, həyata baxışı, dünyagörüşü,
sosial vəziyyəti ilə bağlı bir sıra məsələlərin
düzgün və elmi əsaslarla həlli üçün
yardımçı olur. Bunu elə Sitarə
Mirmahmudovanın dəyərli kitabında verilən materiallar
və onların təhlili də əyani şəkildə
sübut edir. Sitarə Mirmahmudovanın dissertasiya
işinin elmi rəhbərlərindən birinin görkəmli
tarixçi alim (professor Yusif Yusifov), digərinin
isə tanınmış coğrafiya mütəxəssisi
(dosent Rəmzi Yüzbaşov) olması da belə bir qənaətə
gəlməyə tam əsas verir.
Onu da qeyd edim ki, Sitarə xanımın bu dəyərli tədqiqatı çox keçmədi ki, öz bəhrəsini verdi: sözügedən bölgədəki oykonimlərin öyrənilməsinə yol açdı, yeni-yeni toponimik tədqiqatlar işıq üzü gördü.
Bundan əlavə Sitarə Mirmahmudovanın bu kitabı digər qonşu bölgələrdə (məsələn, Gürcüstanda, Dağıstanda, Əfqanıstanda, İraqda və s.) mövcud olan Azərbaycan mənşəli oykonimlərin öyrənilməsi üçün də əlverişli zəmin yaradır. Düşünürəm ki, yaxın gələcəkdə adı çəkilən ərazilərdə mövcud olan (və ya olmuş) Azərbaycan mənşəli oykonimlərin bu cür sistemli və ətraflı araşdırılmasına böyük ehtiyac vardır. Kitab həm də bütövlükdə götürdükdə toponimikanın Azərbaycan elmi üçün nə dərəcədə əhəmiyyətli bir sahə olduğunu, gələcəkdə bu istiqamətdə daha sanballı elmi araşdırmaların aparılmasının zəruriliyini açıq-aşkar şəkildə sübut edir.
Bütövlükdə hesab edirəm
ki, Sitarə Mirmahmudovanın yüksək vətənpərvərlik
ruhunda qələmə aldığı "Ermənistan ərazisində
Azərbaycan mənşəli oykonimlər və onların erməniləşdirilməsi
siyasəti" kitabını Azərbaycan toponimikası sahəsində
indiyədək aparılmış ən uğurlu tədqiqatlardan
biri kimi dəyərləndirmək olar. Düşünürəm
ki, kitabın bu cür nəfis tərtibatla işıq
üzü görməsi bütün mənalı həyatını
doğma xalqının övladlarının maarifləndirilməsi
işinə həsr etmiş, uzun müddət indiki Azərbaycan
Dövlət Pedaqoji Universitetində coğrafiya fənni
üzrə müəllim vəzifəsində
çalışmış Sitarə xanım Mirmahmudovanın
ruhunu şad edəcəkdir. Bu işi öz öhdəsinə
götürmüş tanınmış diplomat, xeyirxah
ziyalı Həsən Zeynalovun nəcib əməyi də hər
cür təqdirəlayiqdir. Toponimika elmimizin böyük
uğuru olan bu dəyərli kitabın elmi redaktoru tarix üzrə
fəlsəfə doktoru Fərhad Cabbarovdur.
Möhsün NAĞISOYLU
AMEA-nın müxbir üzvü,
AMEA Nəsimi adına Dilçilik İnstitutunun direktoru
525-ci qəzet.- 2016.- 31 mart.- S.7.