"Gəncə - Avropanın Gənclər Paytaxtı 2016" layihəsinin başlanğıc tədbiri keçirilib

"Gəncə - Avropanın Gənclər Paytaxtı 2016" layihəsinin başlanğıc tədbiri keçirilib.

Qədim və həmişəcavan şəhərimizin 2016-cı il üçün Avropanın Gənclər Paytaxtı seçilməsinin çox qürurverici bir hadisə olduğunun vurğulandığı tədbirdə bu yöndə il ərzində aparılacaq işlər müzakirə olunub.

Qeyd edilib ki, şəhərin 2016-cı il Avropa Gənclər Paytaxtı seçilməsi ilə əlaqədar tədbirlər haqqında" Azərbaycan Respublikası Prezidentinin 2016-cı il 24 fevral tarixli sərəncamını əsas tutaraq Gəncə şəhərində keçiriləcək tədbirlərin vaxtında və mütəşəkkil həyata keçirilməsini təmin etmək məqsədilə Gəncə şəhər İcra Hakimiyyətinin başçısının müvafiq sərəncamı ilə bu yöndə fəaliyyətin koordinasiyası üçün qərargah yaradılıb.

Qərargah üzvlərinin və şəhər ictimaiyyəti nümayəndələrinin iştirakı ilə keçirilən ilk toplantıda "Gəncə -Avropa Gənclər Paytaxtı 2016" layihəsinin start götürdüyü elan edilib. Cari il ərzində Avropa gənclərinin diqqət mərkəzində olacaq bu qədim və müasir şəhərdə ölkəmizlə bağlı həqiqətlərin qitə və dünya ictimaiyyətinə çatdırılmasını daha mütəşəkkil təşkil olunmasının vacibliyi vurğulanıb.Şəhər Gənclər və İdman Baş İdarəsinin rəisi Müşfiq Cəfərov il ərzində keçiriləcək layihələr və təşkilati məsələlərlə bağlı ətraflı məlumat verib.

Gəncə şəhər İcra Hakimiyyətinin başçısı Elmar Vəliyev Gəncənin Avropanın Gənclər Paytaxtı seçilməsini Azərbaycanı və Gəncəni təmsil etmək baxımından çox mühüm bir hadisə olduğunu diqqətə çatdırıb. O, xüsusi vurğulayıb ki, bu tədbirin yüksək və beynəlxalq səviyyədə keçirilməsi məhz Gəncə ictimaiyyətinin üzərinə böyük vəzifələr qoyur. Şəhər rəhbəri qeyd edib ki, tədbirlər planına uyğun olaraq işlərə artıq start verilib.

Daha sonra tədbirin daha uğurlu təşkili üçün fikir mübadiləsi aparılıb, gənclər və ictimaiyyətin nümayəndələri tərəfindən irəli sürülən təkliflər müzakirə olundu.

Xatırladaq ki, Avropa Gənclər Paytaxtı "Avropa Gənclər Forumu"nun (AGF) həyata keçirdiyi beynəlxalq layihədir. AGF qitə ölkələrinin Milli Gənclər Şuralarının və qeyri-hökumət gənclər təşkilatlarının beynəlxalq platformasıdır. AGF ilk dəfə Avropa Gənclər Paytaxtı (AGP) layihəsini 2009-cu ildə həyata keçirib. Avropanın ilk gənclər paytaxtı Rotterdam şəhəri (Niderland , 2009), daha sonra Turin (İtaliya, 2010), Antverpen (Belçika, 2011), Braqa (Portuqaliya , 2012), Maribor (Sloveniya, 2013), Saloniki (Yunanıstan, 2014) və Kluj Napoca (Rumıniya, 2015) şəhərləri olublar.

Hər hansı şəhərin Avropa Gənclər Paytaxtı seçilməsi, orada fəal gənclər fəaliyyətinin həyata keçirilməsindən, gənclərin yüksək məlumatlılıq və inkişaf səviyyəsindən xəbər verir. Gənclər paytaxtı seçilən şəhər bir il ərzində gənclər sahəsində həyata keçirdiyi proqram və layihələr haqqında məlumatı Avropa ölkələrinə nümayiş etdirmək imkanı qazanır. Avropa Gənclər Paytaxtının seçimi münsiflər heyəti vasitəsilə həyata keçirilir.

Gəncə şəhəri 2016-cı ildə Avropanın Gənclər Paytaxtı olmaq üçün 2014-cü ildən Avropa Gənclər Forumunun təşkil etdiyi müsabiqəyə qoşulub. Müsabiqədə Avropanın müxtəlif ölkələrindən olan 12 şəhərlə yarışan Gəncə hədəfinə yaxınlaşmağa nail olub. Müsabiqənin final mərhələsinə adlayan Gəncə digər 5 şəhərlə Badajoz (İspaniya), Galvay (Şimali İrlandiya), La Laguna (İspaniya), Varna (Bolqarıstan) və Vilnüs (Litva) şəhərləri ilə yarışıb və qalib gəlib.

Qeyd edək ki, 2012-ci ildə Gəncə şəhəri Azərbaycanın Gənclər Paytaxtı da olub.

Zakir MURADOV

Gəncə

525-ci qəzet.- 2016.- 31 mart.- S.2.