Milli Kitabxanada müşavirə keçirilib

Dünən Milli Kitabxanada respublikanın aparıcı kitabxanalarının, Bakı şəhər MKS-nin və universitet kitabxanalarının iştirakı ilə müşavirə keçirilib.

Müşavirənin məqsədi mövcud kitabxana qanunvericiliyinin müasir kitabxanaların qarşısında duran vəzifələrlə tam uyğunlaşdırılması, yeni qanunvericilik aktlarının hazırlanması məqsədilə təkliflərin işlənməsi və müvafiq orqanlara təqdim olunmaq üçün təkliflərin hazırlanması olub.

Tədbiri Milli Kitabxananın direktoru Kərim Tahirov açaraq "Kitabxana işi haqqında" Qanunun 90-cı illərin ortalarında yazıldığını, o dövr üçün mükəmməl olduğunu, lakin bu günün tələblərinə cavab vermədiyini, digər əlaqəli qanunlarla uzlaşmadığını, kitabxanaların komputerləşdirilməsi, virtual xidmət, elektron kitabxanaların yaradılması və fəaliyyəti, respublika çap məhsullarının Arxiv Fondunun yaradılması, nəşr məhsullarının qeydiyyatının aparılması və sair məsələlərlə bağlı qanunun təkmilləşdirilməsinin zəruriliyindən danışıb, hətta qanuna yeni maddələrin əlavə olunmasını məqsədəmüvafiq hesab edib.

Azərbaycan Respublikası Prezidentinin İşlər İdarəsi Prezident Kitabxanasının direktoru Mayıl Əhmədov, AMEA Mərkəzi Elmi Kitabxanasının direktoru Leyla İmanova, F.Köçərli adına Respublika Uşaq Kitabxanasının direktoru Şəhla Qəmbərova, C.Cabbarlı adına Respublika Gənclər Kitabxanasının direktoru Tahir Sadıqov, Respublika Elmi Pedaqoji Kitabxananın direktoru Tamilla İsmixanova və başqaları çıxışlarında qanunun yenidən işlənməsi üçün İşçi qrupun və Koordinasiya Şurasının yaradılmasının zəruriliyini qeyd ediblər. Onlar kitabxanaların yerli və xarici nəşrlərlə komplektləşdirilməsində, elektron kitabxananın əlyetərliliyində mövcud olan problemlərin, kitabxanaçının hüququ, sosial vəziyyətinin yaxşılaşdırılması məsələlərinin, kitabların universal standartlara uyğun rəqəmsallaşdırılmasının, kitabxanaçıların peşə bayramının təyin olunmasının, kitabxanalar üçün vahid kitab satış mərkəzinin yaradılması məsələlərinin qanunla tənzimlənməsinə toxunublar.

Müşavirənin sonunda bir ay müddətində təkliflərin hazırlanıb təqdim olunması qərara alınıb.

525-ci qəzet.- 2016.- 19 may.- S.7.