Musiqi sahəsində Azərbaycan-İtaliya əlaqələri genişlənir

Bugünlərdə İtaliyanın Espressione d`Arte assosiasiyasının təşəbbüsü ilə Ü.Hacıbəyli adına Bakı Musiqi Akademiyası (BMA) və Luigi Cherubini Konservatoriyası arasında ERASMUS proqramı çərçivəsində İtaliya ilə Azərbaycan musiqi mədəniyyəti və təhsilinin mübadiləsinə əsaslanan layihə həyata keçirilib.

Layihədən məqsəd tələbə və müəllimlərin mübadilə proqramı və konservatoriyalar arasında təhsil əlaqələrinin inkişafıdır.

Layihə çərçivəsində İtaliya nümayəndə heyəti - Florensiyanın Luigi Cherubini konservatoriyasının prorektoru, I Briconcello Ensemble-nin üzvü, vokal ifaçısı professor Leonardo de Lisi (tenor), Espressione d`Arte assosiasiyasının direktoru, I Briconcello Ensemble-nin üzvü, violonçel ifaçısı Pierluigi Ruggiero və konservatoriyanın tələbələri Daria Neçayeva (violin), Giuseppe Sturace (tenor), eləcə də Luigi Cherubini konservatoriyasının tələbələri ilə BMA-nın professorları - Fidan Qasımova və Fatima İdiatulina və Akademiyanın tələbələrinin iştirakı ilə ustad dərsləri təşkil olunub.

BMA-nın Beynəlxalq əlaqələr və tərbiyə işləri üzrə prorektoru, Xalq artisti Yeganə Axundova və Akademiyanın professoru Zəhra Quliyeva İtaliya musiqiçiləri ilə birgə Azərbaycan, italyan və digər Avropa bəstəkarlarının əsərlərindən ibarət konsert proqramı ilə çıxış ediblər. Öncə Leonardo de Lisi, Giuseppe Sturace və Yeganə Axundovanın müşayiəti ilə İtalyan bəstəkarı Francesso Paolo Tostinin romansları səsləndirilib. Vokalistlər solo və duet şəklində olduqca təsirli romansları çox böyük ustalıqla ifa ediblər. F.P.Tostinin "Good-bye" əsəri isə italiyalı ifaçıların birgə ifasında səslənib. Violonçel ifaçısı Pierluigi Ruggieronun ifasında Xalq artisti Sevda İbrahimovanın "Əzizlərimin xatirəsinə" silsiləsindən violonçel və piano üçün 2 pyesi ifa olunub. Azərbaycan musiqisini italiyalı ifaçının interpretasiyasında eşitmək dinləyicilərdə maraqlı təəssürat yaradıb. Konsertdə macar bəstəkarı F.Listin iki əsəri - "Rumın rəqsləri" Luigi Cherubini konservatoriyasının tələbəsi Daria Neçayevanın ifasında (violin), "Libestraum" isə vokal, violin, cello və pianonun birgə təqdimatında dinlənilib. Tədbirin ən önəmli məqamlarından biri italiyalı ifaçıların dahi bəstəkar Ü.Hacıbəylinin "Sevgili canan" və "Aşıqsayağı" əsərini səsləndirməsi olub. Bu, heç də təsadüfi bir məqam deyildi. Hər iki konservatoriyanın birgə əməkdaşlığına həsr olunmuş konsert çərçivəsində Azərbaycan Dövlət Konservatoriyasının - indiki Bakı Musiqi Akademiyasının əsasını qoymuş dahi bəstəkar Ü.Hacıbəylinin əsərlərinə müraciət etməklə onun xatirəsi bir daha yad edilib. Səslənən ifalar auditoriya tərəfindən gurultulu alqışlarla qarşılanıb.

Sonda Leonardo de Lisi və Pierluigi Ruggiero zalda əyləşən dinləyicilərə, eləcə də BMA-nın rəhbərliyinə dərin minnətdarlıq bildirərək layihə barəsində qısa məlumat veriblər. Layihənin davamı olaraq azərbaycanlı musiqiçilərin İtaliyaya səfər edəcəkləri vurğulanıb. Bu səfərin 1-5 noyabr tarixlərində gerçəkləşməsi nəzərdə tutulur. Səfər zamanı professorlar Yeganə Axundova və Zəhra Quliyeva Luigi Cherubini konservatoriyasının tələbələri ilə, BMA-nın tələbəsi Mahir Tağızadə isə Luigi Cherubini Konservatoriyasının professorları ilə ustad dərslərində olacaq. Həmin günlərdə Roma və Florensiya şəhərlərində Azərbaycan və İtaliya musiqiçilərinin birgə konsertinin keçirilməsi planlaşdırılıb.

Lalə NAMİQQIZI

525-ci qəzet.- 2016.- 1 noyabr.- S.7.