Sadıq Elcanlının 60 yaşına

Gözəl nasir, publisist, neçə-neçə ekran işinin uğurlu taleyində böyük əməyi olan Sadıq Elcanlının qəzetlərdə, ədəbi dərgilərdə işıq üzü görən yazılarını hər dəfə oxuyanda nəsrimizin klassik ənənələrindən gələn özünəməxsus ifadə tərzi sayəsində, heç imzaya baxmadan da, onların kimin qələmindən çıxdığını təxmin edə bilirəm.

"Sözün güneyləri çağırır məni, yaxud bir ömrün monoloqu" adlı essesini "525-ci qəzet"də oxuduqda anladım ki, Sadıq Elcanlının bu yeni yazısı, demə, öz 60 illik yubileyi ərəfəsində onun təkcə monoloqu yox, həm də oxucularına səmimi müraciəti imiş! Həmin "Monoloq" haqqında ədəbi düşüncələrim, oxucu fikirlərim bir yana, bəri başdan, qələm dostumuzu - əzizimiz Sadıq Elcanlını 60 illik yubileyi münasibəti ilə təbrik edirəm!

Nə yaxşı ki, qəzetin həmin sayını, adətimcə, başdan-ayağa oxudum və onun qarşıdan gələn ad günündən, necə deyərlər, isti-isti, vaxtında xəbər tutdum. Demə, yaxın dostumuzun 60 yaşının tamamına cəmi beşcə gün qalıbmış...

Belə baxanda, heç özümü qınamıram da! Axı, doğulub boya-başa çatdığı doğma Şabranda son illər Sadıq Elcanlı ilə arabir görüşüb həsbi-hal edəndə heç ağlıma-gümanıma gəlməyib ki, o, 60 yaşının astanasındadır.

Özündən əvvəl onun yaradıcılığı ilə tanış olmuşam. Və burası da var ki, qalın-qalın romanlarını oxuyanda o əsərlərin müəllifini, nə gizlədim, müdrik, dünya görmüş, ahıl bir qoca kimi təsəvvür etmişəm.

Bizim Şabran elinin hər yurd yeri, kənd-kəsəyi ululardan üzübəri minillikləri keçib gələn əfsanələr və rəvayətlərlə, nəğmələr və deyimlərlə, eləcə də müdrik el sözləri ilə olduqca zəngindir. Sinəsi kitab-kitab söz, kəlam dolu ağsaqqallar, sinədəftər ağbirçəklər öz yaddaş xəzinəsindəki inciləri ürək genişliyi və səxavətlə, qızırqanmadan nəsillərdən-nəsillərə ötürə-ötürə gəliblər və bu ənənə indi də yaşayır.

Elə buna görədir ki, Şabranda sözə, söz deməyə daima həvəsli bir mühit var, o həvəsi öz yazı-pozuları, qələmə alıb yaratdıqları ilə göyərdib sənət əsərinə çevirənlər də az deyil! Dəyərli yazıçı dostumuz Sadıq Elcanlı kimi!

Yəqin ki, doğma Şabranda da onun yubileyini layiqli bir tədbirlə qeyd edəcəyik, həmyerliləri öz səmimi ürək sözlərini elə doğulub boya-başa çatdığı torpaqdaca Sadıq Elcanlıya çatdıracaqlar. Deməli, yeni görüşlərimiz hələ irəlidədir.

İndilikdə isə öz qələmi ilə Azərbaycanımızın ədəbi xəritəsində Şabranımızı uğurla təmsil edən, yerli-yataqlı tanıdan, çağdaş nəsrimizin ədəbi yükünün ağırlığına qürurla çiyin verən gözəl yazıçımızı, publisistimizi, ədəbi tənqidçimizi - əziz qələm dostumuzu anadan olmasının 60 illiyi münasibəti ilə bir daha ürəkdən təbrik edirəm.

Sadıq Elcanlıya yeni yaradıcılıq uğurları, uzun ömür, möhkəm cansağlığı arzulayıram.

Şabran

7 yanvar, 2016

Novruz Nəcəfoğlu

525-ci qəzet.- 2016.- 13 yanvar.- S.7