Milli Kitabxanada Rumın Poeziyası Günü qeyd edilib

Yanvarın 15-də Bakıda, Milli Kitabxanada Rumın Poeziyası Günü keçirilib.

Tədbiri Milli Kitabxananın direktoru Kərim Tahirov açaraq qonaqları salamlayıb. O, Rumın-Azərbaycan mədəni, siyasi, iqtisadi əlaqələrindən qısaca danışaraq, Mədəniyyət və Turizm Nazirliyinin Kitab dövriyyəsi və nəşriyyatlarla iş şöbəsinin sektor müdiri Aslan Cəfərova söz verib.

Tədbirin böyük rumın şairi Mixay Emineskunun adı ilə bağlı olduğunu deyən A.Cəfərov ədibin Rumıniya və dünya ədəbiyyatına gözəl əsərlər bəxş etdiyini, onun əsərlərinın bir çox dillərə çevrildiyini vurğulayıb.

Rumıniya səfiri Daniel Kristian Çiobanu bu əlamətdar günü Bakıda qeyd etməsindən qürur duyduğunu bildirib.

Rumın Poeziyası Gününün Azərbaycan Milli Kitabxanasında qeyd olunmasının ədəbiyyata, mədəniyyətə, incəsənətə verilən yüksək qiymət olduğunu deyən səfir Mədəniyyət və Turizm Nazirliyinə, Milli Kitabxananın kollektivinə minnətdarlığını ifadə edib.

Azərbaycan Yazıçılar Birliyinin katibi Rəşad Məcid rumın ədəbiyyatından, Emineskunun yaradıcılığından, Rumıniya və Azərbaycan mədəni əlaqələrindən danışıb.

Ədəbiyyatşünas Nüşabə Sadıxlı rumın ədəbiyyatı, Emineskunun poetik irsi barədə fikirlərini bölüşüb, Milli Kitabxananın bölmə müdiri, Yazıçılar Birliyinin üzvü Fəridə Hacıyeva Mixay Emineskunun şeirlərini səsləndirib.

Sonda tədbir iştirakçıları rumın mədəniyyəti, ədəbiyyatı və tarixindən bəhs edən kitab sərgisi ilə tanış olublar.

525-ci qəzet.- 2016.- 16 yanvar.- S.17