20 Yanvar qurbanları mədəniyyət ocaqlarında yad edilib

Azərbaycan Dövlət Gənc Tamaşaçılar Teatrında 20 Yanvar faciəsinin 26-cı ildönümünə həsr olunmuş tədbir keçirilib.

AZƏRTAC xəbər verir ki, əvvəlcə şəhidlərin xatirəsi bir dəqiqəlik sükutla yad edilib. Anım mərasimində teatrın direktoru, Əməkdar artist Mübariz Həmidov, teatrın quruluşçu rejissoru, Xalq artisti Cənnət Səlimova çıxış edərək 20 Yanvarın hüzn günü kimi hər il qeyd edildiyini və xalqımızın yaddaşında əbədi iz qoyduğunu diqqətə çatdırıblar. 20 Yanvar faciəsinin Azərbaycan xalqının müstəqillik tarixindəki mühüm rolundan söz açan natiqlər bu qanlı terror aktına hüquqi-siyasi qiymətin verilməsində ümummilli lider Heydər Əliyevin tarixi xidmətlərini xatırlayıblar.

Çıxışlardan sonra yazıçı-dramaturq Tamara Vəliyevanın 20 Yanvar faciəsi qurbanlarının xatirəsinə həsr olunmuş "Mənim ağ göyərçinim" tamaşası nümayiş etdirilib. İki gəncin - Aqillə Turanın saf və nakam məhəbbətini tərənnüm etdirən iki hissəli lirik dramın quruluşçu rejissoru Xalq artisti Cənnət Səlimova, tərtibatçı rəssamı Gürcüstanın Tumanaşvili adına Teatrının baş rəssamı Şota Qlurjidze, musiqi tərtibatçısı Vladimir Neverovdur. Səhnə əsərində əsas obrazları Əməkdar artistlər Nəsibə Eldarova, Rahib Əliyev, aktyorlar İlqarə Tosova, Asya Atakişiyeva, Mirzəağa Mirzəyev, Nigar Məmmədova, Anar Seyfullayev və başqaları canlandırıblar. Tamaşanı "Kaspi" Təhsil Mərkəzinin şagird və müəllim kollektivi izləyib.

Azərbaycan Xalça Muzeyində 20 Yanvar faciəsinin növbəti ildönümü ilə əlaqədar "Unudulmayan tarix" adlı tədbir təşkil edilib. Xalça Muzeyinin direktor vəzifəsini icra edən Mira Məmmədxanova, uşaq muzeyi şöbəsinin rəhbəri Azər Abdullayev və digərləri 20 Yanvar faciəsindən danışıb, o qanlı günlərin xalqımızın tarixinə yazılmış qəhrəmanlıq səhifəsi olduğunu bildiriblər.

Qeyd olunub ki, tədbirin təşkilində əsas məqsəd gənc nəslə qanları ilə müstəqilliyimizi əbədi olaraq şanlı tariximizə həkk edən şəhidləri unutmamağa və qəlblərdə yaşatmağa səsləməkdir.

Tədbirdə muzeyin uşaq teatrının üzvləri tamaşa kompozisiya göstərib, 162 nömrəli orta məktəbin şagirdləri şeirlər deyiblər, Şuşa Dövlət Musiqili Dram Teatrının aktyorlarının ifasında "Yanvarın 20-ci günü" adlı kompozisiya nümayiş olunub.

Sonda H.Sarabski adına 7 nömrəli uşaq musiqi məktəbinin şagirdlərinin çıxışları olub.

Tədbir çərçivəsində, həmçinin uşaq muzeyi şöbəsinin dərnək üzvlərinin əl işlərindən ibarət "Qanlı Yanvar" adlı rəsm sərgisinə baxış keçirilib.

"Abşeron" Rəsm Qalereyasında 20 Yanvar hadisələrinin 26-cı ildönümünə həsr olunmuş "20 Yanvar faciəsi xalqımızın qəhrəmanlıq salnaməsidir" mövzusunda Bakı şəhər orta ümumtəhsil müəssisələrinin şagirdləri arasında təşkil edilən rəsm müsabiqəsinin yekun mükafatlandırma mərasimi keçirilib. Əvvəlcə Bakı Şəhər Gənclər və İdman Baş İdarəsinin rəisi Raqif Abbasov çıxış edərək, 20 Yanvar faciəsinin Azərbaycan xalqının müstəqillik tarixindəki rolundan söz açıb, bu qanlı terror aktına hüquqi-siyasi qiymətin verilməsində ümummilli lider Heydər Əliyevin xidmətlərini xatırladıb. Qanlı Yanvar gecəsi sovet ordusu tərəfindən amansızlıqla qətlə yetirilən şəhidlərin xatirəsinin xalqımızın qəlbində əbədi yaşadığını deyən natiq qeyd edib ki, hadisələrdən ötən 26 il ərzində Azərbaycan müstəqil bir dövlət kimi böyük inkişaf yolu keçib.

Bildirilib ki, rəsm müsabiqəsini keçirməkdə əsas məqsəd gənc nəslə vətənə sevgi və məhəbbət hissinin aşılanması, onlar arasında milli vətənpərvərlik ruhunun təbliğ olunması, istedadlı şagirdlərin rəsm sahəsində öz yaradıcılıqlarını nümayiş etdirmək üçün şəraitin yaradılmasından ibarətdir. Sonda qaliblər mükafatlandırılıb.

Azərbaycan Musiqi Mədəniyyəti Dövlət Muzeyində 20 Yanvar faciəsinin 26-cı ildönümü ilə bağlı tədbir olub. Muzeyin direktoru, Əməkdar Mədəniyyət İşçisi Alla Bayramova çıxış edərək 20 Yanvar faciəsinin Azərbaycan xalqının müstəqillik tarixindəki mühüm rolundan söz açıb, bu qanlı terror aktına hüquqi-siyasi qiymətin verilməsində ümummilli lider Heydər Əliyevin tarixi xidmətlərini xatırladıb.

Qanlı Yanvar gecəsi Sovet ordusu tərəfindən amansızlıqla qətlə yetirilən şəhidlərin xatirəsinin xalqımızın qəlbində əbədi yaşadığını deyən Alla Bayramova qeyd edib ki, hadisələrdən ötən 26 il ərzində Azərbaycan müstəqil bir dövlət kimi böyük inkişaf yolu keçib.

Muzeyin şöbə müdiri Xanım Abdinova çıxış edərək, 1990-cı il yanvarın 19-dan 20-nə keçən gecə dinc və günahsız sakinlərin qətlə yetirilməsindən, Azərbaycanın milli müstəqilliyi və azadlığı uğrunda həlak olanların qəhrəmanlığından bəhs edib.

Sonra Bakı şəhər Mədəniyyət və Turizm İdarəsinin nəzdində fəaliyyət göstərən "İstedad" mərkəzinin musiqiçilərinin ifasında 20 Yanvar şəhidlərinin xatirəsinə həsr edilmiş konsert proqramı təqdim olunub.

525-ci qəzet.- 2016.- 20 yanvar.- S.7