Kitabçılıq sahəsində Azərbaycan-Gürcüstan əlaqələri genişlənir

Yanvarın 28-də M.F.Axundzadə adına Azərbaycan Milli Kitabxanasının direktoru, professor Kərim Tahirov Gürcüstan Milli Parlament Kitabxanasının baş direktoru Giorgi Kekelidze, biblioqrafik resurslar üzrə direktor müavini Levan Taktakişvili və şöbə müdiri Rusudan Asatianini ilə görüşüb.

Kitabxanadan AZƏRTAC-a bildirilib ki, görüşdə qarşılıqlı əməkdaşlıq məsələləri, birgə layihələrin işlənməsi mexanizmi müzakirə olunub.

Azərbaycan və Gürcüstan respublikalarının 1918-1920-ci illər - ilk müstəqillik illərində Bakıda və Tbilisidə çap olunan qəzet və jurnallarının tam komplektlərindən ibarət elektron məlumat bazasının yaradılması ilə əlaqədar müştərək bir layihənin həyata keçirilməsi barədə razılığa gəlinib.

Həmin illərdə Bakıda və Tbilisidə çap olunan dövri mətbuat nümunələrini özündə tam əks etdirəcək bu layihə hər iki ölkənin müstəqilliyinin 100 illiyi ərəfəsində oxucuların və mütəxəssislərin ixtiyarına veriləcək.

Sayt Azərbaycan, gürcü, ingilis və rus dillərində tərtib olunacaq.

Layihənin təqdimatının aprel ayının sonlarında Tbilisi şəhərində hər iki ölkənin milli kitabxana direktorlarının və alimlərinin iştiraki ilə yüksək səviyyədə keçirilməsi planlaşdırılır.

Layihəyə əsasən əhatə olunan dövrdə hər iki ölkədə dərc olunan dövri mətbuat nümunələri rəqəmsallaşdırılaraq 2018-ci ilin yaz aylarında tam elektron məlumat bazasından ibarət müstəqil sayt şəklində azərbaycanlı və gürcü oxuculara təqdim olunacaq.

525-ci qəzet.- 2016.- 29 yanvar.- S.7