Gülsadə İbrahimli "Son tanqo"nu təqdim edib

Aprelin 8-də "Azərkitab" Kitab Təbliği Mərkəzində gənc şair Gülsadə İbrahimlinin "Son tanqo" kitabının təqdimat mərasimi keçirilib.

Tədbiri Dünya Gənc Türk Yazarlar Birliyi Məsləhət Şurasının başqanı, şair-publisist, eyni zamanda kitabın redaktoru olan Əkbər Qoşalı açıb.

Qonaqları salamlayan şair-publisist ədəbi mühitin hazırkı durumundan, gənclərin təhsilə, mütaliəyə, bədii ədəbiyyata marağından danışıb.

Gülsadənin yaradıcılığından söz açaraq, gənc şairənin son kitabının mövzu və məzmun baxımından daha dolğun və rəngarəng olduğunu qeyd edib:

"Daha çox sərbəst şeirə üstünlük verən Gülsadənin dili sadə olduğu qədər də axıcı, yeni ifadələrlə zəngindir".

Yazıçı Aqil Abbas gənclərin ədəbiyyata marağını müsbət qiymətləndirib, bədii sözün insan həyatındakı önəmli rolundan bəhs edib.

A.Abbas kitab industriyasının inkişafının, gənclərin mütaliə bazasının zənginləşməsinin vacibliyini dilə gətirib.

Gənclərə ədəbiyyatla bağlı öz tövsiyələrini verən yazıçı əlavə edib ki, gənc müəlliflərə dəstək hər bir ədəbiyyat sevdalısının gündəmində olmalıdır.

Kənan Hacı, İlqar Türkoğlu, Ənvər Məsud, Zamir Erkin, Şəhriyar Seyidoğlu, İntiqam Yaşar, Əfsanə Ələsgərli, Mahir Qabiloğlu, Niftalı Göyçaylı da söz alaraq şairənin yaradıcılığı və ümumən çağdaş ədəbi mühit barədə fikirlərini bölüşüblər.

Tədbirdə Gülsadə İbrahimli öz şeirlərini səsləndirib, oxucular üçün kitab imzalayıb.

Cavid QƏDİR

525-ci qəzet.- 2017.- 11 aprel.- S.7.