Otuz üç gündür

(şeir)

Sən gedəndən yuxum qaçıb,

Fikrim qarışıb,

Çaşıb ağlım,

Başım çaşıb, oğlum.

Ruhum bu halımla barışıb, oğlum.

Bəlkə heç əvvəldən yuxum yox imiş...

Bəlkə uzun ömrüm,

Bir uzun qarışıq yuxu imiş...

Sən vardın axı,

Sənin hər arpa boyu

Boy atdığını izləyirdim.

Səni yaman gözdən,

Yalan sözdən,

Sürtük üzdən

Ürəyimin içində gizləyirdim.

İndi otuz üç gündü

Bilmirəm ürəyim ağrıyır,

Yoxsa ürəyimin içində sən ağrıyırsan.

Mən ağlamağı bacarmıram, oğlum,

Yəqin ürəyimin içində sən ağlıyırsan.

Oğullar atadan uzun yaşayar.

Atadan sonra

Atasının adını alnında daşıyar.

Bəlkə mən sənin həyatındayam, oğlum.

Gözlərim yatmır,

Havam çatmır,

Ürəyim atmır,

Bəlkə mən də

Torpağın sən yatan qatındayam, oğlum.

Ağlama qurbanın olum.

Mənim də gözlərim dolar,

Bu da sənə bir dərd olar, oğlum...

13.04.2017

Fikrət QOCA

525-ci qəzet.- 2017.- 18 aprel.- S.7.