"Ömrün müdriklik fəlsəfəsi"ndə yazılanlar

İstedadına, fəaliyyətinə çox dəyər verdiyim Kazım müəllimlə - Kazım Məmmədli ilə səmimi bir ünsiyyətimiz var.

Bir dəfə növbəti telefon söhbətimizdə dedi ki, kitabım çıxıb, göndərərəm, oxuyarsan, fikrin maraqlıdır. "Ömrün müdriklik fəlsəfəsi..." adlı növbəti kitabını göndərdi. Bir həftəyə oxudum, amma məni o qədər cəlb etdi ki, yenidən o kitabın üzərinə qayıdıb ikinci dəfə mütaliə elədim. Kazım müəllimə zəng vurub, fikirlərimi bildirdim, yaradıcılıq uğurlarına görə təbrik etdim.

İndi isə o kitablar haqqında düşüncələrimi oxucularla paylaşıram.

Yazdıqlarının çox az hissəsi cəmlənmiş bu kitabda, sözün həqiqi mənasında, taleyin ironiyası ilə ən çətin sınaqlardan keçmiş, düşdüyü hər şəraitə "Alın yazısı" kimi qane olan, həyatda layiq olduğu yeri tapa bilməyən şəxsiyyətin haqlı giley-güzarı var. Həmçinin, müəllifin duyğu dolu xatirələri, gələcək nəsillərə örnək olan görkəmli pedaqoq, gözəl insan, qayğıkeş ailə başçısı, fədakar oğul, qardaş, müdrik ata və babanın tövsiyələri toplanıb bu kitabda. Təsadüfi deyil ki, kitabın ilk səhifəsində Kazım müəllim yazır:

Ömrümün tökülən yarpaqlarını

Düzdüm vərəqlərə incilər kimi.

Kazım müəllim kitabında insanın aliliyinə və sözə çox böyük qiymət verir."Zirvədən aşağı" şeirində müəllif ülviyyətlə bağlı dəyərli mətləblərə toxunur:

"Nöqsanını dərk etsən ülviliyə qovuşarsan, həqiqəti dərk et, ancaq onun tək detallara bölünmə. Çalış əməlinlə bütöv ol, çalış insani əməllərilə yaşa, həm də təmənnasız əməllərlə. Çalış təmiz yaşa, var dövlət əsiri olma. Varidat üçün yuxarı baxma. O aşağıdadır, səndən çox aşağıdadır" - deyir.

Müəllif həmişə haqqa tərəf olmağı təbliğ edir. "Haqqın ətəyindən yapış, - deyir, - haqqa güvən, haqqa tapın! İnsaflı ol, mürvəti əldən vermə, yatdığını kəsmə... İgid belə edər. Özündə güc, iman yarat. Həmişə əqlin gücünü köməyə çağır. Ehtiyatda həmişə güc saxla. Əqli güc-kamil insanı formalaşdırır. Nə qədər çox bilsən də, təvazökar ol".

Kazım Məmmədli insanları xeyirxahlığa çağırır, bildirir ki, bu xasiyyət insanın qanında olmalıdır, genindən gəlməlidir, amma həm də bu hissi özündə tərbiyə etməlisən.O deyir ki, hər kəsin bir yolu olmalıdır:

Allahını tanı, bir yol seç...

Lap cığır da olsa, öz yolun olsun.

"Həyat seçimləri", "Daima uca olsan...", "Ailə qurmaq üçün ömür-gün yoldaşı seçimi", "Maddi inkişaf üçün seçim", "Əsilzadə seçimi", "Dost seçimi", "Yerini tanı" şeirlərində gənc nəslə çox dəyərli, lazımlı məsləhətlər və onların yollarını göstərir.

Uşaqları, öz nəvələrinin timsalında bütün balaları çox sevən müəllif onların soy-kökə sadiqliyinə xüsusi əhəmiyyət verir.

K.Məmmədin kitabını oxuyub düzgün anlamaq üçün müəllifin özünün cızdığı mütaliə cığırı ilə irəliləmək lazımdır:

Diqqətlə oxusan hər bir kəlməni,

Beynində həzm edə bilərsən məni...

Kitabda xalqımızın tarixən təşəkkül tapmış milli-mənəvi dəyərlərindən, qəhrəmanlıq tarixindən bəhs edən yazılarla yanaşı, azərbaycançılıq, dövlətçilik, milli birlik, vətənpərvərlik mövzularına da geniş yer verilib. Misralarından Qərbi Azərbaycan və Qarabağ həsrəti duyulan şeirlər əzəli torpaqlarımızın azad ediləcəyinə bəslənilən nikbin inam hissi ilə birləşərək, əsərin baş xəttini təşkil edir.Yazıların dili aydın, səlisdir.

Müəllif bu kitab üzərində işləyərkən dünya şöhrətli fikir və söz adamları Nəsrəddin Tusidən, İbn Sinadan, Sokratdan, Diogendən, Nizami Gəncəvidən və başqa parlaq zəka sahiblərinin irsindən bəhrələnib.

Kazım Məmmədlinin kitablarını geniş oxucu auditoriyasına ürəkdən tövsiyə edir, yaradıcılıq yolunda müəllifə yeni uğurlar arzulayıram.

Əyyub MƏMMƏDOV

Tibb üzrə fəlsəfə doktoru, Əməkdar həkim

525-ci qəzet.- 2017.- 26 aprel.- S.8.