Məhəmməd Turanın şeirləri

Alışdı sinəmdə qoxun,

Tüstüsü başıma vurdu...

Həsrətin çəkdi yayını

Oxu düz tuşuma vurdu...

Gözlərim şeirlərimdə

Səni gəzir sətir-sətir...

Saçlarındakı ətiri

Axtarıram ətir-ətir...

Necə deyim indi sənə

Daha bitən tab kimiyəm...

Gözünün dərin yerində

Saralan məktub kimiyəm...

Tez küsər, tez barışar-

Könlün uyar qılığa...

Bir az göz yaşı saxla

O biri ayrılığa...

lll

Bilirsənmi, ayrılığın

Dahası, sonrası olmur...

Beş günlük acısı olur,

Bir ömürlük yası olmur...

ən müqəddəs sevdalar da

Unudulur xəyal kimi...

...ən zülmlü ayrılıqlar

Bəzən çəkir xoşbəxtliyə

Bir iz kimi...bir yol kimi...

saçlarında bir vaxt itən

Əllərim tək itirmişəm...

İtirmişəm səni, qadın,

Külək-külək itirmişəm...

Unutdum səni...

Bağışla....

İçimdəki dəli atəş

külə döndü

Bircə anlıq yağışla...

lll

Addımlar asta-asta

Gəzər gecəni, gəzər...

Xəyalım ayaq açar

Sizin küçəni gəzər...

Ulduz qonar çiynimə

Təbəssümə bataram...

Bir röya uyduraram

Dizlərində yataram...

Gözlərimdə bitərsən...

Üstünə yüyürərəm...

Xəyalına sarılıb

Yoxluğunu görərəm...

Gecələri sayıram

Hər nəfəs dilək olur...

Kölgəmlə oynayıram-

Darıxmaq belə olur...

lll

Yoxluğuna çəkiləndən

Bir şeir yaza bilmirəm...

Yazıram, zəif yazıram,

Yazıram, poza bilmirəm...

Qəribsəyir baxışlar da...

Dəli yağır yağışlar da...

Mənə baxır naxışlar da-

Ömrümə düzə bilmirəm...

Sən gedəndən itdi yönüm...

Yol dolayı, dönüm-dönüm...

Nə vaxt çıxar ayaz günüm

Bahara, yaza bilmirəm...

Həyat-adamı təng edən...

Ölmədim, eşqi tərgidəm...

Çatacammı o sən gedən

Cığıra-izə, bilmirəm...

lll

Məni buralarda sevən olmadı,

Uzaqda, uzaqda gözləyənim var...

Gecələr yuxuma girən olmadı,

Gecələr yuxuda səsləyənim var...

Bir qarış dünyadı könlümü sıxan,

Hər şey gözlərimdə qarma-qarışıq...

Sevgidi üzümdən gülüşü yıxan,

Qəlbimin başından parlayan işıq...

Qəriblik sarmaşıb dodaqlarıma...

Boy verir həsrətim hey saçaq-saçaq...

Bilirəm, azacam o yolda-izdə,

Məni uzaqlara kim aparacaq?

lll

Hansı qəmdən üz döndərdim,

Sevincim yoxa çəkildi?

Muradım sola üz tutdu,

Yığvalım sağa çəkildi...

Əllərimə sığışmadı

Bir belə dərd, belə qəm...

Allahsa da görmürdümü

Mən uşağam, çox uşağam...

Gözlərimdə solan ümid

Tökür, tökür dözümünü...

Hələ təzə boy atmışdı-

Yanvarın on üçü günü....

Bir sevgilik vaxtım qalıb...

Bir ömürlük ölüyəm mən...

Başıma dolanın, nolar,

Dəliyəm mən, dəliyəm mən...

525-ci qəzet 2017.- 23 avqust.- S.8.