Əjdər Ol - Oqtay Rzanın şeiri

Adını köksümə yazdım onun da,

Həssas, alicənab, uzaqgörəndir;

Hər il gül qoxulu mayın sonunda

Sabir bayramına rəvac verəndir.

Kimlik, vətəndaşlıq, el şərqisində

Diridir dahimiz, sağdır ulumuz;

Güclü şairlərin ön cərgəsində

Əjdər Olumuz var, Əjdər Olumuz!

Deyir: “Saxlamayaq tənqidi qında,

Qəzet, telegüzgü, salon, kürsü var”;

Neçə yüz ustadın siyahısında

İkicə hərfli təxəllüsü var.

Kitab bağışlayıb gül sərgisində

Nüfuzda dağ kimi uca boylumuz;

Güclü şairlərin ön cərgəsində

Əjdər Olumuz var, Əjdər Olumuz!

Yorulmaq bilmədən hey çalışır ki,

Çətinlik çəkənə dəysin köməyi;

Canlı xəzinəymiş həmkarım sanki,

Sevir az danışıb, çox dinləməyi.

Bünövrə möhkəmdir söz hörgüsündə,

Üzü işıqlımız, içi dolumuz.

Güclü şairlərin ön cərgəsində

Əjdər Olumuz var, Əjdər Olumuz!

Yazarlar Birliyi bəsləyir inam,

Böyük yığnaqların ən fəalıdır;

Alıb millətindən qüvvət, ruh, ilham,

Söhbəti elə bil beçə balıdır.

Payız xəzanında, yay bürküsündə

Misradan-misraya keçir yolumuz.

Güclü şairlərin ön cərgəsində

Əjdər Olumuz var, Əjdər Olumuz!

525-ci qəzet 2017.- 26 avqust .- S.13.