“Əli və Nino” filmi Xorvatiyada nümayiş olundu

Xorvatiyanın Zaqreb şəhərində Azərbaycanın bu ölkədəki səfirliyinin və Xorvatiya-Azərbaycan Dostluq Cəmiyyətinin təşkilatçılığı ilə Qurban Səidin müəllifi olduğu dünya bestsellerinin eyniadlı romanı əsasında ekranlaşdırılan “Əli və Nino” filminin nümayişi keçirilib.

Tədbirdə Xorvatiyanın dövlət və ictimai xadimləri, Zaqrebdə fəaliyyət göstərən diplomatik korpusun təmsilçiləri, QHT-lərin və ictimaiyyətin nümayəndələri iştirak ediblər.

Tədbiri giriş nitqi ilə açan səfir Fəxrəddin Qurbanov sevgi hekayəsindən bəhs edən bu möhtəşəm filmin ekranlaşdırılmasında Heydər Əliyev Fondunun vitse-prezidenti Leyla Əliyevanın işini yüksək qiymətləndirib və tədbirin Azərbaycan ilə Xorvatiya arasında mədəniyyət sahəsində münasibətlərin inkişafına mühüm töhfə verəcəyinə əminliyini ifadə edib.

Filmin süjet xəttindən bəhs edən səfir F.Qurbanov coğrafi baxımdan Avropa ilə Asiyanın kəsişməsində yerləşən Qafqaz regionunun müxtəlif sivilizasiyalar və mədəniyyətlər arasında ixtilafların aradan qaldırılmasında körpü rolu oynadığını qeyd edib, əsrlərboyu bu coğrafiyada müxtəlif etnik və mədəni qrupların sülh və əmin-amanlıq şəraitində birgə yaşadığını diqqətə çatdırıb.

Xorvatiya-Azərbaycan Dostluq Cəmiyyətinin sədr müavini Nataliya Oştariyaş iki ölkə arasında bütün sahələrdə əlaqələrin yüksək səviyyədə inkişafından məmnunluğunu ifadə edib, nümayiş olunan filmin yalnız iki gəncin məhəbbət hekayəsindən deyil, eləcə də Azərbaycan xalqının müstəqillik uğrunda apardığı mübarizə və Azərbaycanda tarixən mövcud olan tolerantlıq və multikulturalizm ənənələrindən bəhs etdiyini vurğulayıb.

Filmin nümayişi ilə yanaşı, tədbir iştirakçılarına “Əli və Nino” əsərinin xorvat dilində dərc olunmuş nüsxəsi təqdim edilib.

XƏDİCƏ

525-ci qəzet 2017.- 16 dekabr.- S.5.