Qüds

Fikrət QOCA

Bu şeiri 1954-cü ildə yazdım, yarımçıq qaldı. 2017-ci il 24 dekabrda vaxtı gəldi, tamamladım. Vaxtı gəlməmiş, tamamlanmamış olsa da, məni bağışlayın. Yaşım çoxdu, vaxtım azdı, vaxta güvənə bilmərəm.

Qüds -

Bütün dinlərin

Həqiqət paytaxtıdı.

Qüds

Fələstin xalqının

Açılmayan baxtıdı.

Qüds -

Vicdan şəhəridi,

Haqsızlıq səhnəsidi.

Qüds

Dili kəsilmiş

Həqiqətin səsidi.

Həm var, həm yox həqiqət,

Tapılmayan həqiqət,

Hər şeydən çox həqiqət...

Həqiqəti axtaran

Axırda dəli olar,

Zəmanədə ucalmaz!

Qocalar gedər zaman,

Qocalar gedər dövran,

Həsrətini çəkdiyim

Həqiqətsə qocalmaz!

Başımın ağarmağı,

Mənim cavan çağımda,

Yaşamaq xatirinə

Yalan danışmağımda,

Deməyin ki, adətdir,

Bu da bir həqiqətdir!

Bir həqiqət axtaran

Daş zindanda olanda,

Üz-gözünə süzülmüş,

Laxtalanmış o qan da,

Onun qulaqlarına

Pıçıldadı xəlvəti:

- Budur mənəm - həqiqət

Axtarma həqiqəti!

Bax başın dəydi daşa...

Bundan sonra əzizim,

Vicdanla ver başbaşa.

Həqiqəti axtarma!

Get həqiqəti yaşa!

1954-2017

525-ci qəzet.-2017.-26 dekabr.-S.7.