Yazıçı Kamran Nəzirli “Gənc Ədiblər”lə görüşüb

Azərbaycan Yazıçılar Birliyində gənc yazıçı və şairlərin tanınmış yazıçı-tərcüməçi Kamran Nəzirli ilə görüşü təşkil olunub.

AZƏRTAC xəbər verir ki, fevralın 17-də baş tutan görüşdə Azərbaycan Yazıçılar Birliyinin katibi Rəşad Məcid çıxış edərək tədbirin əhəmiyyətindən danışıb.

Kamran Nəzirlinin yaradıcılığına nəzər salan AYB katibi deyib ki, ədib bir çox publisistik yazıları, hekayələri və tərcümələri ilə mütəmadi olaraq dövri mətbuatda çıxış edir, əsərləri müxtəlif ölkələrin almanax və jurnallarında çap olunur.

R.Məcid vurğulayıb ki, yaradıcılığa “Ana laylası” şeiri ilə başlayan yazıçı “Sevgi nağılı”, “Doğmalar arasında”, “Cəmiyyət siyasətin güzgüsüdür”, “Şeytan işığı”, “Qoca uşaq”, “Araz ömrünün axarı”, “Nənə, mənə atamdan danış”, “Komada olan adam” və başqa kitabların müəllifidir. Ədibin yaradıcılığının gənc nəsillərin mənəvi tərbiyəsində böyük rol oynadığına toxunan R.Məcid gənc yazarların belə yazıçılarımızdan öyrənməyinin önəmini qeyd edib.

Kamran Nəzirli gənclərlə söhbətində müasir ədəbiyyatın problemləri və gənc yazarların üzərinə düşən işdən, məsuliyyətdən danışıb. O, gənclərin şeirlərini dinləyərək öz tövsiyələrini verib, sualları cavablandırıb.

525-ci qəzet.- 2017.- 18 fevral.- S.12.