ADPU-nun professoru TÜRKSOY-un medalı ilə təltif olunub

Azərbaycan Dövlət Pedaqoji Universitetinin professoru, “Türk araşdırmaları” ETL-nin elmi rəhbəri Elman Quliyev bi il fevralın 16-17-də Türkiyənin Ankara və Əskişəhər şəhərlərində TÜRKSOY-un “Türk dünyasının öncülləri: Məhəmmədhüseyn Şəhriyar” mövzusunda keçirdiyi konfransda iştirak edib.

O, M.Şəhriyarın həyat və yaradıcılığı ilə bağlı geniş məruzə ilə çıxış edib.

Türkiyənin hökumət nümayəndələrinin, millət vəkillərinin, alimlərin və söz adamlarının qatıldıqları tədbirdə professor Elman Quliyev Azərbaycan-Türkiyə elmi-ədəbi əlaqələrinin genişlənməsində xidmətlərinə və türk xalqları ədəbiyyatı problemlərinin araşdırılması sahəsində fəaliyyətinə görə TÜRKSOY-un medalı ilə təltif olunub.

O, fevralın 17- də TÜRKSOY-un, Türk Dünyası Vəqfinin və Əskişəhər Anadolu Universitetinin birgə təşkil etdiyi “Türk dünyasının öncülləri: Şəhriyar” adlı konfransda “M.Şəhriyarın poetik dünyası” adlı məruzə ilə çıxış edib.

Hər iki tədbirdə professor. Elman Quliyevə TÜRKSOY-un, Türk Dünyası Vəqfinin və Anadolu Universitetinin təşəkkürnamələri təqdim olunub.

Professor Elman Quliyev Ankara və Əskişəhərdə keçirilən konfranslarda son aylarda Azərbaycan Dövlət Pedaqoji Universitetində aparılan səmərəli təhsil islahatları ilə bağlı konfrans iştirakçılarına bir sıra məlumatlar verib.

525-ci qəzet. - 2017.- 25 fevral.- S.11.