Özbəkistanın Xalq şairi Bakıda qonaq oldu

Mayın 31-də Azərbaycan Yazıçılar Birliyində (AYB) Özbəkistanın Xalq şairi Camal Kamalla görüş keçirilib.

AZƏRTAC xəbər verir ki, Yazıçılar Birliyinin sədri, Xalq yazıçısı Anar tanınmış tərcüməçi, alim, yaradıcılığı Azərbaycan və Şərq ədəbiyyatı ilə sıx bağlı olan Camal Kamalı 80 illik yubileyi münasibətilə təbrik edib.

Diqqətə çatdırıb ki, Camal Kamalın Azərbaycan-Özbəkistan ədəbiyyatlarının qarşılıqlı təbliğində böyük əməyi var. Belə ki, Camal Kamal dahi Nizami Gəncəvinin "Xəmsə"sini özbək dilinə çevirib, eləcə də Səməd Vurğunun, Bəxtiyar Vahabzadənin, Xəlil Rza Ulutürkün və digər Azərbaycan ədiblərinin əsərlərini özbək xalqına təqdim edib. Anar C.Kamalın Azərbaycan Yazıçılar Birliyinin fəxri üzvlüyünə qəbul edildiyini bildirib.

Tədbirdə Yazıçılar Birliyinin katibi, Xalq şairi Fikrət Qoca, yazıçı-dramaturq Firuz Mustafa, Nizami adına Ədəbiyyat İnstitutunun "Azərbaycan-Türkmənistan-Özbəkistan ədəbi əlaqələr" şöbəsinin müdiri Almaz Ülvi və başqaları Camal Kamalın vaxtilə Özbəkistan Yazıçılar İttifaqının sədri kimi mühüm işlər gördüyünü bildirib, Azərbaycan-Özbəkistan ədəbi əlaqələrinin inkişafındakı xidmətlərindən söz açıblar.

Özbəkistandan gəlmiş tarixçi alim Şuxrat Salamov, filologiya üzrə fəlsəfə doktoru, dosent Gülbahor Aşurova, professor Roza Niyozmetova Azərbaycan-Özbəkistan dostluğunun Camal Kamal yaradıcılığında xüsusi yer tutduğunu söyləyiblər. Camal Kamal tədbirin təşkilatçılarına və iştirakçılarına təşəkkürünü bildirib, bundan sonra da qardaş Azərbaycan ədəbiyyatını Özbəkistanda təbliğ edəcəyini vurğulayıb.

Həmin gün Milli Kitabxanada da Camal Kamalla görüş keçirilib. Direktor Kərim Tahirov Azərbaycan-özbək ədəbi və mədəni əlaqələrindən danışıb, görkəmli şair Camal Kamalın bu yöndəki xidmətlərini diqqətə çatdırıb.

Millət vəkili Qənirə Paşayeva çıxış edərək şairin Azərbaycan ədəbi nümunələrini özbək dilinə tərcümə etdiyini, hazırda Nizami Gəncəvinin "Xəmsə" əsərini özbək dilinə çevirdiyini, artıq "Sirlər xəzinəsi" və "Leyli və Məcnun"un özbək dilində işıq üzü gördüyünü söyləyib. Ədəbiyyatşünas alim Almaz Ülvi də şairin fəaliyyətilə bağlı fikirlərini bölüşüb.

Şair C.Kamal gördüyü diqqətdən məmnunluğunu bildirib, Azərbaycan ədəbiyyatına ürəkdən bağlı olduğunu deyib.

Görüşün sonunda müasir özbək ədəbiyyatı nümunələri Azərbaycan Milli Kitabxanasına hədiyyə edilib və tədbir iştirakçıları kitablardan ibarət sərgi ilə tanış olublar.

525-ci qəzet 2017.-1 iyun.- S.5.