Milli Kitabxanada Qurtuluş günü

 

Dünən Mədəniyyət və Turizm Nazirliyi, Milli Kitabxana və AMEA-nın A.A. Bakıxanov adına Tarix İnstitutunun təşkilatçılığı ilə "Heydər Əliyev: Azərbaycan xalqının qurtuluş mübarizəsinin qalibi" mövzusunda elmi konfrans və "15 iyun- Milli Qurtuluş günüdür" adlı kitab sərgisinin açılışı olub.

 

Əvvəlcə tədbir iştirakçıları ümummilli liderin həyat yolunu əks etdirən "15 iyun-Milli Qurtuluş günüdür" geniş kitab sərgisi ilə tanış olublar. Sərgidə 200-ə yaxın ədəbiyyat nümayiş etdirilib.

 

Milli Kitabxananın direktoru, professor Kərim Tahirov ümummilli liderin həyat yoluna nəzər salıb, onun Azərbaycanın müstəqilliyini qoruyub saxlamaq, Azərbaycanı dünyaya tanıtmaq, habelə xalqımız qarşışında sonsuz xidmətlərindən danışıb, ulu öndərin mədəniyyətə, incəsənətə verdiyi yüksək qiymətdən söz açıb.

 

Daha sonra Ümummilli lider haqqında qısa film nümayiş olunub.

 

Mədəniyyət Turizm Nazirinin birinci müavini Vaqif Əliyev bütün dünyada layiqli hörmət böyük nüfuz qazanmış görkəmli dövlət xadimi haqqında danışıb, onun uzaqgörən istedadlı idarəçiliyi sayəsində Azərbaycanın hər sahədə inkişaf etməsini bugünkü nüfuzlu mövqeyə çatmasını təmin etməsini söyləyib.

 

Daha sonra AMEA-nın həqiqi üzvü, akademik, millət vəkili, Tarix İnstitutunun direktoru Yaqub Mahmudov, institutun Əliyevşünaslıq şöbəsinin rəhbəri, professor Ədalət Qasımov, Əliyevşünaslıq şöbəsinin aparıcı elmi işçisi, tarix üzrə fəlsəfə doktoru Leyla Hüseynova, Azərbaycan Mədəniyyəti tarixi şöbəsinin aparıcı elmi işçisi, tarix üzrə fəlsəfə doktoru Nigar Axundova çıxış ediblər.

 

Tədbirin sonunda Tarix İnstitutunun son illərdə çapdan çıxmış nəşrləri Milli Kitabxanaya hədiyyə olunub.

 

525-ci qəzet  2017.- 15 iyun.- S.3.