Şeirimizin ağ baxtısan...

ŞAİR PAŞA QƏLBİNURUN 65 YAŞINA

Bu gün 65 yaşın tamam olur, əziz qardaşım! Düz otuz il bundan əvvər qürub çağının sehrli rənglərinə büküb göndərdiyin "Payız məktubu"na illər keçəndən sonra, bu əziz günündə bənövşə ətriylə süslənmiş "bahar məktubu"mla cavab göndərirəm.

Bu məktubum əslində keçib gəldiyimiz bu yollarla, bizim arxamızca uzanan əllərlə, yolumuza çıxan yağışlarla, sellərlə olan söhbətimdi.

Mən bir dəfə yazmışdım: "Bizi tanış edən, yüz ilin dostu edən bu qos-qocaman Bakıya ilk dəfə gələndə "Canavar ağzı"ndan keçib gəldik. Yuxarıdan şəhər əl içi kimi görünürdü. Canavar gözləri kimi alışıb-yanan milyon-milyon işıqların içində biz kimi axtarırdıq? Heç özümüz də bilmirdik. Əlimizi əlinə almış qaraçı qızının ovcumuzun içindəki xətlər kimi qarmaqarışıq pıçıltılarını dinləyə-dinləyə başa düşdük ki, bizi al dilə çəkə-çəkə bu doğma , bu "qərib" şəhərə gətirib çıxaran da əllərimizdi". Bu əllərlə biz tanış olduq, yuva qurduq, dost hayına, harayına çatdıq, övladlarımızın başına sığal çəkdik, şeir yazdıq, ağac əkdik, ac göyərçinlərə dən səpdik, bir yetimi sevindirdik. Amma sənin sirli, sehirli, heykəli qoyulası əllərin möcüzələr yaratdı, əziz qardaşım!

Bu qeyri-adi əllər yüzlərlə bəşər övladını zülmətin pəncəsindən xilas etdi, dua etdi, tanrı dərgahına doğru uzandı.

Ulu Şəmkir çayına 13 yaşında pıçıldadığın "Gözlər"i sular alıb aparsa da, o gözlərin işığı, nuru səni çox, çox uzaqlara apardı.

Nəslindən, nəcabətindən gələn genetik saflıq, təmizlik, halallıq, aydan arılıq, sudan duruluq, aristokratlıq, ağayanalıq, qəlbini, gözünü, könlünü işıq, nur daşqınlarına çevirdi.

40 ildən çoxdur ki, xalqımız səni Qəlbinur kimi sevir, bağrına basır, səninlə qürur duyur, şöhrətinin kölgəsində yatan, gözü ayağının altını görməyən, yuxulu doğulub, yuxulu da bu dünyadan köçən xəbis, xain, cılız nadanlar üçün tərs şapalaq olan hər addımınla, hər şeirinlə, hər nəğmənlə sən dostlarının qəlbində Savalan dağı kimi ucalardan ucasan, əziz qardaşım!

Şairlər içində sən bir incisən,

Dostların içində sən birincisən, -

dediyim günlərdən düz qırx il ötüb. Bu illər ərzində dünyaşöhrətli oftalmoloq, Azərbaycanın görkəmli şairi, böyük uğurlarıyla hamının qürur duyduğu Paşa Qəlbinur "bir santim" belə dəyişməmiş, sadəliyi, səmimiliyi, xeyirxahlığı, nəcibliyi ilə az qala hamının and yerinə çevrilmişdir.

Qaşların gibləgahdır,

Ucun əymə günahdır.

Şuşaya duman gəlsə,

Bil ki mən çəkən ahdır.

1984-cü ildə yazdığın, bu bayatını epiqraf kimi verdiyin bir şeirində sən nə qədər uzaqgörən, öncəduyan, fəhmlə, duyğuyla hiss edən, narahat olan ürək adamısan, əziz qardaşım!

Qarabağ dərdiylə, Böyük Azərbaycan taleyilə bağlı nə qədər bənzərsiz şeirlərin var. Sən onları ürəyinin qanıyla yazmısan.

Barlı budaq kimi ancaq ana torpağa əyilən məğrur, mərd, mətin, istedadlı qardaşım, sənin uğuruna qısqananlar, narahat olanlar, yuxusu ərşə çəkilənlər də oldu bu illər ərzində. Kölgənin kölgəsi olmağa belə layiq olmayan bu adamlar sənin işığından yaman qorxdular. İşıqdan qorxan yarasalar.

Sən özün bir nəğməndə nə gözəl demisən:

Yer üzündə bir it olsa,

Gəlib tapıb qapar məni.

O əniklərə ən böyük zərbə sənin uğurların oldu, əziz qardaşım! Zaman o itlərin qulağını bu gün olmasa da, sabah mütləq kəsəcək. Sənin istər sevgi, istərsə də döyüş meydanında kişi kimi, qladiator kimi döyüşün buna ən tutarlı cavabdır.

Bir Paşa min olar!!!

Şimşəklərə qoşular!

Sökər

Başının üstündə daş pərdələri.

Bu illər uzunu redaktoru olduğum neçə-neçə kitablarında getmiş bir-birindən gözəl, qeyri-adi şeirlərinlə sən müasir poeziyamızın ən qüdrətli şairlərindən biri olduğunu təsdiq etdin. Bu, sənin ana südü kimi pak, halal haqqındır, əziz dostum!

Qurd kimi yalnızam, şir kimi güclü,

Sən mənim yoluma çıxa bilməzsən.

Sən deyən deyiləm, sən olammaram -

Pul kimi hamının xoşuna gələm.

Mənim bir az Günnən yaxınlığım var,

Mənim bir az Aynan yaxınlığım var.

Ayın nurundan çox üzdə həyam var,

Kürün suyundan çox ilham payım var.

Düşmənim, dostlarım saysız-hesabsız,

Taleyim - Cənabi Haqqın nurunda!

Sən mənim haqqımı tapdayammazsan!

Aya, göyə, suya atılan güllə,

Gücün nə olsa da, zərrəsən, tozsan,

Sən mənim haqqımı tapdayammazsan.

Sən həqiqətən beləsən, ürəyi qızılgül ləçəyi Paşa Qəlbinur dostum!

Şairlərin ən ərköyünü, ən xeyirxahı, ən ucası, həkimlərin ən istedadlısı, ən sadəsi.

Qapın hamının üzünə açıq oldu həmişə. Mən sənin doğulduğun Çinarlıda olduğumuz günləri xatırlayıram. El-oba səni necə də sevir, səninlə qürur duyur. İllər uzunu qoruyub saxladığın üzündəki o işıq, o nur, çöhrəndəki utancaq təbəssüm, uşaq saflığı halalın olsun, qardaşım! İllər uzunu şeirlərinlə, nəğmələrinlə ürəklərə yol tapdın.

Dost olduğumuz bu 40 ildə mən sənin "yox" kəlməni eşitmədim. Zülmətdə yol azanları işığa çıxaran Məlikməmməd qardaşım!

Azərbaycanımızın ən görkəmli şəxsiyyətləri, elm, ədəbiyyat, incəsənət adamları sənin yaradıcılığın, büllur şəxsiyyətin haqqında söz dedilər. Bu yubiley günündə onlardan bəzilərini yada salmaq Allaha da xoş gedər.

Yusif Səmədoğlu: - Paşa Qəlbinur şəxsiyyəti nurla dolu istedadlı şairimizdir.

Ramiz Rövşən: - Mən həkim olmasam da, Paşa Qəlbinurun şeirlərini oxuyandan sonra, onun sənəti haqqında aydın təsəvvürüm oldu və təkrar edirəm ki, onun poeziyası məndə belə bir inam yaratdı ki, lazım gəlsə, mən öz gözlərimi onun cərrah bıçağına etibar edə bilərəm.

İmam Mustafayev: - Dünyada böyük alimlər çox olub, dahi şairlər də. Ancaq Paşa Qəlbinur hər iki ağır yükün nəhəng daşıyıcısıdır.

Mirəli Seyidov: - Paşa Qəlbinur söykökü minillərdən gələn xalqımızın etik normalarının, genetik istedadının, qan yaddaşının uğurlu daşıyıcısıdır.

Qəhrəman Qəhrəmanov: - Paşa Qəlbinur bütün zamanlar üçün Azərbaycanımızın ən böyük alimlərindən biridir, minillik Azərbaycan poeziyasının bənzərsiz şairidir. Vətənimizin bu çətin günlərində Azərbaycanımızı dünyada tanıdan tək-tək oğullarımızdan biridir.

Mən bir fizioloq kimi deyirəm: Paşanın qanından damla-damla xalqımızın övladlarının qanına paylamaq - peyvənd etmək lazımdır.

Yevgeni Reyn: - Mən ömrümdə, yaxşı mənada, bir neçə dəfə heyrətlənmişəm. Onun biri Paşa Qəlbinuru oxuyub tərcümə edəndə olub. Qəlbinurun poeziyasında tanıdığım böyük şairlərdən daha güclü şeir enerjisi və dünyanın heç bir şairini yada salmayan bənzərsizlik var. O, əsl şairdir.

Mən bu yazımı "Şeirimizin ağ baxtısan" adlandırmışam. Sən həqiqətən yaşadığın şərəfli ömürlə şeirimizin ağ baxtısan. Afaqınla, Ayselinlə, Turalınla, Ayanınla xoşbəxt ol, əziz qardaşım! Sənin xoşbəxt olmağa çox, lap çox haqqın var. Uzun-uzun illər qabaq mən sənin üçün nə yazmışdım, xatırlayırsan?

Tanrıdı, taledi, göylərdən gəlib,

Könlündən süzülən Günəşdi, Aydı.

Mənim ürəyimdə bu yer üzündə

Oxuyan ən ulu nəğməli çaydı.

Körpədi, kövrəkdi bir duyğu kimi,

Yarpaqdı, dənizdi, səsdi, sədadı.

Heç zaman susmayan, nəğmə oxuyan

Ən yaxın, ən uzaq yaşıl adadı.

Bu gün də elə o fikirdəyəm. Ad günün mübarək böyük insan, böyük dost, böyük şair!

Zülfüqar ŞAHSEVƏNLİ

525-ci qəzet.- 2017.- 30 mart.- S.7.