İslam Həmrəyliyi ilinə həsr olunmuş "Təbiət möcüzələri"

Aprelin 29-da Xətai Sənət Mərkəzində Azərbaycan Rəssamlar İttifaqı (ARİ), Mədəniyyətlərin Təbliği və Xalq yaradıcılığına dəstək İctimai Birliyi (MTXİB) və Xətai Sənət Mərkəzinin birgə layihəsi olan İslam Həmrəyliyi ilinə həsr olunmuş "Təbiət möcüzələri" adlı sərgi-tədbir keçirilib.

Mərasimdə tanınmış mədəniyyət xadimləri, rəssamlar, sərgi həvəskarları və media nümayəndələri iştirak ediblər.

Tədbiri giriş sözü ilə açan ARİ-nin katibi, professor, Əməkdar İncəsənət xadimi Ağaəli İbrahimov "Təbiət möcüzələri" sərgisi haqqında ümumi məlumat verdikdən sonra onun İslam Həmrəyliyi ili ilə bağlılığından danışıb: "Bu sərgi əsas onunla seçilir ki, burada peşəkarlarla yanaşı, həvəskar rəssamlar da iştirak edir. Bu gün ölkəmizdə, xüsusən gənclər arasında təsviri incəsənətə sürətlə artan maraq olduqca sevindirici haldır. Burada nümayiş olunan ayrı-ayrı rəsm əsərlərində rəssamlarımız yalnız Azərbaycan mədəniyyətini deyil, ümumi İslam mədəniyyətini sərgiləyirlər". Katib Azərbaycanda keçirilən beynəlxalq yarışların ölkəmizin mədəniyyətinin, adət-ənənələrinin dünyada tanıdılmasındakı əhəmiyyətini də xüsusi vurğulayıb: "Cənab prezident İlham Əliyevin və Heydər Əliyev Fondunun qayğısı nəticəsində ölkəmizdə bütün sahələrdə müşahidə olunan inkişaf təsviri incəsənətdə, mədəniyyətimizdə də görünməkdədir. Ölkəmizdə keçirilən Beynəlxalq yarışların, tədbirlərin sayəsindədir ki, artıq bütün dünya Azərbaycan mədəniyyətini yaxından izləyə bilir".

Layihənin rəhbəri Elnurə İsgəndərova artıq on ildən artıqdır ki, dekorativ-tətbiqi sənət rəssamı olaraq, Azərbaycan incəsənətinə qulluq etdiyini və bundan böyük məmnunluq duyduğunu qeyd edib. Bu sərgi-tədbirin təsviri sənətin inkişafında xüsusi rolu olacağına inandığını deyən E.İsgəndərova buna səbəb kimi sərgidə peşəkar sənətkarlarla birgə həvəskar rəssamların da iştirakını göstərib: "Biz bir rəssam kimi dövlətimiz tərəfindən önəmsənən hər ilə qarşı öz reaksiyamızı verməyə çalışırıq. 2017-ci il də IV İslam Həmrəyliyi Oyunları ilə bağlıdır. Biz də elə yazın gəlişini, təbiətin oyanışını ən gözəl zaman seçərək belə bir sərgi təşkil etdik. Burada yaş fərqi yoxdur. Sərgidə Azərbaycanın müxtəlif rayonlarından sənətkarlar dəvət olunub. Eyni zamanda, bizi xarici ölkələrdə təmsil edən bir qrup rəssamlarımız var ki, onlar da bu gün bizlə biryerdədirlər. İslam hər zaman möcüzələrlə xarakterizə olunan bəşəri dindir. Eyni zamanda, İslamın təbiətlə ahəngdarlığı da danılmazdır. Ona görə də "Təbiətin möcüzələri" deyərkən elə bir növ İslam dini də nəzərdə tutulur".

Təşkilatçı Aygün İsgəndərova sərgidə müasirliklə bərabər Azərbaycan milliyini də qoruyub saxladıqlarını deyib: "Bu sərginin əsas mahiyyəti ondan ibarətdir ki, biz hər birimiz Azərbaycan vətəndaşı olaraq, dövlətçiliyimizi, adət-ənənələrimizi, milliliyimizi təbliğ edərək az da olsa, dövlətimizin bu mühüm günlərində öz töhfəmizi verməyə çalışırıq. Biz bundan sonra da dövlətimizin ən mühüm tədbirlərində, önəmli günlərində bir rəssam olaraq, əlimizdən gələn dəstəyi göstərməyə hazırıq".

"Təbiət möcüzələri" sərgi-tədbirdə yalnız rəssamların əl işləri deyil, həmçinin Azərbaycanın milli geyimləri də nümayiş olunub. Geyimləri hazırlayan modelyer Məryəm Əliyeva belə bir sərgidə iştirakından məmnunluq duyduğunu qeyd edib: "Biz burada öz milli geyimlərimizlə təmsil olunuruq. Artıq dörd ildir ki, sırf geyimlərlə məşğul oluram. Kolleksiyamızda müxtəlif geyimlər yer alır. "Təbiət möcüzələri" olaraq hazırladığımız geyimlərdə isə çalışmışıq təbiətin şuxluğunu, rəngarəngliyini, baharın təravətini əks etdirək".

Tanınmış rəssam Səyyad Əliyev bu cür tədbirlərin keçirilməsindən böyük məmnunluq duyduğunu, bunu təsviri sənətin uğuru hesab etdiyini deyib: "Hazırda ölkəmizin hər tərəfində IV İslam Həmrəyliyi Oyunlarına həsr olunan tədbirlər keçirilir. Bugünkü sərgi də onlardan biridir. Bu sərgidə həm müəllimlər, həm də şagirdlər öz əl işləri ilə çıxış edirlər. Mən də bu sərgiyə özümün "Həmrəylik" əsərimlə qatılmışam. Azərbaycan xalqı sənətə, sənətkara hər zaman önəm verən bir xalq olub. Bugünkü sərgiyə olan maraq da bunun göstəricisidir. Mən arzu edərdim ki, bu cür sərgilər bundan sonra da təşkil edilsin".

Yazıçı-publisist Fesih Alioğlu, rəssam-şairə Könül Mustafayeva, modelyer Laləndər Novruzova və başqaları çıxışlarında bu cür sərgi tədbirlərin keçirilməsinin əhəmiyyətindən danışıb, rəssamlarımızın İslam Həmrəyliyi ilinə olan diqqətini yüksək qiymətləndiriblər.

"Təbiət möcüzələri" sərgi-tədbirinə təsviri sənətin bütün nominasiyaları üzrə müxtəlif yaş qruplarından 300-dən çox rəssam qatılıb.

Sonda iştirakçılar sertifikat, diplom və müxtəlif nominasiyalarla təltif olunub.

Şahanə MÜŞFİQ

525-ci qəzet.- 2017.- 2 may.- S.7.