İlahidən gələn cavab

KÖVSƏR YAŞILDAŞ: "TAM BİR EŞQ İÇİNDƏSƏNSƏ, DEMƏK SUALIN YOXDUR"

Türkiyəli mistik yazar Kövsər Yaşıldaşla Ayişə Nəbinin söhbəti

Türkiyəli yazar Kövsər Yaşıldaş mistisizmi, ezoterizmi, ilahi eşqi tərənnüm edən əsərlərin müəllifidir.

Onun maraqla qarşılanan kitabları əsrlərdən bəri nəsildən-nəsilə ötürülən əbədi bir missiyanı davam etdirərək, bugünün Kvant fizikasının köməyi ilə qədim gizli elmi, ilahi sirləri açıqlayır.

Kövsər Yaşıldaş 1971-ci il mayın 12-də İzmirdə doğulub. 28 il özəl sektorda Qrafik tasarım və rəng ayırma işində çalışıb. Ən son Uluslararası Flekso Tesisləri Basqı Ambalaj sektorunda idarəetmə vəzifəsini yerinə yetirib və elə oradan da təqaüdə çıxıb. "İndiqo" dərgisində yazıları yayımlanır, müxtəlif qəzetlərə köşə yazıları yazır.

2010-cu ildən kitab yazır. Əsərləri elmi-kütləvi, təsəvvüf ədəbiyyatı, fantastik hekayə, türk romanı və uşaq-gənclər üçün hekayə kitabları kateqoriyasına daxildir.

- Kövsər xanım, kitablarınızda gizli bir öyrətidən (elm-təlimdən) bəhs olunur. Bu gizli öyrəti nədir?

- Gizli öyrətilərin kökü on minlərlə il öncəyə gedən bir bilgi alma və bilgi ötürmə sisteminə bağlıdır. Bu sistem sufizmin önəmli təməl daşlarından biridir. Ariflər sufizmin içində, özünəməxsus bir üslubla, Batıni öyrətinin (gizli öyrətilər) sirlərinin nəsildən-nəslə ötürülməsi kimi önəmli bir missiya həyata keçiriblər. Gizli öyrətilərdə, sirlərin, demək olar, heç biri açıq şəkildə bəyan olunmayıb, amma bu bilgilər incə şəkildə sözlərin içinə gizlədilib. Bu sözlərlə qarşılaşanlar çox vaxt böyük çaşqınlıq içində qalırlar. O sözləri anlamağa çalışanlar o sözlərin içində gizlənən əsl mətləblərlə üz-üzə gəliblər. O mətləbləri anlamağa cəhd etməyənlər neçə-neçə arifi dindən kənar olmaqda, dindən çıxmaqda günahlandırıblar.

Gizli öyrətiləri anlaya bilmək üçün əvvəlcə onun bir çox sahələrini öyrənmək gərəkdir. Ariflərin tək bir sözündə belə üstüörtülü şəkildə çox dərin batıni sirlər verilib. Tək bir sözün içində dinlərlə bağlı çox önəmli bilgilər gizlənir. Gizli öyrətilərə aid sözlərin dərinliklərinə enməklə, dinlərin, əslində nə olduğunu indikindən çox fərqli bir şəkildə anlamaq olar. Bu gün dinlər hələ də kütləyə batıni yönləriylə deyil, zahiri görüntüsü ilə öyrədilməkdə davam edir. Məlumatı olmayan insanlar bu sözlərin anlamını qavraya bilməzlər. Bu cümlələrin anlamını ancaq açıq şüurlu insan anlaya və uyğun şəkildə başqasına ötürə bilər. Bu elmlər xalqa simvollaşdırılaraq və üstü qapalı anladılır. Bax, bu üstü qapalı və simvollaşdırılaraq ötürülən bilgilər gizli öyrətilər adlanır.

- Bu öyrətini, gizli elmi necə mənimsəyə bildiniz?

- Gizli elm aramaqla bulunmaz, istəməklə əldə edilməz, kitablardan öyrənilə bilməz. Kitablar gizli öyrətilər haqqında yalnız səthi bilgilər verə, oxuyanlara bir yol və ya bir işarət göstərə bilir. Gizli elmləri idrak etməsi, qavraması üçün insanın haqq edişi və üstün qabiliyyəti olması çox önəmlidir.

Bu, "haqq ediş", "haqq etmək" ilə bağlı deyil. Bunlar fərqli anlamdadır. Haqq ediş ilahi bir qanundır, insanın həyatlar, dövrlər boyu əldə etdiyi sonsuz təcrübələrin öz-qavram (əsas anlayış) halına gəlməsi və bu özü - mahiyyəti yaşamına tətbiq etməsidir. Gizli elimlər, sadəcə kitabi bir bilgi deyil, haqq ediş və ləyaqət içində olan insanın yaşam şəklidir. İnsanın bu haqqediş ilə həyatının hansı zaman kəsimində qarşılaşacağı, bunu yaşam tərzinə çevirəcəyi bilinməz. Buna görə də "aramaq", "gözləmək", "arayış" daim davam edəcək.

Mən gizli elmi nə əldə etdim, nə də öyrəndim. Mən kitabları yazmıram, bunlar mənim bu həyatımda, bu həyatımın bu zaman kəsimində, haqqediş içində olduğum, ləyaqətinə vardığım bir durumdur. Mən bu durumu yazıya alıram və yazıları kitablaşdırıram.

- "Nə günəş aya yetişər, nə gecə gündüzü ötə bilər" (Yasin surəsi, 40-cı ayə). Gerçəkdən də ilahi sirr nə əl çatmayacaq qədər gizli, nə də hər kəsin əlinin çatacağı qədər aşkardır. Sizin kitablarınızda bu İlahi Sirrin əsintilərini görməkdəyik. Sizə Sirri açıqlayın deyə bilmərəm, amma onu bir az anlada bilərsinizmi?

- Kitablarda yazdığım hər sətir dərin hissiyatımın, iç dünyamın, fərqli ölçülərdəki yolçuluqlarımın məhsuludur. Bəhs etdiyim hər vəli özünün sonsuz qaynağından bir işıq şüası kimi axaraq dərin iç dünyamı doldurub. Bu simvolik bilgiləri bir röyalar kanalı, ilham kanalı ilə, başa düşüləcək şəklə salıb kitablaşdırmışam. Mən təsəvvüf bilgiləri bazası olmayan insanam. Peşəm qrafika sənətidir, elmi düşünən, hər şeyə elmi yanaşan düşüncə tərzim var. Lakin ilham gəldiyi zaman o dünyasal Kövsərdən əsər-əlamət qalmır, başqa bir Kövsər ortaya çıxır. Bəhs etdiyim hər vəlinin hər birinin ayrı səsi, ayrı qoxusu, ayrı üslubu, ayrı tərzi var. Mən hər bir hissedişi olduğu kimi kitablara ötürürəm.

- Allah batinində zahirdir deyilib, bizə şah damarımızdan daha yaxın olan Allahı göylərdə aramaqla nələri tapır, nələri itiririk?

- Allah müqəddəs Quranda "həm Batinəm, həm Zahirəm" demiş olsa da, heç kim bu ayətə fikir vermir, əslində. İnsan ağlı, Allahın, sadəcə batin (görünməyən) yönünü araşdırıb, göy üzündə bir yerə layiq görür və orada qalması üçün də ardıcıl olaraq buna uyğun qanunauyğunluqlar tapmağa çalışır. Çünki bu, əldə etmənin ən asan yoludur. Allah göy üzündədir və insanlar bu baxımdan rahatdırlar. Necə olsa da O, göy üzündən insanların etdiklərini görə bilməz. Buna görə də qətliamların və aclıqların heç sonu gəlmir.

Lakin Allah həm də "Zahirəm" deyə buyurub. O zaman hər yerdə olduğunu da bilmək gərəkdir. Həllac Mənsur bunu çox gözəl ifadə edib: "Allah Musaya bir ağacdan danışdı. Bir ağacdan danışan Allaha inanırsınız da, şərəfli məxluq olan insandan danışan Allaha niyə inanmırsınız?" Bu, çox heyrətedici bir ifadədir. Əvvəllər dərvişlər yeriyərkən bəzən ayaqları havada qalırmış. Tam ayaqlarını basacaqları yerdən Rəblərinin göz qırpdığını gördüklərində heyrətə düşərmişlər. Rəbb hər zərrəyə möhrünü vurub. Atomaltı zərrələrdən tutmuş, ta qalaksiyalara qədər. Canlı-cansız olan hər yerdə Rəbbin möhrü var.

Allahın göy üzündə olduğu inancı, çox qədim bir ənənədir və bunun keçərliliyi son zamanlarda yox olmağa üz tutub. İnsanların zehinləri dəyişir, dəyişdikcə də yenilənir və çevrilir. Yaradan artıq göylərdən yerə enib, yəni aramızdadır, bizimlədir. Bir ayətdə belə deyir: "Siz harada olsanız, O sizinlədir" (Hədid surəsi, 4-cü ayə).

- Mənsur Həllac "Ənəl-Həqq" dedi, edam olundu, tarazlıq təmin edildi. Siz isə demisiniz ki, Həllac bir cümlə ilə Kvant düşüncəsinin başlanğıcını yaratdı. Buna bir az açıqlıq gətirə bilərsinizmi?

- Hələ orta məktəbdə oxuyarkən İzafilik nəzəriyyəsinin iş prinsipini çözmüşdüm. Albert Eynşteynə heyranlığım vardı. İllər sonra Həllac Mənsurun kitabını yazan zaman hiss etdiyim ilhamlar, əslində, bir gerçəyə işıq tuturdu: Ənəl-Həqq qavramı, Kvant qanunu ilə üst-üstə düşür.

Kvant kainatında bir qopmadan, bir ayrılmadan söhbət gedə bilməz. Hər şeyin özü - mahiyyəti atom və atomaltı dünyada gizlidir. Atomaltı dünya qətiyyən olmayan bütünsel bir yapı-quruluş təşkil edir.

Kvant dünyasında ayrılış, ayrılmaq, qopmaq imkansızdır. Bir atomu parçalarından ayırsanız, atomun çəyirdəyinə edilən bir müdaxilə digər parçaların da eyni müdaxiləyə uğramasına səbəb olur. Bu da hər parçanın bütündən ayrı olmadığını, qopmadığını, görünməz bağlarla bağlı olduğunu sübut edir.

Hələ Kvant qanunu ortaya çıxmazdan, Həllac Mənsur "Ənəl-Həqq" sözü ilə "Görünən hər şey mənəm" demişdi. Bu "Mən" kəliməsi Kainatın özü - mahiyyətidirdir. Kainatın özü - mahiyyəti də tək və bənzərsizdir. "Ənəl-Həqq" vurğusundakı "ənə" kəliməsi Allah yolunda olan bir ruh üçün işlədilir. Əgər "ənə" kəliməsini bədənsəl "mən" olaraq düşünsək, yüksək eqo boyutuna girərik. Bu da fironlaşan bir mənlik anlamını daşıyır, qısaca, "Mən Tanrıyam! Mənə tapının!" anlamına gəlir. Lakin Həllac Mənsur, "Ənəl-Həqq" kəlməsini söylərkən, yüksək eqodan çox, daha üst boyutda bir bilinç-şüur yaşayıb. Bu bilinç ruhunun ölmədən Allaha çatması üçün etdiyi çağrışa gələn cavabdır. "Mən Haqqam" deməsi, "Haqq mənim surətimdə göründü", ya da "Mən Haqq surətində göründüm" anlamını daşıyır. Bənzərsiz və tək olan Tanrısal boyut bilincində söylənmiş gizli bir sözdür. "Ənəl-Həqq" sözü, Haqq adının insan beynində açılımını, insanın bilincindəki rezonansı, bütün bədən hüceyrələrindəki tanrısal açılımın ortaya çıxmasıdır.

- "Sorğu-sual varsa, Eşqdə deyilsən". Amma hər dildə eşq bir başqa rəngdədir. Sizin vardığınız məqamda Eşq əlinizdən necə tutdu, Eşq sizə gerçəyi alqılamaqda öyrətmən oldumu heç?

- Mənim əlimdən Həllac Mənsur tutdu. Onu ruhumda hiss etdim. Bir ay beynimin içində həbs olundu və orada mənə gerçək Eşqi öyrətdi. Bunu əsla inkar edə bilmərəm. Ən böyük Eşq ustadı Həllac Mənsurdur və mən onun gerçək sevgisinə şahid oldum. Mənim öyrətmənim oldu Eşq. "Sizin çatdığınız məqamda" deyə bir ifadə var sualınızda. Məsələ belədir ki, bu dünyada məqamlara çatan adamlar, məqamlara çatan adamların anlatdıqlarını eşidənlər və məqamlara müşahidəçi kimi şahidlik edənlər var. Sanıram ki, mən üçüncü kateqoriyadayam. Kitablarını yazdığım hər bir vəliyə, məqamlara doğru yolçuluqlar etdim, müşahidələr apardım və onları bir-bir kitablara ötürdüm. Oralarda sualların birmənalı şəkildə yox olduğunu gördüm. Tam bir Eşq içindəsənsə, demək sualın yoxdur. Mən müşahidə edən bir insanam. Yəni gözləmçi-müşahidəçiyəm. Bunu mənə bəxş etdiyi üçün də uca Rəbbimə hər an şükür edirəm.

- Kövsər xanım, bu maraqlı və məna yüklü cavablarınız üçün sizə çox təşəkkür edir, bu ağır, əbədilik sevdası yolçuluğunuzda sizə bol ilham, sonsuz Eşq arzulayıram.

- Bu üstün və gözəl suallarınıza məmnun oldum. İnanın, bu günə qədər mənə verilən ən qiymətli və çətin suallardır. Çox bəyəndim. Suallarınız üçün sonsuz təşəkkür edirəm. Hər kəsə işinin avand olmasını diləyirəm.

525.-ci qəzet.-2017.-24 may.-S.8.