Aysel Əlizadədən kitab və klip təqdimatı

Mayın 29-da gənc yazar Aysel Əlizadənin "Qadın peyğəmbər" kitabının imza günü və "Çərçivə" şeirinə çəkilmiş klipin təqdimatı olub.

Mərasimdə millət vəkilləri, tanınmış sənətçilər və media nümayəndələri iştirak ediblər.

Əvvəlcə A.Əlizadə "Çərçivə" şeiri və klipi haqqında məlumat verib: "Yaxın dostlarımdan biri dedi ki, bu, klip deyil, kinodur. Çox sevinirəm ki, Fuad Əlişovla bu layihəni həyata keçirdik".

Filmin rejissoru F.Əlişov klipin yaranmasından danışıb: "Aysel xanımla görüşəndə yazdığı kitabları, son yaradıcılıq yeniliklərilə maraqlandım və bir neçə şeirini mənə göndərməyi xahiş etdim. Onların içindən ən çox "Çərçivə"ni bəyəndim və klip çəkdim. Klipdə illərlə tanıdığım insanın daxili aləmini göstərməyə çalışmışam".

Sonra klip nümayiş olunub və tədbir iştirakçıları onunla bağlı təəssüratlarını bölüşüblər.

Aktyor və rejissor Rza Rzayev klipi çox bəyəndiyini deyərək, hər iki müəllifə yeni uğurlar arzulayıb.

Millət vəkili Fazil Mustafa kitab və klip haqqında yüksək fikirlər söyləyib. Onun fikrincə, müəllifin əsərində qadının dirçəlişi problemi öz əksini tapıb: "Bir qadının yazar, müğənni, alim olaraq cəmiyyətin həyatına özünü qəbul etdirməsi çox ağır şərtlərdən keçir. Bu şərtlərdən keçmək çox böyük cəsarət tələb edir. Çox adam bunu bacara bilmir. Ona görə də bu cəsarəti göstərən qadınlara dəstək verməliyik".

Millət vəkili Adil Əliyev A.Əlizadə ilə fikir ortaqlığından söz açıb: "Onun yazılarını oxuyanda elə bilirəm, biz mövzunu onunla müzakirə etmişik, sonra qələmə alınıb. Yəni o, insanın içindəkiləri bu qədər dəqiq ifadə edən bir yazıçıdır. Aysel xanım hətta tənqidi yazılarında da kübarlığını qoruyur. Onun yazılarında kimlərisə incidən, qıcıqlandıran bir ifadə yoxdur. Çünki o, şəxslərin deyil, problemlərin üstünə gedir, onları qabardır. İnsan o yazıları oxuyanda bir qədər rahatlıq tapır ki, ölkəmizin, xalqımızın bu cür həssas bir xanım ziyalısı var".

Sənətşünas Elçin Əlibəylinin fikrincə, bu klip müəyyən mənada, A.Əlizadənin həyat hekayəsidir. Fuad Əlişov çox istedadlı bir estetik yanaşma ilə Aysel xanımın taleyini klipdə göstərə bilib.

Şairə Kəmalə Abıyeva qızı ilə fəxr etdiyini deyib: "Mən artıq Kəmalə Abıyeva kimi deyil, Aysel Əlizadənin anası kimi tanınmağımla qürür duyuram. Sevinir və fəxr edirəm ki, onun ilk oxucusuyam. Aysel həm televiziya aparıcısı olduğu dövrdə, həm də yazıçılıq fəaliyyətində işinə hər zaman məsuliyyətli yanaşıb".

Tanınmış yazıçı və tərcüməçi Kamran Nəzirli A.Əlizadənin bir şeirinin Londonda qazandığı uğurdan söz açıb: "Məndən sonra doğulacaq qadın" süjetli şeirini mən ingilis dilinə tərcümə etmişdim. Həmin şeir Tərcümə Mərkəzinin layihəsi olan "Azərbaycan şeiri antologiyası"na salınmışdı. O antologiyanın Londondakı təqdimatında ingilislər Aysel Əlizadənin həmin şeirini xüsusi bəyənib fərqləndirmişdilər. Klipə gəlincə, burada Azərbaycanın gənc bir yazarının aydın obrazı var. Mən istərdim ki, bu işin həm Azərbaycanda, həm də xarici ölkələrdə təbliği həyata keçirilsin".

"Qadın peyğəmbər"in redaktoru, şairə Rəbiqə Nazimqızı, həmçinin Azər Ayxan, İqbal Ağazadə, Gülər Əhmədova, Rövşanə Bektaşi, Faiq Hüsiyev və başqaları da kitab və klip haqqında düşüncələrini bölüşüb, müəllifə uğur diləyiblər.

Sonda A.Əlizadə kitabının nüsxələrini oxucular üçün imzalayıb.

Şahanə MÜŞFİQ

525-ci qəzet.-2017.-31 may.-S.7.