Görkəmli pianoçu Adilə Əliyeva ilə görüş oldu

Dünən Musiqi Mədəniyyəti Dövlət Muzeyində görkəmli pianoçu Adilə Əliyeva ilə görüş keçirilib.

Tədbirdə muzeyin direktoru Alla Bayramova, şöbə müdiri Xanım Abdinova çıxış ediblər.

Bildirilib ki, Əməkdar artist, uzun illərdir Fransada yaşayan dünya şöhrətli pianoçu Adilə Əliyeva Bakıda anadan olub, sonradan Moskvaya köçərək P.Çaykovski adına Konservatoriyada təhsil alıb.

İyirmi beş ilə yaxındır ki, Fransada yaşayan görkəmli pianoçu 50-dən çox ölkənin konsert salonlarında çıxış edib, 30-dan artıq kompakt-disk ərsəyə gətirib.

Fransa Ali Beynəlxalq Musiqi Akademiyasının direktoru olan həmvətənimizin adına iki ildən bir Fransa və İsveçrədə beynəlxalq musiqi festivalı təşkil olunur. Adilə Əliyevanın rəhbərlik etdiyi festivalın münsiflər heyətinə dünyanın tanınmış musiqiçiləri daxildir.

Tədbir iştirakçılarını salamlayan Adilə Əliyeva Bakıya gəlməsindən məmnun olduğunu bildirib. O, yaradıcılıq planlarından söhbət açıb və dünya klassiklərinin əsərlərindən parçalar səsləndirib.

ŞAHANƏ

525-ci qəzet 2017.- 4 noyabr. - S.15.