Azərbaycan ədəbiyyatı nümunələrinin Türkiyədə təqdimatı

Noyabrın 5-də İstanbulun TÜYAP sərgi mərkəzindəki 36-cı Türkiyə Beynəlxalq Kitab Sərgisi çərçivəsində türk dilinə tərcümə olunaraq qardaş ölkədə nəşr edilən Azərbaycan ədəbiyyatı nümunələrinin təqdimatı keçirilib.

Təqdimatda elm və mədəniyyət adamları, tanınmış ədəbiyyatçılar, çox sayda azərbaycanlı, tələbələr, QHT və KİV təmsilçiləri iştirak ediblər.

Azərbaycan Mədəniyyət və Turizm Nazirliyinin təşkil etdiyi pavilyonda təşkil olunan təqdimatda Milli Məclisin deputatı, akademik Nizami Cəfərov, Milli Kitabxananın direktoru Kərim Tahirov, Yazıçılar Birliyinin katibi Rəşad Məcid, tərcüməçi Yursevən Şən və başqaları çıxış ediblər. Çıxışlarda qeyd olunub ki, nəşr olunan bu əsərlər Azərbaycan ədəbiyyatının Türkiyədə tanıdılmasında böyük əhəmiyyət daşıyır.

Qeyd edək ki, Azərbaycan Mədəniyyət və Turizm Nazirliyi ilə "Sevinc Fırat Zəngin Yayınçılıq" arasında 2016-cı ildə əldə olunan razılaşma üzrə həyata keçirilən layihə çərçivəsində Azərbaycan ədəbiyyatının görkəmli simalarının bir il ərzində ümumilikdə 8 əsəri türk dilində nəşr olunub. Bu siyahıya Mir Cəlal Paşayevin "Bir gəncin manifesti", Yusif Vəzir Çəmənzəminlinin "Qan içində" ("İki od arasında"), Cəlil Məmmədquluzadənin "Danabaş kəndinin əhvalatları", Yusif Səmədoğlunun "Qətl günü", İlyas Əfəndiyevin "Körpüsalanlar", Fərman Kərimzadənin "Qarlı aşırım" əsərləri və Əbdürrəhim bəy Haqverdiyevin iki cilddən ibarət hekayələri daxildir.

Hazırda isə Mir Cəlal Paşayevin dahi Azərbaycan şairi Məhəmməd Füzuli haqqında yazdığı "Füzulinin poetik xüsusiyyətləri" adlı elmi əsəri türkcəyə çevrilir. Kitabın M.Füzuli yaradıcılığının tədris olunduğu bir sıra ali təhsil müəssisələrində dərs vəsaiti kimi istifadəsi nəzərdə tutulur.

Şahanə MÜŞFİQ

525-ci qəzet.-2017.-7 noyabr.-S.7.